14
1 Danyid" da" ayo, ri Yonathan gi nya: da" gyi jonu" vu, byid: da" zooyam zoo: ri �Philisti dab khyoo: yhe: yu" shang� ga: tid. Nghoid loug we' Yonathan gi nya: phoo ri atid kyoo".
2 Sholu gi Gibea voogung yo' athei" ve: da" Migron joyoo mo lamei shi" seiggam khyid: cang dab koid lho: nyid. Nyang: yo' dage" gyizoo: khyug shoo: koo: nyid boem ago".
3 (Shilo voogung mo Aseing da" khainjung nghoid da" Eli myid: zoo: Phineha da" zoo: Ikhabo nya: mang: Ahitub da" nya: zoo: khainjung byikua" void ci: da" Ahiya we' bo nyid da:.) Yonathan thu lo" byug ziri hang" we' ase' kaid nghoid boem ago".
4 Yonathan gi Mikmasha boem gyoo: khyoo: khyo" lid wigi Philisti dab khyoo: yhe: lo" ri hougmoo lug moo" zeing eig loem: jo, da:. Dasoid khyo: da" lug moo" zeing rigi Boze ga: myheing wigi thang: dashoid khyo: da" lug moo" zeing ri Sene ga: myheing to" ago".
5 Daloem: gi mougzhung: shoid mo Mikmasha khyoo: shu: to" wigi thang: daloem: gi mougpyi: soid mo Geba khyoo: shu: to" da:.
6 Yonathan gi zooyam zoo: ri �Thei: shooyid thang: ayham" da" Philisti byumyu" yi da" dab khyoo: yhe: yu" shang. Hau: Aseing nyha" tang: ri bo pang" wa zi nghoid. Hougsu" nghoid yoomo nyha" tang: ri oung: doid nhang: wa nghoid rigi nyha" tang: byu amyoo: nghoid loug we' nyha" tang: ri nyangnu" yo" toem' too" wa zi anghoid� ga: tid.
7 Zooyam zoo: gi �Nang vho: khyo" koid we' ngoo nang yo' dage" nyid wa� ga: doem phug tid bye:.
8 Yonathan gi �Nghoid bye: nyha" tang: thei: tab khyoo: dab yhe: wigi Philisti byumyu" yiri myang nhang: yu" shang.
9 Nyangnu" nyha" tang: jhang khyoo: ri" wa ga: wigi nyha" tang: ri toem nghoid rigi nyha" tang: ju" nyid jang" moo theing: nyid wa.
10 Nghoid loug we' nyangnu" jhang ri" wa shid re" nyangnu" nyha" thang: ri khe: nghoid rigi nyha" tang: yhi: shang. Ciwim gari nyangnu" ri oung: wa akhang" Aseing nyha" tang: ri byid: bye: ein: da" laxoem" nghoid nyid da� ga: tid.
11 Houg: yoomo nya: tang: gi Philisti bang: shidkhoin" moo yhe: nyid shug wigi Philisti bang: gi �Yu" ge' Hebre byu yi dayham" gi nyangnu" goug" jo, da" lug ug mo thu lo boem bye� ga: tid boem.
12 Hau: thang: nyangnu" gi Yonathan yo' zooyam zoo: ri �Hid: khyoo: do, loo ge'. Ngoonu" nanu" ri daja: tid kyoo" wa� ga: khe: kaid da:.
Yonathan gi zooyam zoo: ri �Nga" thang: moo cang we' nyangnu" ri Israela byumyu" yi gi oung: doid wa da" akhyoo" ri Aseing byid: bye:� ga: tid.
13 Yonathan gi do: lho: do, loo" khari" bye:. Nya: zooyam zoo: we' nya: thang: khyoo: cang do, lo" nyid da:. Yonathan gi Philisti byu yiri zain: said toem" pyam bye: ziyo' nya: zooyam zoo: we' nyangnu" ri bo cang said pyam da:.
14 Xang: shi" khaid zain: lheing: ri Yonathan yo' zooyam zoo: gi eka dago" yi" koo bo da" jang" moo byu eigxi: koo: said pyam bye: da:.
15 Boem moug: moo nyid da" Philisti byumyu" dangain" bang: we' gyoug dain nyid ago". Dab moo nyid wigi meing: zain: wa da" gyizoo: yi we' gyoug nain" nyid boem. Mougmyid noin" loo" sho' gyoug dain nyid boem.
16 Sholu da" byu yi Benyamin moug: mo Gibea joyoo moo zung" yu" nyid ri Philisti byu yi amyhoo: asain" tang" phang: yen" ziri myang bye: zi nghoid.
17 Houg: yoomo Sholu gi nya: byu yiri �Gyizoo: yiri nghab yu" ge'. hang" byug ziri sho: yu" ge'� ga: tid. Nyangnu" sho: yu" ri Yonathan yo' nya: gyizi gyikhoo: vu byid: da" zooyam zoo: tang: byug nyid ziri shau" myang: sho: yu" da:.
18 Sholu gi khainjung Ahiya ri �Hau: khainjung adang byikua" hid: khyoo: yu lo we'� ga: tid da:. Hau nyid" ri Ahiya gi Israela byumyu" yi da" shidkhoin" moo hau: ziri vu, ci: da:.
19 Hau: khainjung phoo ri Sholu khe: nyid ri Philisti dab khyoo: amyhoo: asain" je wim lo wigi Sholu gi nyang: ri �Aseing ri myid: yu" wa da" ayo, akhyeing: ayoo" loo:� ga: tid.
20 Hau: thang: nyang: yo' nya: byumyu" yi we' Philisti byumyu" yiri khaid zain: wa ga: meing: zain: jang: khyoo: cang do, lo" ri Philisti yi nyangnu" nyang: cang" nyang: amyhoo: asain" bue" nyid boem.
21 Philisti shoid khyoo: bo lho: nyangnu" dab khyoo dage" cang lo" da" Hebre dayham" gi dalheing: dam thid wigi Sholu yo' Yonathan bang: shoid khyoo: shoin" lo boem ago".
22 Ephrim boem moug: cang goug" nyid da" gootu: byu yi we' Philisti byu yi phang: loo" bye: ga: ziri shoug" gyoo: lang" nyangnu" we' shoin" lho: Philisti byumyu" yiri bo vang zain: wigi
23 Bethaven lid sho' khyoo: khyo" cang khaid bye:. Aseing we' Israela byumyu" yiri hau: nyid" ri khyoid yu bye: zi nghoid.
24 �Nga" da" goem lau gyi joem ri ngoo latoo: ayo" phug shi" ri akhanyid" da" bidnyid ri zoo: shug zoo: mo, hang" nghoid loug we' nheing" zi shoug" baja"� ga: Sholu jham' tang: wigi amyeing" byid: too" yoomo hau nyid" ri Israela byumyu" yi zooyoid wigi yoem: yoem" nyid boem. Hougsu" nghoid yoomo danyid" goin" hang" we' ciwe' azoo: loo nyid boem.
25 Nyangnu" dangain" seig moo" yoo khyoo: vang so" yen" yu" ri khyi' khang" moo" moo byoo: zei: jo, zi myang boem.
26 Sholu da" nheing" dang: khoin" ri gyoug yoomo seig khung" cang byooyhid: byeung" sho' boo nghoid loug we' hau: ziri hang" we' azoo: goo" nghoid da:.
27 Nghoid loug we' byumyu" yiri nya: phoo tid kyug to" ziri Yonathan ashau" gyoo: yoomo nyang: ci: da" vasi" yo' byooyho' akhoug: khyoo: thau" kaid wigi byooyhid: dajhi' ri yu zoo: bye:. Dalheing: dam nyang: yoem: bo lo.
28 Nghoid loug we' byu dayug gi nyang: ri �Ngoonu" dangain" mo, zooyoid wigi yoem: yoem" nyid zi nghoid nghoid loug we' re" phoo ngoonu" ri akhid" nyid" da" bidnyid ri zooshug zo: da" bang: dangain" nheing" zi shoug" wa� ga: tid ziri tid kyoo" bye:.
29 Yonathan gi nga" phoo gi ngoonu" byumyu" yiri gyoug pho" moo" zoo" koid too" bye: nhung:. Yu" ge' akhid" ngoo byooyhid: dajhi' zoo: yoomo ngoo khayhi' yoem: bo la".
30 Goem lau gyi yiri nyangnu" meing: zain: oung: thang: ri nyangnu" da" zooshug nyha" byumyu" yi shau" zo: nghoid rigi akhanyid" khayhi' yoem: bo wa. Myid yu" ge' Philisti byumyu" yiri khamyhoo' yo" said pyam shi" wa la"� ga: tid boem.
31 Hau: nyid" ri Israela byumyu" yigi Philisti byumyu" yiri Mikmasha mo zi Aiyalon ju" sho' khaid said wigi meing: zain: oung: bye:. Hau: ayo, ri Israela byumyu" yi zooyoid lho: yoem: yoem" nyid yoomo
32 goem lau gyi yi jang" moo nyangnu" shoug" lhoid yu da" yang yo' nu: zoo: joem ri hau: joyoo moo nyang: said to" wigi shoo" yo' suid" zo: boem ago".
33 Sholu we' �Yu" we' he: byumyu" yigi shoo" ri suid" yo' dage" zo: wigi Aseing ri shoid boem abye: go"� ga: tid kyo" boem. Sholu gi �Nanu" gi dang: ri atam" gyoo: bang: nghoid goo" nhung:. Nga" shid re" hid: moo lugmoo" zeing daloem: doin: lheing: byid: too" ge'� ga: yoid tid.
34 Hau: thang: nyang: gi gootu: amyeing" ri doem byid: zigi �Byumyu" yi jhang khyoo: yhe: wigi nyangnu" da" yang yo' nu: joem hid: khyoo: yu ri" wa shid re" nyangnu" dangain" bang: ri tid we'. Hau: joem ri hid: mo said wigi hid: moo zoo: wa zi nghoid. Shoo" yo suid" ri zo: wigi Aseing ri nyangnu" yo" shoid wa zi anghoid� ga: tid. Hougsu" yoomo hau: myen nyangnu" dangain" we' nyangnu" da" nu: joem she: re" wigi hau: joyoo mo said boem.
35 Sholu we' Aseing shid re" xoin" to' jang: daloem: koid bye:. Hau: zigi nyang: xang: shi" koid da" xoin" to' jang: nghoid.
36 Sholu gi nya: byu yiri �Nyhang" gyoo" lo" wigi Philisti byumyu" yiri damyen goin" yhe: khaid zain: shang. Moug: boo" sho' cang lhoid yu lho: nyangnu" dangain" ziri said pyam shang� ga: tid.
Nyangnu" gi �Nang ge wim jho: da" gu: ciri we' koid we'� ga: phug tid boem ago".
Nghoid loug we' khainjung phoo gi �Mangsoo ri shi" myid: gyo: yu" shang� ga: tid.
37 Hougsu" yoomo Sholu gi Mangsoo ri �Ngoo Philisti byu yiri yhe: khaid said wa la". Ngoonu" ri nang oung: nhang: wa la"� ga: myid:. Nghoid loug we' Mangsoo gi hau: nyid" ri atu" byid:.
38 Hau: thang: Sholu gi byumyu" yi da" vhujhung: yiri �Hid: khyoo: ri" ge'. Akhanyid" khate" da" yooboo koid shoid too" bye: ziri phuid: sho' yu" goo" shang.
39 Nga" zoo: Yonathan nghoid loug we' yooboo koid shoid yug nghoid rigi said pyam zi shoug" wa ein: Israela byumyu" yiri oung: doid nhang: da" kangso' Aseing jang" moo ngoo dang: theing too" bye: zi nghoid� ga: tid. Nghoid loug we' hang" we ciwe' atid goo" nghoid da:.
40 Hau: thang: Sholu gi nyangnu" ri �Nanu" dangain" mo, thei: shoid khyoo: yab yu" ge'. Yonathan yo' ngoo gi he: shoid khyoo: yab wa� ga: tid bye:.
Nyangnu" gi �Nang ge ein: jho: da" gu: ciri we' koid we'� ga: tid.
41 Sholu gi Israela byumyu" yi da" Aseing Mangsoo ri �Aseing we" nang ciwim yoomo akhanyid" ngoo ri atu" koid nyid la". Israela byumyu" yi da" Aseing Mangsoo we"- deingbyeing" da" lugzeing khyo" wigi ngoo ri tid kyoo" byid: we' o".Yonathan anghoid lang" ngoo moo yooboo shoid nghoid rigi Urim shoid khyo" si nhang: we'. Nghoid loug we' re" Israela byumyu" yi shoid khyoo: eing nghoid rigi Thumin shoid khyo" si' nhang: we' o"� ga: tid bye:. Yonathan yo' Sholu nyid shoid khyoo: toin" shed nyid bye: yoomo byumyu" yigi yooboo mo loid byoin lo" ago".
42 Hau: thang: Sholu gi �Nga" zoo: Yonathan yo' nga" agyoo: moo dang: phyed byid: we'� ga: tid lang" hau: zigi Yonathan moo eing loo" bye: zi nghoid.
43 Hau: thang: Sholu gi Yonathan ri �Nang cenoem koid shoid bye: la"� ga: myid: yu" ri
Yonathan gi �Ngo nga" lo, khoug: moo ci: da" voosi" yo' thau" wigi byooyhid: dajhi' zoo: bye: zi nghoid. Ngoo hid moo nyid ngoo shid: wa jen" jen" nghoid bye:� ga: phoug tid bye:.
44 Sholu gi nyang: ri �Nang akhid" nyang: ashid: nghoid rigi Mangsoo gi hau: tho' agoo" koid baja"� ga: tid.
45 Nghoid loug we' byumyu" yigi Sholu ri �Israela byumyu" yi shid re" hid yhi' gyi: da" oung: pui" ri byid: da" Yonathan gi shid: ca" wa zi nghoid la". Hougsu" anghoid. Nya: da" vhuloem mo xam: dakhaid we' ayo" byug wa ziri kangso' Aseing yo' ngoonu" dang: theing to" too" bye:. Akhanyid" nyang: koid da" moo" zoo" gi Mangsoo da" pang" thoug ziyo' yo" koid pyam bye: zi nghoid� ga: tid boem. Hougsu" yoomo byumyu" yigi Yonathan ri shid: wa jang" mo khoid yu bye: zi nghoid.
46 Hau: thang: ri Sholu gi Philisti byumyu" yiri khid said khyoo: ri: theing: lho: nyangnu" da" mung" shoid khyoo: doem tau" lo" boem bye:.
47 Sholu gi Israela khokham bue" thang: ri khyi khang" moo" moo nyid da" nyang: ri gyi koid bang: Moba byumyu" yi Amon yo' Edom byumyu" yi Zoba khokham joem yo' Philisti byumyu" yiri yo" khaid zain: bye:. Nyang: meing: zain: da" joyoo khang" moo" oung: doid zi shoug" yu bye: zi nghoid.
48 Nyang: gi seing" yang" myid yo' khaid zain: yoomo Amaleg byumyu" yiri we' oung: pyam bye: zi nghoid. Nyang: gi Israela byumyu" yiri khaid said lo da" gyivoo yi lo, mo khyoid yu bye: zi nghoid.
49 Sholu da" yuggi zoo: yigi Yonathan- Ishvi yo' Makhishua bang: nghoid ago". Nya: zoo: myiyi: nu" gyi: thang yug gi Merab ga: myheing wigi nge yug rigi Mikhala ga: myheing da:.
50 Nya: yhoem: seing: myhi' gi Ahimaza da" nya: zoo: Ahinoam nghoid da:. Nya: gyizoug: gi nya: laid Nera da" nya: zo: da" yhoem: vhoo: yhoem: tho' datang: ho' yi du da" Abna nghoid nyid da:.
51 Sholu da" nya: phoo Kisha yo' Abna da" nya: phoo Nera gi Abiela da" nya: zo: tang: nghoid.
52 Sholu nyang: kangso' dei gu: dangain" moo Philisti byumyu" yi yo' meing: gye" zain: goo" ca" zi nghoid. Hougsu" yoomo yoem: bo lho: seing" yang" bang: dangain" ri myang khang" moo" nya: gyizoo: phung: moo: myheig kaid yu yu koid nyid.