10
Hau: thang: ri Samuela gi zhainloin: xu: bo da" jhuang: daloem: yu wigi Sholu da" vhuloem moo foid gyoin: lho: nyang: ri boobug bug wigi Aseing gi nya: Israela byumyu" yiri vhoebkhang" wa shid re" mainkaid xu: foid shoin" byid: nyid zi nghoid. Nang gi nya: byumyu" yiri vhoebkhang" lho: nyangnu" da" gyivoo joem lo, mo we' nyangnu" ri lhoug zung" byid: ca" wa zi nghoid. Xo' wigi he: khyoo: gi Aseing nang ri khyen: yu lho: nya: byumyu" yiri vhoebkhang" wa shid re" nang ri ci: shug da" sagse: nghoid nyid. Akhanyid" nang ngoo yo' gang: go" wigi yhe: lo" uri Benyamin moug: Zelza joyoo mo Rakhela da" loeb nam moo byu eig yug yo' nang shoug" goo" wa zi nghoid. Hau: tang: gi nang ri nang yhe: sho: da" loo zei: gi shoug" bye:- re" phoo gi loo zei: joem da" khyoo: ri myid amyoo: loo- re" khyoo: ri myid myo: nyid wigi nyang: gi �Nga" zoo: shid re" khasu" koid wa lha"� ga: damyid nyid khyoo: ri lhoem: tid kyoo" lang" goo" wa zi nghoid. Nang gi houg: moo doem so" lo" ri Debora mo gyeung" shang: seiggam ju" sho' loo" we' houg: moo Bethela khyoo: Mangsoo ri xoin" to' wa shid re" yhe: lo" da" byu soem" yug yo' shoug" goo" wa zi nghoid. Nyangnu" mo xang: shi" yug gi coidbaid nu" soem" du: ri she: wigi thang: mo yug gi zooyho' soem" yho' ri voin lho: wigi soem" yug ein: yug gi zabyid yhid: byeung" sho' bo da" shooyid thung: da loem: ri voin wa zi nghoid. Nyangnu" we' nang ri lhoem: tau yu wigi zooyho' eig loem: byid: wa. Hau: ziri nang lhoem: yu ca" wa zi nghoid. Hau: thang: ri Philisti gyidab jo, da" Gibea joyoo mo Mangso bouggung khyoo: nang do, yhi: wa zi nghoid. Vooyam khyam: khoem" nam moo jhabceing- zeing yo' teing ri baid- khalhang ri moid wigi boug goug mo xoin" to' phoin: khyo" gyoo" lo da" lapi: daphung: yo' nang shoug" goo" wa zi nghoid. Nyangnu" gi nyho: ziyo' go" gyoo" loo wa zi nghoid. Aseing da" Venyi: gi nang ri nyeigdain tung" vhoebkhang" pyam wigi nang gi nyangnu" da" noku thung" khyo" go" ziyo' nyho: goo" jang: moo bo vang lho: gooki' lid da" byu bue" loo wa zi nghoid. Hougsu" bue" nyid uri Mangsoo nang ri shu" koid da" ce: ja: moo" zoo" ri nghoid loug we' nang cang koid nyid we'. Ngoo nang yo' shoug" go" wigi myi: nghi' xoin" ngei" byid: ziyo' zoem" khau: xoin" to' khyoo: koid wa ein: da" Gilgala khyoo: nga" shid moo nang yhe: loo" wa zi nghoid. Re" jhang khyoo: ngoo ju" re" wigi nang koid wa da" moo" zoo" ri ngoo tid kyo" da" ayo, ju" sho' hau: joyoo moo nyhed nyid" ju" sho' lang" nyid shi" we'� ga: tid.
Sholu gi Samuela jang" mo thu loo" wa ga: lheung: kaid ri Mangsoo gi Sholu ri gooki lid da" myid nheigloem: aseig ri byid: bye:. Samuela wigi nyang: ri tid gu: dangain" gi hau: nyid" moo nyang: bue" loo bye:. 10 Sholu yo' nya: dei zoo: gi Gebia joyoo moo ju" lo" uri lapi: daphung: yo' zheung: shoug" goo" bye:. Hau: uri Mangso Venyi gi nyeigdain tung" nyang: ri vhoebkhang" ziyo' nyang: we' nyangnu" yo' dage" nyho: wigi go" lho: lapi: pe: nyid jang: moo bo vang go" nyid bye:. 11 Sholu hid: su: bo koid ziri shid ri: nyang: ri si' mo, myang wigi nyangnu" dayug yo' dayug gi �Kisha da" nya: zoo: gi ciwim bye: lha". Sholu gi lapi: dayug bui" bye: la"� ga: myid: go" nyid boem da:. 12 Houg: moo nyid da" byu dayug gi �Gootu: lapi: yigi khasu" nghoid lha". Nya: tang: da" nya: phoo gi hang" nghoid la"� ga: myid: nyid. Hougsu" nghoid yoomo Sholu gi �Lapi: nghoid byug bye: lha"� ga: da" dang: khyang" thu loo bye: da:. 13 Sholu gi nyho: wigi go" lho: Lapi: pe: nyid zi bain lang" phoin: jo, da" bouggung tho' khyoo: do, loo" bye:.
14 Sholu da" nya: laid gi nyang: yo' nya: dei zoo: ri myang lang" nyang: gi nya: tang: ri �Re" tang: khakhyo" loo go" lha"� ga: myid:. Sholu gi �Loo zei: cang sho: yen" zi nghoid. Nga" tang: gi hau: ziri amyang yoomo Samuela jang" moo we' ju" vang yhi: khoo' bye:� ga: tid kyo".
15 Sholu da" nya: laid gi: �Nyang: ri khasu" ga: tid kaid lha"� ga: doem myid:.
16 Sholu gi �gougnyhoug ri doem myang bye:� ga: Samuela gi ngoonu" ri tid. Nghoid loug we' nyang: khokham bue" loo wa da" khyoo: Samuela tid ziri gi nya: laid ri atid kyoo" nghoid da:.
17 Samuela gi Mizpa joyoo moo: noku thung" yo' sen: da" zoebphung: koid wa shid re" mung" byu yiri dage" khe: foem: to" wigi
18 nyangnu" ri Israela byumyu" yi da"Aseing: Mangsoo gi �Ngoo gi nanu" ri Egutu mung" mo shu" thu' loo bye: ziyo' Egutu byu yi da" lo, mo we' nanu" ri doin: zeig bang: nghoid da" gootu: byumyu" yi da" lo, mo we' khyoid yu too" bye: zi nghoid. 19 Ngoo gi nanu" da" yau: khe" kyi" khyeug khyoo: dangain" jang" mo khyoid yu da" nanu" Mangsoo nghoid nyid. Nghoid loug we' akhid" nyid" nanu" gi ngoo ri ngeug he: pyam lho: nanu" shid re" khokham dayug byid: wa khyo" ngoo ri mho' nyid ago". Gi bye: Aseing da" shidkhoin" moo akung: yo' akung: byumyu" yo' byumyu" nanu" nyang: zeung: foem: nyid ge'� ga: tid bye:.
20 Hau: thang: ri Samuela gi akung: ako' dangain" ziri shid khyoo: thu ri" nhang: wigi Aseing gi Benyamin akung: ri khyen: yu bye:. 21 Hau: thang: ri Samuela gi Benyamin akung: mo ikoin deungkhu: joem ri thu loo nhang: wigi Matri da" ikoin deungkhu: ri khyen: yu zi shoug" bye:. Hau: thang: ri Matri da" ikoin deungkhu: mo yug gi zoo: yiri thu loo nhang: wigi Kisha da" nya: zoo: Sholu ri khyen: yu zi shoug" bye:. Nyangnu" gi nyang: ri shoo: nghoid loug amyang yoomo 22 nyangnu" gi Aseing ri �Hid: moo gootu: dayug yug nyid shi" anghoid rhe"� ga: myid: boem ago".
Aseing gi �Sholu gi thei: jonu" boem da" nungthang moo gau" jo, da:� ga: tid.
23 Houg: yoomo nyangnu" zheung: tang" yhe: wigi Sholu ri byumyu" yi shidkhoin" khyoo: shu" lo yu" ri gootu: yi tho' mo vhuloem daloem je" myhang nyid ziri nyangnu" myang ago". 24 Samuela gi byumyu" yiri �He: yug gi Aseing khyen: yu su: nghoid bye:. Ngoonu" da" akhoug: moo nyang: yo' du go" zi hang" we' anyid loo: nghoid da� ga: tid.
Byumyu" yi dangain" mo, gi �Khokham phoo gi kangso' sheing: baja" o"� ga: yoid nyho: nyid boem ago".
25 Samuela gi byumyu" yi ri khokham da" amyeing" khyo" koid ca" da" moo" zoo" ri tid phuid: kyo" wigi mougsoug" pug moo lhid" xoem" to" lho: gyeung" shang: da" joyoo moo voin: tang: shoung: too" bye:. Hau: thang: ri nyang: gi dangain" mo, ri yhoem: khyoo: loo" nhang: kaid bye:. 26 Sholu we' Gibia mo da" nya: yhoem: khyoo: loo" bye:. Nheigloem: khoug: moo Mangso lhu: poin" lhu: nhau" da" sarhi' yi dayham" we' nyang: yo' dage" cang lo" ago". 27 Nghoid loug we' byugang: yi dayham" gi �He: yug gi nyha" shid re" ge da" moo" zoo" ri khasu" yo" se' koid byid: wa lha"� ga: tid nyid boem ago". Nyangnu" gi Sholu ri aphoug" akhyoid koid boem wigi nya: shid re" jhungshug we' aci: yhi: nghoid ago".