5
Philisti byumyu" yigi hau: Dang: Theing Kuid: ri shoug" lhoid yu lo" thang: ri hau: ziri Ebeneza mo zi nyangnu" da" voomoo" Ashdod khyoo: ci: lo" ago". Nyangnu" da" yu phara" Dagon ri to" to" da" yhoem: khoug: khyoo: ci: vang lo" wigi nya: soolhoo: anam moo to" to" ago". Thang: nab kyoo' no' ri Ashdod byu yi to' yu" kaid ri Aseing da" Dang: Theing Kuid: shidkhoin" moo Dagon soolhoo: gi myidjang khyoo: myonhoo: shu: lho: leung gyo" jo, ziri myang ago". Hougsu" nghoid yoomo nyangnu" gi hau: ziri doem tu: to' lho: nya: joyoo moo doem to" too" bye:. Hau: thang: nab kyoo' nab soin: ri we' hau: soolhoo: gi Dang: Theing Kuid: shidkhoin" moo leung gyo" jo, ziri doem myang ago". He: lheing: gi vhuloem yo' lo, eig loem: zi gyau: gyo" wigi khoem" duang: khyoo: moo leung jo, da:. Gung du kyeing" dajo, jo, lo. ( Hougsu" nghoid nyid yoomo Dagon khainjung joem we' Ashdod voogung mo hau: soolhoo: ri no' mo, dangain" gi akhid" nyid" ju" sho' hau: joyoo moo ayhe: nang: loo: goo" nghoid da:.)
Aseing gi Ashdod voobyu yiri gye" thain: da" dam byid: bye:. Nyang: gi nyangnu" ri we' nyangnu" da" ayam aqei: moo nyid da" byumyu" yiri we' shoo" pu' shoo" cab byeing myug nhang: khyo" wigi nyangnu" ri dam kaid bye:. Bue" loo bye: da" khyoo: ri nyangnu" myang lang" nyangnu" gi �Israela yi Mangsoo gi nyhang" ri we' nyha" da" yu phara" Dagon ri we' dam byid: nyid bye:. He: joyoo moo Dang: Theing Kuid: ri ngoonu" yo" too" loo: wa zi anghoid� ga: tid nyid ago". Hougsu" nghoid yoomo nyangnu" gi lagyoo: yiri nhang: kaid wigi �Philisti khokham wim yug ri khe: zheung" to" lho: nyangnu" ri Israela byumyu" yi da" Mangso Dang: Theing Kuid: ri nyhang" khasu" koid wa lha"� ga: myid: go" nyid.
Nyangnu" gi �Hau: ziri Gad voogung moo yhe: too" ge'� ga: tid kaid lang" nyangnu" we' hau: ziri Philisti yi da" voogung daloem: nghoid da" Gad voogung moo yhe: to" too" bye:. Nghoid loug we' hau: Kuid: houg: moo ju" jo, thang: ri Aseing gi hau: voogung moo we' gyoug dain' pho" noo phyoo" ri byid: bye:. Hau: voogung moo nyid da" byu nge zoo: gyi: zoo: dangain" ri shoo" pu' shoo" cab bui" nhang: da" byeing no dam ri kaid byid: bye:. 10 Hougsu" nghoid yoomo nyangnu" gi gootu: Philisti voogung nghoid da" Ekron voogung khyoo: hau: Dang: Theing Kuid: ri byid: kaid ago". Nghoid loug we' Kuid: gi houg: moo ju" lo" da" uri byumyu" yigi �Ngoonu" ri said pyam wa ga: Israela byumyu" yi da" Mangso Dang: Theing Kuid: ri nyangnu" hid: khyoo: ci: ri goo" nhung:� ga: yoid ngau nyid ago". 11 Hougsu" nghoid yoomo nyangnu" gi Philisti khokham yiri doem zheung: khe: yu wigi �Israela byumyu" yi da" Dang: Theing Kuid: ri nya: joyoo xoug" moo lo" doem too" byid: loo shang. Houg: lang" nyhang" ri we' nyha" da" ikoin deungkhu: byu yiri we' hau: ziyo' yo" said pyam wa zi anghoid� ga: tid nyid boem ago". Mangsoo gi nyangnu" ri gye" thain: da" dam kaid nyid yoomo voogung goin" dain ci' nyid ago". 12 Ashid: shi" bang: we' shoo" pu' shoo" cab bue" byeing myug boem wigi nyangnu" gi bo pang" wa shid re" nyangnu" da" yu phara" ri yoid ngau nyid boem.