13
1 a 13.1: Sholu zain nghoid uri khokham bue" wigi Israela byumyu" yiri eig zain vhoebkhang" bye:. Ayang qei" da" Hebre mougsoug" moo Sholu zain nyid aboo.
2 Sholu gi byu soem: khyeing" ri khe: zheing" yu wigi nyangnu" mo eig khyeing" rigi nyang: yo' dage" Mikmasha yo' Bethela boem moug: moo to" to" lho: dakhyeing" rigi nya: zoo: Yonathan yo' dage" Benyamin byumyu" yi da" moug" myid nghoid da" Gibea voogung khyo: nhang: kaid da:. Deing da" byu yi rigi nyangnu" nyang: yhoem: khyoo: Sholu nhang: kaid bye:.
3 Yonathan gi Geba moo nyid da" Philisti dab phyo' pyam bye: ziyo' hau: khyoo: ri Philisti byumyu" yi dangain" shau" gyo: boem. Hau: thang: Sholu we' Hebre byumyu" yi meing bo zain: wa shid re" mungdain: dangain" jang" moo laboo" moid wa da" lagyoo: yiri nhang: kaid bye: zi nghoid.
4 Sholu gi Philisti dab phyo' pyam da" khyoo: we' Philisti bang: nyangnu" ri ngheing" nyid khyoo: ri we' Israela byumyu" yi dangain" shoug" gyo. Hougsu" yoomo byumyu" yigi Sholu ri Gilgala moo shoug" goo" shang ga: doem khe: kaid.
5 Philisti byumyu" yi we' Israela byumyu" yiri meing: zain: wa shid re" zoeb foem: nyid boem. Nyangnu" moo gyi myang: rheing" soem" moin- myang: jui: da" byu khyug khyeing" yo' panglai: gyid yam mo midcoo: yhang: ti" myo: da" gyizoo: yi nyid boem ago". Nyangnu" gi Bethaven da" bid thug shoid Mikmasha khyoo: yhe: wigi hougmoo: dab koid to" boem ago".
6 Hau: thang: nyangnu" gi Israela byumyu" yiri yoem: zeing kaid wigi khaid zain: yoomo nyangnu" ri yoem: shoin: nheigloem: gyoug: nhang: bye:. Israela byumyu" dayham" bang: gi lug-ug- lugpyo'- siyoo myid khyung:- gyid thung" cang phang: goug" yen" boem.
7 Dayham" bang: gi Yodan gyid lang ri gu: wigi Gad yo' Gilead mung" khyoo: phang: goug" byug bye:.
Sholu gi Gilgala moo danyid shi" yoomo nyang: yo' dage" nyid nyid da" byumyu" yi gyoug nyid boem.
8 Samuela khyoo: shid khyo" koid wa shid re" Sholu gi Samuela ri nyhed nyid" ju" sho' lang" yu" nghoid loug we' Samuela Gilgala khyoo: aju" shi" yoomo byumyu" yi Sholu jang" mo phang: shang lo" nyid bye:.
9 Houg: yoomo nyang: gi nyangnu" ri �Myi: nghe' xoin" yo' zoem" khau: xoin" ri ci: lo yu" ge'� ga: tid. Nyang: myi: nghe' xoin" ngei" wigi
10 Hau: xoin" bain ngei" lo" nyid ri she' Samuela ju" lo da:. Sholu we' nyang: ri shoug" wa shid re" thu lo" lo tau yu bye: zi nghoid.
11 Nghoid loug we' Samuela gi �Nang cenoem koid bye: lha"� ga: tid bye:.
Sholu gi �Byumyu" yi nga" jang" mo phang: lo ziyo' nang we' deing to" da" ayo, ri aju" yoomo we' hau: tho' agoo" Philisti byumyu" yi Mikmasha joyoo moo foem: nyid boem yoomo nghoid.
12 Philisti byu yi he: ngoo nyid da" Gilgala khyoo: re" khaid zain: wa ziyo' Aseing da" myonhoo: yo' anghoid rigi ngoo age oung: ein: myid pyam yoomo nga" myid kham zo: ziyo' ngoo xoin" ngei" pyam bye: zi nghoid� ga: tid.
13 Samuela gi �Hau: zigi koo" moo" zei zi danghoid. Re" Aseing Mangsoo nang ri byid: to" da" dangsoo" khoin" ri nang acang nhung. Nang cang nghoid rigi nang yo' re" akung: ako' joem ri we' Israela mung" ri apyaid atoo: vhoeb nhang: wa zi nghoid.
14 Nghoid loug we' akhid" gi nang yo" vhoeb khang" loo: wa zi anghoid. Nang nya: da" dang: ri atam" gyoo: yoomo Aseing gi nyang: yu" vho: da" byu ri sho: wigi nya: byumyu" yiri vhoebkhang" nhang: wa zi nghoid� ga: tid bye:.
15 Samuela we' Gilgala mo thu wigi nya: gyung: khyoo: doem xo' so" lo" da:. Sholu gi nya: gyizoo: yi jhang yhe: yu" ri deing shi" da" bang: we' nya: thang: khyoo: cang lo boem ago". Nyangnu" gi Gilgala mo zi Benyamin byumyu" yi mougmyid nghoid da" Gibea voogung khyoo: yhe: lo" boem bye:. Sholu nya: gyizoo: yiri nghab yu" ri byu khyug shoo: koo: danghoid lo da:.
16 Sholu- nya: zoo Yonathan yo' nyangnu" da" byu yigi Benyamin byumyu" yi mougmyid nghoid da" Geba voogung moo dab koid wigi nyid da:. Philisti byumyu" yigi Mikmasha joyoo moo dab koid nyid da:.
17 Philisti gyizoo: yigi gyivoo ri said wa shid re" phung: soem" phung: khyo' lho: nyangnu" dab mo thu lo boem ago". Daphung: gi Shuala mung" mo Ophra shoid khyoo: thu yhe: lo" da:.
18 Gootu: daphung: gi Bed Horon shoid khyoo: yhe: lo" boem ago". Xo' wigi gootu: daphung: gi Zeboim langkhung" yo' seig moo" yoo ri yo" myang kaid da" mougkyoo" shoid khyoo: yhe: lo" boem ago".
19 Philisti byu yi wigi Hebre byumyu" yiri sham: lham: abaid goo" ga: toem' too" yoomo Israela mung" dangain" jang" moo sham: lham: baid jang: ajo, nghoid da:.
20 Israela byumyu" yi za: nyangnu" da" khoin'- khoebmoo"- voozung: yo' bain: nen" joem ri Philisti byumyu" yi jang" moo yhe: baid yu ca" go" da:.
21 Voozung: yo' lham: joem ri doem sho: sei" nghoid rigi ngei dapyi" byid: ca" wigi khoin' yo' khoebmoo" joem ri sei" nghoid rigi ngei eig pyi" byid: ca" ago" zi nghoid.
22 Hougsu" nghoid yoomo meing: zain: go" nyid" ri Sholu yo' nya: zoo: Yonathan mo lid gootu: gyizoo: yigi sham: lham: ashau" ci: goo" nghoid da:.
23 Philisti byumyu" yigi Mikmasha boem gyoo: khyoo: moo yhe: zung" wa shid re" gyizoo: daphung: ri nhang: kaid bye:.