5
1 Zhungtang tho' moo zhoung: jo, su: da" lo, yo lo, moo mougsoug" deing: ci: nyid ziri ngoo myang- hau: mougsoug" deing: moo dazid' nyhed loem: yo' thoung" tab to" lho: athi" atho' moo mougsoug" byeing" sho' lhid" tab to".
2 Hau: thang: ri yoem: moo" bo da" moug: lagyoo: dayug gi Hang" su: gi he: da" dazid' joem ri yo" shed, lho: he: mougsoug" deing: ri pei: moin: yi" wa lha"? ga: thui: moo" yo' yoid nyho: nyid ziri ngoo myang.
3 Nghoid loug we' mougkhung: yo' myidjang- myidjang akhoug: moo we' hau: mougsoug" deing: ri pei: wa moin: yi" su: yo' akhoug: moo yo" yu" su: dayug we' aboo.
4 He: mougsoug" deing: ri pei: wa moin: yi" su: yo' nghab wa zi moin: yi" su: dayug we' ashau" myang yoomo ngoo gi khoo" khoo" gye" ngau nyid.
5 Houg: lang" sayen" yi mo dayug gi ngoo ri tid zigi Yu" we' angoug:- Yuda byukung: mo khang' khyi ein: da" David da" amyed ashen yi mo dayug gi He: dazid nyhed loem: ri yo" shed' pyam lho: mougsoug" deing: ri we' yo" phang bye, ga: tid.
6 Hau: thang: ri yang nu" dadu: gi dei noem gougnyhoug myid: ja: yo' sayen" yi khyam lheung to" da" zhungtang mo agung moo yab, jo, ziri ngoo myang. Said' pyam shau" bye: da" yang nu" yo' du nyid da. Nyang: moo khyoug: nyhed khyoug: yo' myojid" nyhed loem: dab. Hau: zigi mougmyid gyab, goin" jang" khyoo:- nhang: kaid da" Mangso Venyi: nyhed yug nghoid.
7 Hau: yang nu" gi ju" re" lho: zhungtang tho' moo zhoung: jo, su: da" lo, yo shoid mo mougsoug" deing: ri yu da.
8 Houg: su" yu da" uri gougnyhoug myid: du: yo' sayen" eig xe: myid: yug gi nyang: nya: da" teing joem ri we' Mangso byu yi akyu" myo, ein: da" nam, pyo: shoem: yo' byeung" jo, da" sheing: goem joem ri ngab, sho' zheung: ci: lho: nyangnu" da" shidkhoin" moo goeb khyo' ago".
9 Nyangnu" khoin" thu' lo da" jikhoin" seig gi Nang gi gung leig xoin" bui" wa shid re" said pyam zi shau" wigi myeing" cang: joeb, azhang cang: joeb mo, yo' byumyu" yi bain sho' mo, ri Mangso byumyu" yi bue" loo wa shid re" qei yu too" bye: yoomo nang gi he: da" mougsoug" deing: yu lho: dazid' joem ri phang wa zigi moin: yi" nyid bye:.
10 Nang gi nyangnu" ri ngoonu" da" Mangso mungdain: moozoo" ri zei: wa da" shid re" Khainjung aya: ri ab, byid: bye:- Hau: lho: wigi nyangnu" gi he: da" mougsoug" ri yo" vhoeb khang" boem wa zi nghoid- ga: wigi khoin" nyid boem.
11 Hau: thang: moo ngoo doem yu" kaid ri zhungtang nam mo gougnyhoug myid: ja: yo' sayen" yi da" loem: lheing khab, moo moug: lagyoo: yi moin, moin, sen, sen, atho nghab loo: sho' yab yoin" to" ziyo'
12 Nyangnu" tid boem zigi Said pyam zi shau" bye: da" yang nu" gi myonhoo: phung" yoeb, ziyoo jonu"- phajhi" juyhi yo' yoemso yoem: vhoo"- myonhoo: ngilang: phoug" tab ngi: shab byid: moin: zigi coung" nghei byid: zi: kham: yu wa moin" yi" nyid o"- ga: thui: zeing thui: moo" yo' coung" nghei nyid boem ago".
13 Hau: tho' mo gootu: mougkhung: mougdi mougmyid yoosoo" myid the" pyam: yo' nam mug dara, khyi khang" moo" moo nyid da" dei noem loeb, noem dangain" mo, gi zhungtang tho' moo zhoung: jo, su: yo' yang nu" gi mougmyid pyaid khang" moo" moo myonhoo: phung" yoeb, yo' phoug" tab ngi: shab byid: ziyo' coung" nghei byid: khyoo: gi pyaid moo too: moo dajo, jo, baja" o"- ga: wigi khoin" jikhoin" thui: joem ri ngoo shau" gyo.
14 Houg: lang" gougnyhoug myid ja: bang: gi Amen,, ga: tid ago". Hau: lho: wigi sayen" yi we' goeb khyo' lho: coung" pid ago".