1 Akhid" Sholu gi Philisti byumyu" yiri yhe: khaid zain: jang" mo doem loo lang" David gi Engedi anam mo kyoem: khoug: cang nyid yen" ga: ziri tid kyo" boem ago". 2 Sholu gi Israela byumyu" gyizoo: mo ge thang da" gyizoo: soem: khyeing" ri shu" wigi Layo: Lug Pyo' da" bid thu' shoid khyoo: David yo' nya: byu yiri cang shoo: bye:. 3 Nyang: gi khyoo: yam mo yang khoem: dayham" yo' tab tab moo jo, da" lug Khyung: daloem: moo dougnoo: wa ga: vang loo" khari" da:. David yo' nya: byu yi we' hau: lug ug da" akhoug: moo: nyid nyid boem ago". 4 Houg: lang" nyangnu" gi nyang: ri �He: zigi re" shid re" akho: akhang" nyang: nghoid bye:. Hau: Aseing gi re" gyivoo ri re" lo, moo: ab byid: wigi nyang: ri nang vho: khyo" yo" koid wa ga: nang ri tid too" bye: zi nghoid� ga: tid ago". Houg: yoomo David gi lo, doo: doo: re" wigi Sholu ri asi' nhang: sho' nya: byisheing: dadu ri yham" ceing yu bye: da:. 5 Nghoid loug we' hau: thang: ri David da" myid nheigloem: gi nyang: ri pyi: sho: lo wigi 6 Nyang: gi nya: byu yiri �Hau: Aseing khyen: too" bye: da" khokham- nga" Aseing ri noo nhang: da" cite" moo" zoo" mo nghoid nghoid hau: Aseing ngoo ri toem pyam byid: baja" o". Nyang: gi Aseing khyen: to" da" khokham nghoid nyid yoomo ngoo nyang: ri dajhi' we' yo" noo: nhang: wa zi anghoid� ga: tid bye:. 7 Hougsu" nghoid yoomo Sholu ri nyangnu" akhaid said wa khyoo: ri David gi nya: byu yiri se' gyoo: sho' tid kyoo" bye: zi nghoid. Sholu gi to' wigi lug khyung: mo thu' lo wigi doem xo' so" yhe: loo" bye:. 8 Hau: thang: David gi nyang: thang: moo: cang thu' lo wigi nyang: ri �Aseing: khokham we"� ga: khe: kaid bye:. Houg: lang" Sholu lheing: yu" kaid uri David gi myidgung khyoo: phau" myang: ziyo' goeb pid byid: lho: � 9 Ngoo khyo" nang ri noo nhang: shid re" yoem: kaid nyid ga: byu yi tid ziri nang ciwim yoomo tam" gyoo: lha". 10 Akhid" za: lug khyung: moo hau: Aseing gi nga" lo, khoug khyoo: nang ri ab byid: bye: ziri re" gung nyang: shau" myang wa bye: zi nghoid. Nga" byu yi dayham" bang: nang ri said pyam wa shid re" tid boem ago". Nghoid loug we' nang gi khokham bui" wa shid re" hau: Aseing khyen: too" bye: yug nghoid yoomo ngoo nang ri dajhi' we' nhoo ashau" baja" ein: re" shid re" nheig koug ziyo' kham zo: nyid zi nghoid. 11 Yu" we' nga" phoo we"- akhid" ngoo ci: nyid da" re" atho' byi: pain" cu' thang: ri yu" yu" we'. Ngoo nang ri yo" said pyam zi za: nghoid da:. Nghoid loug we' hougsu" koid wa gungthid he: pain" cu' du za: dayham" yu zi nghoid. He: ziri yu" wigi ngoo nang ri gyi koid wa shid re" amyed yen" ein: ziri we' nang ri anhoo nhang: nau ein: ziri we' nang ri si' nhang: nau zi nghoid. Ngoo gi nang ri ashoid yu" nghoid loug we' nang gi ngoo ri said pyam wa shid re" sho: yen" da:. 12 Nyha" tang: mo shoid yug ri Aseing dam byid: baja". Ngoo nang ri dajhi' we' anoo nhang: wa zi nghoid yoomo ngoo ri thougtheung da" moo" zoo" nang koid da" shid re" koem gi nyang: nang ri dam byid: baja". 13 Shidphyang" da" dang: khyang" moo �Age da" moo" zoo" ri age da" byu yi dakoid� ga: tid da" dang: khoin" ri we' nang se' nyid zi nghoid. Hougsu" nghoid yoomo nang ri ngoo anoo nhang: wa zi nghoid. 14 Israela khokham phoo ciri said wa ga: yoem: kaid yen" ziri yu" yu" ge'. Lakhuid shid: mang la'- khoo" lhid" la'. 15 Nyha" tang: mo hang" shoid ga: ziri hau: Aseing dang: phyed wigi ngoo ri khoem yu wigi re" lo, mo we' khyoid yu baja" o"� ga: wigi tid da:.

16 David dang: bain tid lang" Sholu gi �Nga" zoo: David we"- hau: zigi nang moo gyeing" nyang: nghoid nyid la"� ga: tid lho: nyang: nyho: ngau nyid da:. 17 Hau: thang: nyang: gi David ri �Nang koid zi jo da- ngoo gi shoid nyid da:. Ngoo nang ri houg yhang: ti" shoid da" moo" zoo" ri koid nghoid loug we' nang koem gi ngoo ri gye" ge khyo" koid nyid da:. 18 Aseing gi ngoo ri re" lo, khoug moo: ab byid: bye: nghoid loug we' nang ngoo ri asaid pyam yoomo nga" adang moo nang khayhi' ge nyid ziri akhid" nyid" nang ci: shug bye: zi nghoid. 19 Byu gi nya: gyivoo khanhoo' lheing: shoug" myheig nghoid loug we' noo ashau" nhang: lho: za: nhang: kaid go" lha". Akhid nyid" nang ngoo ri koid byid: bye: moo" zoo" yoomo Aseing nang ri mainkaid byid: baja" o". 20 Akhid" nang gi Israela khokham bui" wa zi nghoid ziri we' hau: mung" dain gi nang vhoeb khang" da" akhoug moo xo' wigi geing: teing jo, wa ziri we' ngoo gyeing" nyang: se' nyid da:. 21 Nghoid loug we' nga" myeing ri we' nga" ikoin deungkhu: myeing ri we' bain sho' ato" myhed pyam goo" baja". Nga" akung: ako'' joem ri bo teing too" wa shid re" Aseing da" myeing khyang" moo ngoo ri dangsoo" byid la o"� ga: tid da:. 22 David we' nyang: pyeing byid: wa ga: dangsoo" byid: bye:. Hau: thang: Sholu gi yhoem: khyoo: tau" loo" khare" wigi David yo' nya: byu yi we' nyangnu" gau" nyid da" joyoo khyoo: tau" loo" khari" bye:.