18
Sholu yo' David dang: bain doem go" thang: ri Sholu da" nya: zoo: Yonathan gi David ri gye" nheig dab wigi nya: gung yo' dayhang: ti" re" jheddab yu bye:. Sholu we' hau nyid" mo zi David ri nyang: yo' dage" nyid wa khyoo: ri toem to" wigi nyang: ri yhoem: khyoo: loo" wa akhang" abyid: nghoid da:. Yonathan gi David ri gye" jheddab yoomo nyang: yo' dapyaid datoo: byencang" koid wa shid re" dang: theing too" bye:. Nyang: gi nyang: void ci: da" byisheing: ri khyoid yu wigi hau: ziyo' dage" nyang: void ci: da" gyi byimi sham:- lid: yo' phyid" cu" joem ri David ri khyoid byid:. David gi Sholu wigi nyang: ri nhang: da" moo" zoo" dangain" oungdoid yoomo Sholu gi nyang: ri nya: gyidab mo gyizoug: koid nhang: to" da:. Hougsu" yoomo Sholu da" moo" voin bang: yo' byu yi dangain" gi yu" gau nyid boem.
Akhid" David Goliad ri said pyam lho: gyizoo: yi yhoem: khyoo: doem phang: lo uri Israela voogung dangain" jang" mo myiyi: nu" yi Sholu ri tau yu wa ga: re" lo boem ago". Nyangnu" gi zeing baid mang" thung" teing baid wigi ngei ngei pyoo: pyoo: jikhoin" khoin" lho: go" nyid boem. Hau da" nyangnu" ri coung" nghei da" pui" moo myiyi: yigi �khyeing" su: said da" Sholu- moin su: said da" David� ga: khoin" boem ago". Hau: ziri Sholu agyo: vhoo: yoomo nyang: gi gye" nheigloem: yoin lo. Nyang: gi �David shid re" gi moin su: su: nghoid loug we' nga" shid re" gi khyeing" su: za: tid wigi jikhoin" khoin" zigi nyangnu" gi nyang: ri thang: lheing: da" khokham koid nhang: wa zi nghoid� ga: tid bye:. Hau nyid" mo zi David ri yu" zo ziyo' aloem" byug khari" loo: nghoid da:.
10 Thang: nyid" ri Mangso jang" mo age da" yu Venyi: gi Sholu ri nyeigdain tung" re" vhoebkhang" kaid yoomo nya: yhoem: khoug: moo byukoo" dayug yhang: ti" agyeing: asoo" wim nyid da:. David gi nab khang" nab koid nyid yhang: ti" teing baid nyid uri Sholu gi lham: dakhaid ci: nyid da:. 11 Ngoo nyang: ri pyiyam moo thau" kyang tab too" ba ga: nyang: nheig khoug moo: myid nyid ziyo' David ri eig lheing: nyang: lham: yo' goin nghoid loug we' lheing: khang" moo" David lhid pyam pyam koid da:.
12 Sholu ri she: pyam bye: da" Aseing gi David yo' dage" nyid yoomo Sholu gyoug nyid da:. 13 Hougsu" nghoid yoomo Sholu gi nyang: ri byu dakhyeing" ri vhoeb nhang: wigi nyang: ri vi: khyoo: nhang: kaid bye:. David gi nya: byu yiri vhu" she: lho: meing: zain: jhang" khyoo: yhi: loug we' 14 Nyang: gi Aseing yo' dage" nghoid nyid yoomo nyang: koid zi dangain" oung: doid nyid da:. 15 David koid da" moo" zoo" dangain" zi oung: doid nyid khyoo: ri Sholu shoug" gyoo: lang" nyang: ri je" gyoug nyid. 16 Nghoid loug we' David gi oung: doid da" vhujhung: nghoid nyid yoomo Israela yo' Yuda byumyu" khang" moo" nyang: ri jheddab nyid boem.
17 Hau: thang: Sholu gi David ri �he: zigi nga" zoo: bi: moo" Merab nghoid. Nang gi nga" shid re" seing" yang" ziyo' dang: zung" bo wigi hau: Aseing da" meing: zain: jang" moo bo vang zei: bye: yoomo re" yhoem: seing: myhi koid wa shid re" ngoo nyang: ri byid: wa zi nghoid� ga: tid da:. (Sholu koem gi hid: su" wigi nya: gung nyang: ayhe: zang" loo: za Philisti byu joem David ri said pyam goo" baja" ga: myid da" khyoo: nghoid nyid da:.)
18 David gi �ngoo khokham phoo da" zoomo, yo" bue" loo wa zigi ngoo hang" nghoid lho: nga" ikoin deungkhu: khasu" zi nghoid nyid la"� ga: doem phoug tid bye:. 19 Nghoid loug we' Merab ri David jhang byid: zhoo" wa da" ayo, ju" loo lang" Meholathi mo Adriela jang" moo thoo' zo: pyam bye: zi nghoid.
20 Sholu da" myiyi: zoo: Mikhala koem gi David ri jheddab myid bo nyid zi nghoid. Hau: khyoo: ri Sholu shoug" gyoo: lang" gye" gyo: gau nyid da:. 21 Nyang: gi �Mikhala ri David jhang ngoo byid: zhoo" wa zi nghoid. Nyang: ri myhi wa shid re" myiyi: zoo: ri ngoo ci: wa zi nghoid wigi Philisti byumyu" yi da" lo, mo said pyam zi nyang: shoug" wa zi nghoid� ga: nya: oung: khoug: moo: myid nyid da:. Houg: yoomo Sholu gi David ri �Nang gi nga" zoomo, bui" wa zi nghoid� ga: dalheing: doem tid da:. 22 Nyang: gi nya: zoug: yiri David jhang sam: zoo: tid nhang: zigi �Khokham nang ri vho: ngei nyid ziyo' nya: da" moo" voin bang: dangain" mo, we' nang ri yu" vho: nyid ago". Nya: zoomyi: nu" ri lo, xo' yu wa zigi akhid" uri re" shid re" ge thang ayo, nghoid bye:� ga: tid wa shid re" amyeing" byid: kaid bye:.
23 Houg: yoomo nyangnu" gi David ri hau: ziri tid kyoo" lang" nyang: gi �Khokham da" zoomo, bue" wigi gye reung: khyo" coung" wa ziri kham: yu wa zigi ngoo yhang: te" ci: anghoid ziyo' sho" jhen: su: shid re" sung gyi: da" moo" zoo" nghoid nyid da:� ga: doem tid da:.
24 Hau: zoug: yi we' David tid da" dang: ri Sholu ri doem tid kyo" boem bye:. 25 Sholu gi David ri �Khokham re" jang" mo vhoo: nau gu: dangain" zigi nya: gyivoo yiri latoo: yo" phug byid: sho' said wigi shid: byug bye: da" Philisti byumyu" yi da" shooyid thang: dashoo: ri phoug" soin: byid: wa� ga: tid kyoo" wa shid re" nyangnu" ri amyeing" byid: kaid bye:. (Hau: zi we' Philisti byumyu" yi da" lo, moo: David ri said pyam nhang: wa shid re" Sholu khoug lheing: lheing: da" khyoo: nghoid da:.) 26 Sholu da" zoug: yigi David ri Sholu citid zi dangain" ri tid kyo" wigi David we' khokham da" zoomo, bue" loo wa ziri myid yu" wigi myid gau nyid da:. Akhid" lo, xo' pui" aju" shi" uri 27 David yo' nya: byu yigi Philisti byumyu" byu eig shoo: yug ri yhe: said pyam bye: zi nghoid. Nyang: gi hau: shooyid thang: joem ri khokham jhang ci: lo" wigi hau: jhang dangain" ziri nya: shidkhoin" moo: nghab shug bye: yoomo khokham zoomo, nyang: bue" loo" bye: zi nghoid. Hougsu" nghoid yoomo Sholu gi nya: myiyi: zoo: Mikhala ri David yo' lo, xo' byid: bye: zi nghoid.
28 Sholu gi Aseing yo' David dage" nyid ziri we' nya: zoo: Mikhala nyang: ri jheddab nyid ziri we' nyheing" za: boin: so" nyid da:. 29 Houg: yoomo nyang: gi David ri je gyoug lo wigi nyang: kang so' dei nyid da" ayo, dangain" moo nya: gyivoo bue" nyid zi nghoid. 30 Philisti gyi yi re" said nghoid loug we' gootu: Sholu da" gyizoo: yi tho' David gi je wigi oung: doid nyid bye: zi nghoid. Hougsu" nghoid yoomo David gi je myeing gyi: su: bue" loo bye: zi nghoid.