6
Hau: thang: ri nyangnu" gi dazid' nyhed loem: mo daloem: ri phang kaid boem rigi ngoo myang da" gougnyhoug myid: ja: mo daja: gi moug: goem: thui: ti" ga: da" thui: khyo" loo we',, ga: ziri ngoo shau" gyo. Ngoo lheung: yu" kaid ri myang: phyu: dadu: ri ngoo myang- hau: tho' moo myang: ju: ju: su: gi lid: daloem: ci: lho: bidmug, we' zhoung" ci: wigi oung: loo" su: dayug yhang: ti" oung: pyam wa shid re" myang: ju: ju: thu' lo da.
Hau: thang: ri yang nu" gi dazid' eig loem: ein: da dazid' ri doem phang kaid uri eig du: ein: da" gougnyhoug gi Loo we',, ga: tid ziri ngoo shau" gyo. Houg: lang" myang: ni dadu: doem thu lo- hau: myang: tho' moo zhung: su: gi nyang: cang" nyang: said go" lho: mougmyid tho' moo meing: byo, gyi thu' loo nhang: wa shid re" yoem: vhoo" yoemso byid: to"- sham: moo" dacam" ri we' nyang: ri ri byid: too" bye:.
Hau: thang: ri nyangnu" gi soem" loem: ein: da" dazid' ri doem phang kaid da" uri soem" ja: ein: da" gougnyhoug gi" Loo we', ga: tid thui: ri ngoo shau" gyo. Ngoo lheung: yu" kaid ri myang: no, moo zhoung: jo, da" sarhi' phoo gi nya: lo, moo jang daloem: ri zei: ci. Gougnyhoug myid ja" da" agyoo: mo thu' lo te" thui: ri ngoo shau" gyo:- hau: da" thui: gi sungsoo: dakhu' ri danyid" da" vhookung: phoug" yo" byid:- yoono, soem" khu' we' danyid da" vhookung: phoug" yo" byid:- nghoid loug we zhainloin:: khyam: yo' zabyid khyam: ri alhu: phyo' pyam goo" ga: tid nyid.
Xo' lho: hau: yang nu" gi dazid' myid: loem: ein: wa loem: ri doem phang kaid da" uri myid: ja: ein: da" gougnyhoug thui: ri ngoo doem shau" gyo:- Hau: gougnyhoug tid zigi Loo we' ga: tid. Ngoo lheung: yu" kaid da" uri shoem" shid: yed, da" myang: dadu ri ngoo myang. Hau: tho' moo zhoung: jo, da" sarhi' pho myeing gi shid: zoug: ga: zi nghoid. Nya: da" thang: moo gi moovoo, moug: cang lo nyid. Nyang: gi mougmyid myid: boem mo daboem moo nyid da" byu yiri meing: byo, gyi koid go" khyo" zooyoid phang" khoug zeing khyo" nooboug: phyoo" boug: zeing yo' myeung khuid" zeig ni zeing khyo" wigi shid: joem: no thang loo" nhang: wa da" yoemso yo" ci.
Hau: thang: ri nyangnu" gi wim: loem: ein: da" dazid' ri doem phang kaid uri Mangso mungdang: ri kho" kyo" yen" ziyo' jhug zug, loem" jeing" da" sagsi ri kham yoomo said pyam shau" mo, da" soobyoo Venyi: joem ri hau: xoin" to' da" phoin: gyid" moo ngoo myang. 10 Nyangnu" thui: zeing yo' nyho: tid nyid zigi gyeungshang: da" yoem: moo" bo ziyo' deingmain" da" Aseing we"- myidjang tho' moo nyid mo, ri ngoonu" shid re" suid" phoug" latoo: phug, byid: wa Nang khamyhang ju" sho' dang: aphyed ashen" yhen loo: za: nyid nyid wa la"? ga: myed: nyid boem. 11 Nyangnu" yug khang" moo" ri byiphyu: sheing: dayug dakhyab, byid: lho: nyangnu" ri yhang: ti" said zi shau" wa da" moo" zei: byencang" yi yo' Khristain mangnhung" yi joeb lo da" bidnyid ju" sho' daso' zoo: doem myen, jham" wa shid re" tid to".
12 Hau: thang: ri yang nu" gi khyug loem: ein: da" dazid' ri doem phang kaid uri ngoo myang zigi myid leig, gyi" sho' leug, lo lho: bid moo" khyab, gi ceug no, da" kung: yid pain" su" no, loo" khare" wigi lhammoo" khyab, we' suid" su" ne, loo" khare". 13 Mougkhung: mo kyi: joem we' uglid moo" hau, lid lo" ri houg: mo amyheung shi" da" lafoem, shi" joem shu: gyo" pyam yhang: ti" myidjang tho' khyoo: shu: gyo" pyam gye:. 14 Mougkhung: gi mougsoug" deing: ri deung: lhoem" lo" yhang: ti" byug loo" khare" lho:- boem, lang' yo" gagyoo: kang joem dangain" gi nya: joyoo mo hei" loo" khare" zi shau" nyid. 15 Hau: thang: ri gi mougmyid tho' mo Khokham" joem mung" zoug: yi gyi zoug: zeing yi, yoo" mo, di mo, yo' yoem: boo so' boo mo, join yi yo' loid byoin, mo, dangain" gi'- lug khyung: joem yo' boem moug: mo lug ug joem moo gau" loung: jo, lho: 16 Boem yi yo' lug ug joem ri yoid khe: zigi ?Ngoonu" da" atho' moo gyo" baid zeug, lho: zhungtang moo zhoung: jo, su: yo' yang nu" da" nheigkhoo" yo: nyid da" myonhoo: mo ngoonu" ri nghoeb, too" byid: ge o"? ga: mho' yoid nyid boem ago". 17 Mangsoo yo' yang nu" da" nheig no, yo: lo da" bidnyid nghoid abye:. Houg: moo hang" yo" theung shang" kham: yab, jo, wa lha".