8
Samuela mang: lo" uri nyang: gi nya: zoo: tang: ri Israela byumyu" yi da" tarha" agyi koid nhang: to" da:. Gyi: yug rigi Yoela ga: myheing wigi nge yug rigi Abiya ga: myheing to" ziyo' nya: eig yug gi Berasheba joyoo moo tarha" agyi zheung: koid nyid ago". Nghoid loug we' nya: tang: gi nya: pho da" leig ri acang loo: za: ngei myo, no, da" moo" zoo" moo za: nheig dab nyid boem ago". Khougvhoid jhungshug joem ri nya: eig yug khab yu nyid yoomo jo eung: khyo" moo" zoo" ri ayo" tid phyed byid: nghoid ago".
Hau: thang: Israela byumyu" yi da" vhujhung: yi dangain" coem' zeung: foem: boem wigi Rama moo nyid da" Samuela jhang khyoo: yhe: wigi �Yu" we' nang gi mang: lo" nyid bye:. Re" zoo: eig tang: we' re" leig ri acang goo" nghoid da:. Hougsu" nghoid yoomo gootu: mungdain: bang: ri yhang: ti" ngoonu" ri vhoebkhang" wa shid re" khokham dayug ca" nyid yoomo khokham dayug tang: byid: we'� ga: zheung: mho' boem. Khokham dayug ca" ga: wigi mho' lo boem ziri Samuela gi agyo: vhoo: yoomo Aseing jhang khyoo: nyang: gi akyu" mho' yoomo Aseing tid zigi �Byumyu" yi nang ri tid lo da" khyoo: dangain" ri nang tam" gyoo: byid: we'. Nyangnu" he: pyam zigi nang ri anghoid nyangnu" da" khokham nghoid da" ngoo ri he: pyam nyid zi danghoid nyid. Ngoo gi nyangnu" ri Egutu mung" mo shu" thu lo nyid" mo wigi nyangnu" gi nga" jang" mo lheung: thu lo" byug boem lho: gootu: da" yu phara" joem ri loem khau: noku lo" byug boem bye:. Ngoo ri nyangnu" khanham we' hougsu" koid nyid yhang: ti" akhid" nang ri we' hougsu" koid nyid boem abye: go". Hougsu" nghoid yoomo nyangnu" da" dang: ri tam" gyoo: we'. Nghoid loug we' nyangnu" da" khokham gi nyangnu" ri khasu" koid loo wa ziri nyeing" za: phuid: kyo" wigi nyangnu" ri thain" thain: zid" nhang: we'� ga: tid bye:.
10 Samuela koem' gi khokham mho' nyid da" byumyu" yiri Aseing gi nyang: ri tid kyo" gu: dangain" ri tid kyoo" bye: zi nghoid. 11 Samuela gi �He: zigi nanu" da" khokham nanu" ri khasu" koid wa ga: da" zi nghoid. Nyang: gi nanu" da" yuggi zoo: yiri gyizoo: koid nhang: wigi gootu: rigi myang: dab khyoo: vang nhang: wa zi nghoid. Hau: lho: dayham" rigi nya: da" gyi myang: rheing" shid moo tang" loo" nhang: wa zi nghoid. 12 Nyang: gi houg: bang: mo dayham" ri byu dakhyeing" ri vhoebkhang" da" moo" voin bang:- byu wim: xi: ri vhoeb da" moo" voin bang: koid nhang: wa zi nghoid. Nanu" da" nya: zoo: yiri gi nya: da" yoothung" ri phug nhang:- shivoo: ri yham" nhang:- nya: da" gyizi gyikhoo: koid nhang: ziyo' nya: myang: rheing" zuang shid re" ca" gu: ri koid nhang: wa zi nghoid. 13 Nanu" da" myiyi: zoo: yiri gi nya: da" shid re" nam pyo: ja: koid nhang:- voem: jhoug nhang: ziyo' zooyho' joem ri kang: nhang: wa nghoid. 14 Nyang: gi nanu" da" ge thang da" yoothung" yoo joem yo' zabyid khyam: joem zhainloin: khyam: joem ri lhoid yu wigi nya: moo" voin bang: ri byid pyam wa zi nghoid. 15 Nyang: gi nanu" da" shivoo joem yo' zabyid shi" joem ri daxi: boem mo daboem ri nya: da" tarha" yung" mo moo" voin bang: yo' gootu: moo" voin bang: shid re" khyu: yu wa zi nghoid. 16 Nyang: gi nanu" da" dei zoo: joem ge thang da" nanu" nu: joem yo' loo zei: joem ri lhoid yu wigi nya: shid re" moo" zei: nhang: loo wa zi nghoid. 17 Nyang: gi nanu" da" yang yo' coidbaid joem mo daxi: boem mo daboem ri khyu: yu wigi nanu" nyang: we' nya: da" dei zoo: yi bue" loo" goo" wa nghoid. 18 Hau: ayo, ju" loo: lang" nyang: gi nanu" nyang: khyen: yu da" khokham nghoid yoomo kyid: kyid: khoo" sho' nheig no wigi myeing" myo: nyid nghoid loug we' Aseing: gi nanu" myeing" myo: nyid da" dang: khoin" joem ri tam" gyoo: byid: loo: wa zi anghoid� ga: wigi tid poin" kyoo" bye:. 19 Byumyu" yigi Samuela da" dang: ri atam" gyoo: loo: za: �Anghoid o"- ngoonu" khokham dayug vho:- 21 Houg: yoomo ngoonu" ri: vhoebkhang" wa da" ngoonu" seung: da" khokham yo' dage" ngoonu" ri: vhu" she: lho: gyi khaid meing: zain: yhe: lo" nghoid rigi ngoonu" gi gootu: da" byumyu" yi yo' du boem wa nghoid� ga: tid nyid boem. 22 Aseing gi �Nyangnu" vho: khyo" koid byid: wigi nyangnu" ri khokham dayug byid: wa� ga: tid da:. Hau: thang: ri Samuela gi Israela byumyu" yi dangain" mo, ri yhoem: khyoo: doem loo" nhang: kaid bye:.