11
1 Thang: zain vang yo, nghoid da" khokham joem meing: zain: yo, doem ju" lo uri David gi Yoab we' nya: moo" voin bang: we' Israela gyizoo: yiri nhang: kaid wigi nyangnu" gi Amon byu yiri oung: pyam lho: Raba voogung ri vang: lheing to" ago" da:. Nghoid loug we' David koem' gi Yerusalem voomoo" moo da nyid nyid da:.
2 Danyid" da" bidnyid myen" thang: zoo" ri David gi daso' zoo: yhoeb wigi to' lo lho: khokham yhoem: mo yhoemkhung: khyoo: do, lo" bye:. Hougmoo nyang: so" lheing: yen" uri myiyi: dayug nya: yhoem: moo gung cid" nyid ziri nyang: myang kaid bye:. Nyang: gi gye" yung" da:.
3 Hougsu" nghoid yoomo nyang: hang" nghoid ziri si' wa shid re" lagyoo: dayug ri nhang: kaid bye: ziyo' nyang: gi Bathsheba nghoid wigi Eliam da" nya: zoo: Hiti byu Uria da" yhoem: seing: myhi' nghoid ga: ziri se' yu bye: zi nghoid.
4 David gi nyang: ri khi: wa shid re" lagyoo: yi ri nhang: kaid bye: zi nghoid. Houg: yoomo nyangnu" we' nya: jhang khyoo: shu" lo wigi nyang: yo' gung shoo" zoem" bye:. (Nyang: we' thung" bo ziyo' dayhang: ti" mi ci: ayo, thang: ri za: danghoid yoomo gyeung" shang: nyid bye: da:.) Hau: thang: nyang: yhoem: khyoo: doem tau" loo" khari" bye:.
5 Hau: thang: nyang: gi zooshang: gung bue" ri" bye: ziri si' lang" David ri tid kyoo" wa shid re" lu dang: foin: kaid bye:.
6 Hau: thang: David gi Yoab jhang khyoo: lu dang: pyeung: kaid bye:. ?Hiti byu Uria ri nga" jhang khyoo: nhang: kaid we'? ga:. Houg: yoomo Yoab we' nyang: ri David jhang khyoo: nhang: kaid bye:.
7 Uria ju" loo lang" David gi nyang: ri ?Yoab yo' gyidab joem gi yang" nyid ago" lha". Gyi said meing: zain: go" zigi khasu" nghoid ago" lha"? ga: nyang: ri lhoem: myid: da:.
8 Hau: thang: David gi Uria ri ?Yhoem: khyoo: lo" wigi daso' zoo: lo" no: yu we'? ga: wigi tid bye:. Uria lo" byug thang: ri David we' nya: yhoem: khyoo: jhungshug byid: nhang: kaid bye:.
9 Nghoid loug we' Uria gi yhoem: khyoo: aloo" looza: khokham da" gyi zung" mo, yo' dage" khokham vang" khoem" duang: moo yhoeb jo, da:.
10 Uria yhoem: khyoo: alo" da" lu dang: ri David shoug" gyoo: lang" nyang: gi Uria ri ?Nang gi ayo, akhyeing: myang" myang" so" yen" wigi akhid" she' datau" loo su: yhoem: khyoo: ciwim yoomo anau loo" koid nyid la"? ga: myid: bye:.
11 Uria gi ?Israela yo' Yuda byu yigi meing: zain: da" joyoo moo nyid nyid ziyo' nyangnu" yo' dage" Dang: Theing Kuid: we' jo, da:. Nga" gyizoug: Yoab yo' nya: gyizoug: yi we' pa: cang dab koid wigi nyid nyid boem zi danghoid yoomo ngoo khasu" wigi yhoem: khyoo: lo" lho: zoo: gi shug gi nga" yhoem: seing: myhi' yo' ngoo yo" lo" yhoeb wa la". Houg: yhang: te" da" moo" zoo" ri khanham we' ngoo akoid wa ein: deing byeung" da" myeing moo hau: khyoo: dangain" ziri ngoo theing too" bye: zi nghoid? ga: tid khyo" da:.
12 Hougsu" nghoid yoomo David gi ?Hougsu" nghoid lang" akhid" nyid" hid: moo nyid shi" we' nab kyoo' she' nang ri ngoo loo" nhang: wa? ga: tid. Hougsu" nghoid yoomo Uria gi hau: nyid" we' thang: nyid" we' Yerusalem voomoo" moo nyid nyid bye:.
13 David gi nyang: ri myen" xoin: zho" wigi yhid: shug yid nhang: wa shid re" khe: yu bye: zi nghoid. Nghoid loug we' hau: myen Uria yhoem: khyoo: aloo" looza: khokham vang" mo gyi zung" bang: da" yab moo nya: mi void lho: yhoeb jo, da:.
14 Thang: nab kyoo' ri David gi Yoab jhang khyoo: mougsoug" dakhyab lhid" wigi hau: ziri Uria ri de" nhang: kaid da:.
15 Nyang: gi ?Gyiyoem: je" thain: ein: da" shidkhyoo: Uria ri to" too" ge' hau: thang: gyiphung: yigi tau" lo lho: nyang: ri said pyam nhang: ge'? ga: lhid" kaid bye:.
16 Houg: yoomo Yoab gi voomoo" ri vang: lheing to" uri nyang: se' da" gyi yoem: je" thain: da" joyoo moo Uria ri nhang: kaid bye:.
17 Gyivoo joem voomoo" mo thu re" wigi Yoab gyiphung: ri zain: bye: zi nghoid. David da" moo" voin" bang: dayham" shoug" said pyam wigi Uria we' said pyam zi thung" shoug" bye:.
18 Hau: thang: Yoab gi David jhang khyoo: meing: zain: lu dang: kyo" kaid wigi
19 Nyang: we' hau: lagyoo: phoo ri ?Meing: zain: lu dang: dangain" ziri khokham jhang nang bain tid kyoo" lang".
20 Nyang: gi nheig yo: ziyo' nang ri ?Nyangnu" ri said wa shid re" ciwim yoomo voomoo" khyoo: tain" tain" yhi: go" lha". Nyangnu" vang khyam: mo myoo: wigi beig nyid ziri nanu" aboin: goo" rhe".
21 Gideon da" nya: zoo: Abimeleg khasu" said pyam ziri nanu" aboin: goo" rhe". Hau: zigi Thebeza voogung moo myiyi: nu" dayug luglheing: daloem: ri yu wigi vang khyam: atho' mo du" khyo' kaid lho: nyang: ri said pyam bye: zi nghoid. Hougsu" nghoid ri ciwim yoomo nanu" vang khyam: khyoo: tain" tain" yhe: boem ago" lha"? ga: khokham nang ri myid: nghoid rigi ?Nyang: ri re" gyizoug: Uria we' said pyam zi shoug" bye:? ein: tid we'? ga: tid da:.
22 Houg: yoomo lagyoo: phoo we' David jhang yhe: wigi Yoab nyang: ri amyeing" byid: pyeung: kaid ziyo' dayhang: ti" tid kyoo" bye:.
23 Nyang: gi ?Ngoonu" da" gyivoo yigi ngoonu" tho' je yoem: bo nyid ziyo' pa: mo ngoonu" ri khaid zain: wa ga: voomoo" mo thu lo boem ago". Nghoid loug we' nyangnu" ri voomoo" yam vang" khoem" ju" sho' doem yo" khaid tau" kaid bye:.
24 Hau: thang: vang khyam: mo nyangnu" ngoonu" ri myoo: wigi lhoem: beig yoomo nang aseing: da" gyizoug: yi mo dayham" said pyam zi shoug" bye:. Re" gyizoug: Uria we' said pyam zi shoug" bye:? ga: tid kyo" da:.
25 David gi hau: lagyoo: phoo ri ?Meing: zain: joyoo moo hang" shid: wa ziri hang" we' ayo" tid yoomo Yoab ri yoem: ashoin: ein: nyang: ri yoem: yhe: byid: we'. Yoem: kaid wigi voomoo" ri zain: lho: hau: ziri seing: yu ge? ein: yhe: tid we'.
26 Bathsheba gi nya: yhoem: seing: phoo said pyam zi shoug" bye: ga: ziri shoug" gyoo: lang" nyang: gi nya: shid re" nheig koug nheig nge zi shoug" nyid da:.
27 Akhid" Bathsheba nheig koug nheig nge zi lid loo" lang" David nyang: ri khokham vang" khyoo: khe: yu bye:. Nyang: gi khokham da" yhoem: seing: myhi' bue" loo bye: ziyo' nyang: ri yuggi zoo: dayug khu: byid: bye:. Nghoid loug we' Aseing gi David bain koid bye: da" moo" zoo" ri ayu" vhoo: bue" nyid bye: zi nghoid.