21
David gi khainjung Ahimeleg nyid da" Noba voogung khyoo: yhe: loo" bye:. Ahimeleg we' nyang: yo' shoug" goo" wa shid re" gyoug dain ziyo' thu' yhe: wigi �nang nyang: kyeing" he: joyoo khyoo: ciwim re" la"� ga lhoem: myid: bye:.
David gi �khokham moo" zoo" yo' he: joyoo khyoo: ju" re" zi nghoid. Nyang: ngoo ri koid nhang: da" moo" zoo" hang" ri we' asi' nhang: ga" wigi pyeung: kaid da:. Akhid" nga" byu yiri koem gi tid go" to" da" joyoo moo: ngoo yo' shoug" goo" wa shid re" nyangnu" ri tid too" bye: zi nghoid. Akhid" re" jang" moo khayhang te" da" zoo: shug jo, la". Ngoo ri zooyho' wim: loem: nghoid nghoid gootu: nang yo" zi cinghoid nghoid byid: we'� ga: tid.
Khainjung phoo gi nga" jang" moo ajang" zo: zooyho' ajo,. Gyeung" shang da" zooyho' dajo, da:. Re" byu yi he: gyoo: moo myiyi: zoo: yi yo' gung shoo" zoem" khau: khyoo: akoid nghoid rigi nang yo" zoo: wa zi nghoid.
David gi �Nyangnu" gyeing" nyang: akoid wa zi nghoid. Nga" byu yigi khanham we' agoin: za: thu' so" yen" uri lang" nyang: yug nyang: gung ri gyeung" shang: za: dazheing: nyid zi nghoid. Hid: su" gooki lid wigi thu so" yen" da" ayo, rigi je" wigi gyeung" shang: nghoid nyid wa anghoid la"� ga: doem phoug tid da:.
Houg: yoomo khainjung yug gi Mangsoo ri xoin" to' da" gyeung" shang: zooyho' kyeing" yoo" yoomo hau: da" zooyho' ri David jhang byid: bye:. Hau: gyeung" shang: da"' zooyho' khoo: moo gi zooyho aseig doem ke" too" byid: bye: zi nghoid.
(Hau: bidnyid ri Sholu da" gougnyhoug zung" su: Edom byumyu" Doeg we' noku thung" yo' sen: da" moo" zoo" ri re" pyeing yoomo hau: joyoo moo: nyid nyid da:.)
David gi Ahimeleg ri �Ngoo ri yo" byid: wa shid re" re" jang" moo sham: yo' lham: ajo, la". Khokham phoo hidsu" ahain: agyoin ngoo ri thu' yi: wa da" amyeing" byid: kaid yoomo nga" sham: yo' gootu: gyizi gyikhoo: yu ci: wa da" ayo, ayo" byug loo: nghoid da� ga: tid da:.
Ahimeleg gi �Ela lang: khung" moo nang said pyam da" Philisti byu Goliad da" sham: yo" da:. Hau: ziri pain" cu' yo' thoeb wigi xoin" ngei" byizuang da" avhoo: moo jo, jo, da:. He: joyoo moo gyizi gyikhoo: ein: zigi hau: zi kyeing" dajo, yoomo nang vho: nghoid rigi yu loo" we'� ga: tid da:.
Houg: lang" David gi �khamoo: we' houg yhi ge da" sham: gi ajo, loo: hau: zi ngoo ri byid: we'� ga: wigi tid da:.
10 David gi Sholu jang" mo phang: thu' loo su: nghoid yoomo nyang: gi thu' lo" wigi Gad khokham Akhisha jhang khyoo: yhe: loo" khari" bye:. 11 Khokham da" moo" voin bang: gi Akhisha ri: �he: da" David gi nya: mung" dain mo khokham anghoid rhe". He: yug da" khyoo: ri myiyi: zoo: yi go" wigi jikhoin" khoin" zigi khyeing" khyeing" said pyam zigi Sholu- moin moin said pyam zigi David� ga wigi tid kyoo" bye:.
12 Nyangnu" tid da" dang: gi David da" myid moo: gye" zang" nhang: yoomo khokham Akhisha ri gye" gyoug nyid da:. 13 Nyangnu" lheing khab to" ri David gi koo" mhau mhau wigi koo" moo" zei: shoug lho: nyangnu" nyang: ri zei: zeing lang" voomoo" khyam: khoem" joem ri lhid" kyuang wigi nya: nhoid mei: cang shakain" lhu" lhu" koid ci: da:. 14 Hougsu" yoomo Akhisha gi nya moo" voin bang: ri �Yu" ge' Hau: yug gi koo" su: danghoid da:. Ciwim yoomo nga" jhang khyoo: shu" loo go" la". 15 Ngoo koo" bang: ri avho: ziri asi goo" rhe". Nga" yhoem: khoug moo: nya: ko" da" avoid asam" yo' ngoo ri nheigloem: yoin nhang: wa shid re" ciwim yoomo shu" vang loo go" la"� ga: tid abye:.