19
1 Sholu gi David ri said wa khyoo: ri nyang: soin' nyid ziri nya: zoo: Yonathan yo' nya: moo" voin bang: dangain" ri tid kyoo" bye: zi nghoid. Nghoid loug we' Yonathan gi David ri gye" jheddab yoomo
2 Nyang: gi David ri �nga" phoo gi nang ri said wa shid re" soin' nyid zi nghoid. Jeju" mo nab kyoo' nang zid" lho: nyid we'. Goug: da" joyoo dakhyi' khyi' moo gau" wigi nyid nyid we'.
3 Nang gau" jo, da" pa: cang nga" phoo da" anam moo yhe: yab jo, wigi re" da" khyoo: ri ngoo tid kyoo" wa zi nghoid. Ngoo daja: ja: shoug" se' nghoid rigi nang ri ngoo doem si' nhang: wa zi nghoid� ga: tid kyoo"
4 Yonathan gi David da" ge khyoo: ri fu" wigi Sholu ri �Aseing we"- Re" join David ri aze" shoid goo" o"- nyang: nang ri khanham we' ase' shoid nghoid da:. Nang ri ngeig da" khyoo: we' akoid nghoid da:. Nyang: koid bye: khyoo: dangain" zigi nang ri pang" thoug khyoomoo" zeing daloem danghoid nyid da:.
5 Nyang: gi nya: kangso' ri ab wigi Goliad ri said pyam bye: yoomo Israela byumyu" yiri Aseing gi oung: pui" zeing byid: bye: zi nghoid. Hau: khyoo: ri nang myang uri nang gau yi ung: pyo nyid bye: zi nghoid. Hougsu" nghoid ziyo' he: yooboo ci: ashoid- ce: yooboo we' adab su: David ri yooboo ayo" jang" moo ciwim yoomo nyang: ri said pyam nau nyid la"� ga: tid bye: da:.
6 Yonathan tid da" dang: joem yoomo Sholu myid gyeing: lo wigi nyang: David ri asaid loo: ga: Aseing da" myeing moo: dang: theing koid too" bye: zi nghoid.
7 Hougsu" nghoid yoomo Yonathan gi David ri khe: yu wigi hau: khyoo: dangain" ziri tid kyoo" bye: zi nghoid. Hau: thang: Yonathan we' David ri Sholu jhang khyoo: shu" lo lho: shid ri koid yhang: ti" khokham ri dei byid: bye: da:.
8 Philisti bang: yo' meing doem zain: go" boem bye: ago". David gi nyangnu" ri khaid zain: wigi bain sho' ri oung: pyam lang" nyangnu" we' phang: lo" byug bye:.
9 Danyid" da" bidnyid ri Aseing jang" mo age da" yu Venyi: gi Sholu ri re" vhoebkhang" nyid. Sholu gi nya: lo, moo: lham: ri ci: wigi nya: yhoem: moo: zhung jo, uri David we' hougmoo: nyid lho: teing baid nyid.
10 Sholu gi nya: lham: ri David jhang eung: eung: koid wigi pyiyam khyoo: goin kaid nghoid loug we' David lhid pyam yoomo pyiyam moo lo" goin zhug to" da:. David gi tang" phang: loo" khari" bye:.
11 Hau: myen rinyang: Sholu gi nya: byu yi dayham" ri David da" yhoem: ri zung" yu" nyid wigi nab soin: ri nyang: ri said pyam wa shid re" nhang: kaid bye: zi nghoid. David da" yhoem: seing: myhi Mikhala koem gi nyang: ri �nang akhamyen aphang: thu' loo" nghoid rigi nang nabkyoo shid: wa zi nghoid� ga: nyang: ri zid" nhang: bye: zi nghoid.
12 Mikhala gi nyang: ri bangzoo: khoem" khyo" tei" mo teishoid shoid khyo' kaid wigi phang: loid lo" byug bye: zi nghoid.
13 Hau: thang: nyang: gi yhoem: moo: no' da" yu phara" soolhoo: ri yu wigi yhoeb yoo moo lheing: to" lho: coidbaid moug" yo' koid da" vhukhug thung: daloem: ri hau: da vhoem" thung moo to" wigi mi foid too" byid: bye: da:.
14 David ri myheig wa ga: Sholu da" byu yi ri" lang" Mikhala gi �David no nyid� ga: tid kyoo" bye:.
15 Nghoid loug we' Sholu gi David ri yhe: doem yu" wa shid re" byu nhang: kaid wigi nyangnu" ri �nya: yhoeb yoo yo' dage" hid khyoo: vu, loo ge' ngoo nyang: ri said pyam wa zi nghoid� ga: amyeing" byid: kaid da:.
16 Nyangnu" khoug: lhoung khyoo: vang lo" wigi yu" yu" uri yhoeb yoo moo yhoem: moo: no' da" yu phara" soolhoo: yo' vhoem" thung shoid mo coidbaid mau" vhukhug thung: ri yhe: myang boem ago".
17 Sholu gi Mikhala ri �Ciwim yoomo nang ngoo ri hid: su" mhau' wigi nga" gyivoo ri loid byoin nhang: kaid la"� ga: tid. Nyang: gi �Ngoo nyang: ri loid byoin loo" sho' akoid nghoid rigi nyang: ngoo ri said pyam wa ga: tid� ga: doem phoug tid bye:.
18 David gi phang: loid: lo" wigi Rama voogung moo nyid da" Samuela jhang ju" lo" lho: Sholu nyang: ri khasu" koid ziri dangain" nyang: ri lo" tid kyoo" bye:. Hau: thang: nyang: yo' Samuela gi Nayud khyoo: yhe: wigi hougmoo: yhe: nyid nyid ago" da:.
19 David gi Rama Meing: Nayud voogung moo nyid nyid ziri Sholu shau" gyo: wigi
20 Nyang: ri yhe: myheig yu wa shid re" byu dayham" ri nhang: kaid bye: zi nghoid. Houg: lang" nyangnu" gi Samuela vhu" she: wigi jikhoin" khoin" wigi go" nyid da" lapi: daphung: ri yhe: myang bye:. Hau: thang: Mangso da" Venyi: Sholu da" byu yiri vhoebkhang" wigi nyangnu" we' jikhoin nyho: khoin" lho: go" shid" lo" boem ago".
21 Hau: khyoo: ri Sholu shoug" gyoo: lang" lagyoo: joem ri doem nhang: kaid bye:. Nyangnu" we' go" wigi Jikhoin" nyho: khoin" shid" loo bye:. Soem" lheing: ein: lheing: lagyoo: yiri doem nhang: kaid ri we' hougsu" za: dabue" nyid da:.
22 Hau: thang moo nyang: gi: Rama voogung khyoo: thu' loo bye:. Nyang: gi Sekhu mo gyid thung" khayhi' te" jang" moo ju" lang" Samuela yo' David khamoo: nyid ziri myid: yu" ri nyangnu" Nayud moo nyid ga: lhoem: tid kyo" boem ago".
23 Hau: joyoo moo nyang: yhe: yu" ri Mangso da" Venyi: gi nyang: ri vhoeb khang" yoomo Nayud khyoo: yhe: da" khyoo: dakhaid goin" jang" moo go" lho: Jikhoin" nyho: khoin" wigi yhe: loo" bye: zi nghoid.
24 Nyang: gi nya: byimi joem ri khyoid pyam wigi Samuela da" shidkhoin" moo go" wigi Jikhoin" nyho: khoin" nyid da:. Hau: nyid" nyid" goin" hau: myen myen goin" shoocen: doem: nyid nyid da:. (Hougsu" nghoid yoomo �Sholu we' lapi: bue" loo bye: nhung: la"� ga: dang: khyang" kyo" tid lo boem bye:.)