17
Philisti byumyu" yigi meing: zain: wa shid re" Yuda mung" Sokho voogung moo zoebphung: yu wigi Sokho yo' Azeke agyoo: mo Ephe Damim ga: da" joyoo moo nyangnu" da" dab koid to" ago". Sholu yo' Israela byumyu" yi we' zoebphung: wigi Philisti byumyu" yiri lhoem: said wa ga: nyangnu" soin' to" da" Ela janggyoin: moo dab koid nyid boem. Philisti byumyu" yi dashoid khyo" boem moo yab jen to" wigi Israela byumyu" yi we' gootu: dashoid khyo" boem gung moo yab jen boem ago". Nyangnu" da" agyoo: moo langkhung" dakhung" kyo: jo, da:.
Gad voogung moo Goliad ga: su: gi Philisti dab mo thu' lo wigi Israela byumyu" yiri pyi: re" sho: nyid da:. Nyang: gi 9 pe: jain" myang: lho. myid: joid: koo: lid: da" gyid: mid" byimi void ci: wigi gyid: mid" mug zhung" ci:. Nya: khyid: moo gyid: mid" khyid: baid zhung" ci: wigi nya: kootho' moo gyid: mid" lham: toid vu, ci: da:. Nyang: ci: da" lham: toid lo, zei: gi yo, gain: pyoung" loem: yhi' bo wigi hau: da" joto' lham: fu' gi dakyen" koo: lid: da:. Nya: da" goo vu, byid: da" gyizoo: dayug nya: shidkhoin" moo so" nyid da:. Goliad gi yab jo, wigi Israela byumyu" yiri �nanu" houg: moo ciwim yoomo gyi said wa shid re" do, loo goo" la". Ngoo gi Philisti byu nghoid- nanu" gi Sholu da" join nghoid ago". Ngoo yo' said goo" wa shid re" nanu" da" byu dayug khyen: too" ge'. Nyang: ngoo ri oung: wigi yo" said pyam nghoid rigi ngoonu" nanu" da" join koid wa nghoid loug we' ngoo wigi nyang: ri oung: wigi yo" said pyam nghoid rigi nanu" ngoonu" da" join bui" wa zi nghoid. 10 Hid: moo akhid" ngoo Israela byumyu" seing" yang" da" gyizoo: ri pyi: sho: nyid. Ngoo yo' myonhoo: yu" zhug go" to" lho: gyi yo" said da" byu dayug yug khe: thu kaid yu" ge'� ga: nyho: nyid da:. 11 Sholu yo' nya: byu yi hau: ziri shoug" gyoo: lang" nyangnu" gyoug nain" nyid boem ago".
12 David gi Ephrad ga: da" Yuda mung" Bedlehem voogung moo nyid da" Yese da" nya: zoo: nghoid da:. Yese gi zooshang: shid yug yo" ziyo' Sholu khokham koid nyid da" pyaid ri nyang: gi gye" mang: lo" nyid bye: zi nghoid. 13 Nya: zoo: gyi: thang soem" yug gi gyi said wa shid re" Sholu jang" moo cang so" yen" boem bye:. Gyi: thang yug gi Eliaba- hau: thang: mo Abinadab yo' soem" yug ein: yug gi Shamma bang: nghoid boem ago". 14 David gi nge thang yug nghoid wigi nya: mang: bang: soem" yug Sholu jhang cang nyid uri 15 David gi Bedlehem khyoo: alheing: lheing: lo" wigi nya: phoo da" yang joem ri lhung lo" zung" byid: nyid da:.
16 Goliad gi bidnyid myid: xi: nyid" ju" sho' nab soin: myen" thang: Israela byumyu" yiri pyi: lhung re" shoo: shoo: koid nyid da:.
17 Danyid" nyid" da" ayo, akhyeing" ri Yese gi David ri �He: gug bug 4 bye:- he: zooyho' 10 ri ci: wigi dab moo nyid da" re" mang: bang: jhang khyoo: myab myab yhe: yu" we'. 18 He: da" nunoug" kyug khyi' daxi: loem: ri we' nyangnu" da" zoug: jhang khyoo: ci: yhi: byid: we'. Re" mang: bang: nyid nyid ziri yhe: yu" wigi nyangnu" yang" nyid la'- ayang" nyid la'- nyangnu" jang" mo daja: ja: lu dang: doem lo tid kyoo" we'. 19 Akhid" Sholu khokham- re" mang: bang: yo' gootu: Israela byumyu" yi dangain" Ela langkhung" moo nyid wigi Philisti byumyu" yiri meing: zain: nyid boem� ga: tid.
20 David gi thang nab kyoo' no' mo to' wigi yang joem ri yang zung" bang: dayug yug jhang ab too" kho lho: Yese nyang: ri tid to" ziyo' dayhang: ti" zoo: shug yu ci: kho' wigi thu' loo" bye:. Israela byumyu" yi meing: zain: pa: khyoo: thu' yhe: wigi gyi zain: zeug nyhoo: go" nyid da" uri dab khyoo: David ju" lo" abye:. 21 Philisti gyizoo: yi yo' Israela gyizoo: yigi nyang: cang" nyang: myonhoo: yu" zhug go" to" wigi gyi said wa shid re" soin lo" nyid boem bye: zi nghoid. 22 David gi nyang: voin lo da" zooshug joem ri zoo: shug gam su: ri byid: too" kho' wigi meing: zain: jang: moo nya: mang: bang: jhang khyoo: tang" yhe: lho: nyangnu" khasu" nyid da" khyoo: ri myid: yu" bye:. 23 David nyangnu" yo' dang: doem go" nyid ri Goliad gi shid khyoo: re" wigi shid moo koid lid loo bye: yhang: ti" Israela byu yiri pyi: re" sho: nyid da:. Houg: lang" David gi hau: thui: ri shoug" gyoo: bye:. 24 Israela byumyu" yi Goliad ri myang lang" gyoug wigi phang: lo" byug boem ago". 25 Nyangnu" dayug yo' dayug- nyang: ri yu" yu" ge'. Nya: da" pyi: sho: dang: ri we' gyo: yu" ge'. Sholu gi nyang: ri yo" said su: ri jhungshug moo" zeing we' nya: myiyi: zoo: ri we' lo, xo' byid: lho: hau: yug da" nya: phoo ikoin deungkhu: gi khang" doug akaid noo" wa ga: dang: theing byid: too" bye:� ga: tid go" nyid boem.
26 David gi nya: nam moo nyid da" byu yiri �Hau: Philisti byu ri said pyam wigi aphoug" akhyoid koid nyid da" jang" mo Israela byumyu" yiri khyoid yu lang" ce: noem yoo" wa ga: o". Dei nyid da" Mangsoo gyizoo: yiri thougtheung wa he: shooyid thang: ayham" da" Philisti byu gi khasu" te" yug nghoid lha"� ga: myid: bye:. 27 Nyangnu" gi nyang: ri he: Goliad ri yo" said pyam da" yug ri ce: noem byid: wa ga: ziri tid kyo" boem ago".
28 David yo' byu yi dang: tid go" nyid ziri David da" nya: mang: zeing Eliaba shau" gyo: da:. Hougsu" yoomo nyang: gi David ri nheig yoo: nau ziyo' �nang hid moo cire" koid nyid la". Re" yang joem ri kyoem pung moo hang" zung" yu" nyid la". Nang gi sho' ase' da" byu danghoid nhung:- meing: zain: ziri yu" ei" wa shid re" re" zi danghoid nhung:� ga: wigi tid bye:.
29 David gi �akhid" ngoo ce: noem koid shoid bye: la". Houg: yhang: ti" ziza: ngoo age myid: rhe"� ga: doem myid: bye:. 30 Xo' wigi nyang: gi goo" yug jhang lheing: lo" lho: hau: ziri doem myid: yu" ri nyang: myid: yu" khang" moo" shid ri yhang: te" kyeing" dashau" gyo: yu da:.
31 David ce: noem tid ga: ziri dayham" bang: shau" gyo: loo" lang" nyangnu" Sholu ri lo" tid kyo" wigi nyang: ri khe: yu bye:. 32 David gi Sholu ri �aseing: khokham we"- he: Philisti byu ri hang" we' agyug noo" wa zi nghoid- ngoo nyang: ri yhe: said wa� ga: tid bye:.
33 Sholu gi �abui" wa nang nyang: yo' khasu" yo" said goo" wa la". Nang gi zooshang: danghoid shi" ziyo' hau: yug gi nya: pyaid dapyaid goin" gyizoo: koid loo bye: su: nghoid nyid da� ga: tid kyoo".
34 David gi �aseing: khokham we" ngoo gi nga" phoo da" yang ri zung" byid: su: nghoid. Khanham nghoid nghoid khangkhyi anghoid lang" voem wigi yang zoo: ri re" shi: zoo: lang" 35 hau: thang: khyoo: cang yhe: wigi hau: ziri khaid said lho: yang zoo: ri cang khaid khyoid khyo' yu yu koid zi nghoid. Khangkhyi anghoid lang" voem doem tau" gyi koid loo lang" nya: da" leung zeung: moo myheig zeig ci: wigi baid said said koid zi nghoid. 36 Ngoo khangkhyi joem yo' voem joem ri said pyam yu bye: wigi Dei nyid da" Mangso gyizoo: yiri thougtheung nyid da" he: shooyid thang: ayham" da" Philisti byu ri we' houg: yhang: ti" ngoo koid wa zi nghoid. 37 Aseing gi ngoo ri khangkhyi joem yo' voem joem lo, mo khyoid yu bye: zi nghoid. Akhid we' he: Philisti byu da" lo, mo khyoid yu wa zi nghoid� ga: tid bye:.
Sholu gi �nghoid bye:- yhi: we' Aseing gi nang yo' dage" nghoid nyid baja"� ga: doem tid. 38 Sholu gi David ri nya: da" gyimi gyibyi ri foid wigi nya: vhuloem moo gyid: mid" mug zhung" byid:- joto' byimi foid byid: bye: zi nghoid. 39 David we' byimi adang moo Sholu da" sham: ri vu, wigi so" yu" ri nyang: amain: yoomo aoung: nghoid da:. Nyang: gi Sholu ri �ngoo he: joem yo' nghoid rigi ayo" said wa ngoo amain: nghoid da� ga: tid. Hougsu" yoomo nyang: hau: ziri dangain" khyoid pyam bye:. 40 Nyang: gi nya: yang zung" lhamdung: ri yu wigi gyid gyung: mo luggo, yung" yung" zi wim: cab' koid: yu wigi nya: thung: i" moo kaid too" bye:. Nya: luglhei" pyi' ri koid ci wigi Goliad yo' shoug" wa shid re" thu' loo" khari" bye:.
41 Hau: Philisti yug we' David jhang khyoo: so" re" nyid wigi nya: goo ci: su: we' nya: shidkhoin" moo so" yhe: lo" nyid da:. Nyang: gi jhang jhang re" wigi 42 Nyang: gi David ri nyeing" za: shau" myang lang" yu" juang" nyid da:. Ciwim gari gung du: young" lho: yu" ngei tung" da" zooshang: zoo: nghoid da:. 43 Nyang: gi David ri �hau: lhamdung: cikoid wa la". Nang ngoo ri lakhuid" jho: nyid la"� ga: tid da:. Hau: thang: nyang: gi nya: yu phara" ri khe: wigi David ri nheing" nyid da:. 44 Nyang: gi David ri �ri" we' re" gung ri ngho' yo' gau: nyoug joem ri ngoo byid: zho" pyam wa ga:� pyi: sho" dang: tid nyid da:.
45 David gi �Nang gi sham: lham: yo' lhamdung: yo' nga" jhang khyo: gyoo" re" da- nghoid loug we' ngoo gi nang thougtheung nyid da" Israela gyizoo: yi da" myhang: thang Aseing Mangsoo da" myeing yo' nang ri thougtheung wa shid re" re" zi nghoid. 46 Akhid" nyid" hau: Aseing gi nga" lo, khyoo: nang ri ab byid: wigi nang ri zain: oung: lho: re" vhuloem zain: ceing yu wa zi nghoid. Hau: thang: Philisti gyizoo: yi da" shid: mang joem ri ngho' yo' gau: nyoug joem zoo: wa shid re" ngoo byid: pyam wa zi nghoid. Houg: lang" mougmyid gyab goin" zi Israela byumyu" yi jang" moo Mangsoo nyid ga: ziri se' boem wa zi nghoid wigi 47 Aseing gi nya: byumyu" yiri khyoid yu da" uri sham: lham: aca" ga: ziri hid: moo nyid da" byu dangain" mo, shau" myang wa zi nghoid. Nyang: gi gyi oung: su: nghoid da:. Nanu" dangain" mo, ri nga" lo, khyoo: nyang: ab byid: wa zi nghoid� ga: doem phug tid.
48 Goliad gi David jhang khyoo: doem so" re" nyid lang" David we' nyang: ri said wa ga: Philisti gyi phung khyoo: tang" yhe: loo" khari" bye:. 49 Nyang: gi nya: da" thung: i" khoug: mo luggo, dacab lab yu wigi lug lhei" pyi' moo kaid lho: Goliad ri du" kaid bye:. Houg: lang" luggo, gi Goliad da" ngilang: moonyang: zang" wigi vhu" khang" go, lo" lho: Goliad we' myidjang khyoo: leung mug loo" khari" bye:. 50 Hougsu" nghoid yoomo David gi sham: aci: loo: za: lug lhei" pyi' yo' luggo, daloem: yo' za: Goliad ri du" said oung: pyam bye: zi nghoid. 51 Nyang: gi Goliad jhang khyoo: tang" yhe: wigi nya: gung atho' moo yhe: yab jo, lho: Goliad da" shambyang mo sham: she: yu wigi vhuloem zain: ceing lho: said pyam bye:. Philisti byu yigi nyangnu" da" sarhi' phoo shid: ziri myang lang" nyangnu" phang: lo" boem bye:. 52 Israela byumyu" yi yo' Yuda byumyu" yigi yoid nyho: wigi nyangnu" thang: khyoo: Gad yo' Ekron voogung khyam: khoem" ju" sho' dakhyoo: goin" cang khaid boem ago". Philisti byumyu" yi dam dab bang: we' Sharim mo zi Gad yo' Ekron ju" sho' dakhyoo: moo" goin" leung jo, boem ago". 53 Israela byumyu" yigi Philisti byumyu" yiri cang khaid said jang" mo doem tau" lo lho: nyangnu" da" dab ri lo phyo' zheing" nyid boem ago". 54 David gi Goliad da" vhuloem ri Yerusalem voogung khyoo: ci: loo bye:. Nghoid loug we' Goliad da" gyizi gyikhoo: dangain" zigi nya: da" zoem" moo to" too" bye:.
55 Sholu gi David wigi Goliad ri khaid said ziri myang lang" nya: gyidab ri vhoeb da" Abna ri �Abna we" nyang: gi hang" nya: zoo: nghoid la"� ga: myid bye:. Abna gi �aseing khokham we" ngoo ayo" tho' myid nghoid da� 56 Hougsu" yoomo Sholu gi �yhe: sho: myid: yu" ge'� ga: amyeing" byid: kaid.
57 Houg: yoomo David gi Goliad ri said pyam kho' wigi dab khyoo: tau" lo uri Abna gi nyang: ri Sholu jhang khyoo: shu" loo" byid: bye: zi nghoid. Hau: ayo, ju" sho' David gi Goliad da" vhuloem ri dadang ci: shi" zi nghoid. 58 Sholu gi nyang: ri �zooyam zoo: we" nang gi hang" nya: zoo: nghoid la"� ga: myid: bye:. David gi ngoo gi Bedlehem voogung mo re" dei zoo: Yese da" nya: zoo: nghoid ga: doem phug tid.