3
1 Sardi phung da" moug: lagyo: jhang khyoo:- hid: su" ein: lhid" we. He: da" dang: gi Mangso Venyi: nyhed yug yo' kyi: nyhed cab, yoo" su: jhang mo mungdang: nghoid. Nang koid nyid da" moozoo" ri ngoo se. Nang gi kangso dei nyid ga: fu" nyid nghoid loug we' shid: jo, su: nghoid nyid.
2 Re" da" moozoo" gi nga" Mangso da" shidkhoin" moo ajoeb, abyeung" shi" ziri ngoo myang. Houg: yoomo too' we' re" da" kangso bain sho' athang shi" uri yoem: kaid we.
3 Houg: yoomo nang jhau" kham: yu bye: ziyo' shau" gyo: kham: yu bye: da" khyoo: joem ri doem myid boin: lho: houg: moo cang zei: loo" we. Re" yooboo mo nheigloem: thid loo we' nang alhid' nyid nghoid rigi khoug" su: yhang: ti" ngoo re" jhang moo ri" wa . Ngoo ju" ri" wa da" ayo, rilang" nang se' wa zi anghoid.
4 Nghoid loug we' Sardi voo moo nyang: nya: byimi moo aco' ajhoid alhu: lhu" ci: mo, dajhi' nyid houg: bang: gi moin: yi" mo, nghoid yoomo byimi phyu: joem ri void ci: lho: ngoo yo' dage" shau" so" yen" boem wa.
5 Oung: loo" su: gi houg: yhang: te"- phyu: young" da" byimi shau" void lho: nya: myeing ri we' Kangso mougsoug" pug mo ngoo soid, pyam byid: wa zi anghoid. Nyangnu" gi nga" da" lagyoo: yi nghoid ein: nyang:- nga" phoo yo' nya: moug: lagyoo: yi da" shidkhoin" moo ngoo yhen: yu wa nghoid.
6 Venyi: gi phung yi ri khasu" ga: tid nyid zigi nookhyab' dab mo, gi gyo: yu goo" baja".
7 Philadephia phung da" moug: lagyoo: jhang khyoo: hid: su" ein: lhid" we. He: da" dang: gi gyeungshang: ziyo' deingmain" su: jhang mo mungdang: nghoid. Nyang: gi David da" khoem" thoug" ci: su: nghoid. Houg: yoomo nyang: wigi khoem" ri phang too" lang" hang" we' ayo" myhid" loo- hau: lho: nyang: wigi khoem" ri myhed" too" lang" gi hang" we' ayo" phang lo: su: jhang mo mungdang: nghoid.
8 Nang zei: nyid da" moozoo" ri ngoo se'- nang gi yoemso dajhi' zoo: boo nghoid loug we' ngoo tid poin" da" dang: ri cang lho: nga" tho' moo geing: zug, loemkhau: nyid khyoo: ri ngoo se' Re" shid mo hang" we' ayo" myhed" to" da" khoem" daduang: ri ngoo phang too" byid: bye:.
9 Yu" ge'. Nyang: nya: da" gungdu: ri Yuda byu nghoid ga: mhau' tid yen" mo, satan da" phung: moo boo mo, ri re" da" khyid: yang: moo lo goeb pid nhang: wa houg: lang" nang ri ngoo jheddab khyoo: nyangnu" se' lo boem wa.
10 Khasu" wim gari nang gi nga" da" dang: ri jhug zug, cang nyid yoomo mougmyid gyab, goin" mo Xangsu: byu yi ri jham" ca: yu" da" bidnyid ayo, moo nang ri ngoo goemloem zung" lhug yu wa.
11 Ngoo phyed za: ju" ri" wim bye:- re" da" oung: lo" jhungshug aphoug" gi hang" we' ayo" lhoid yu baja"- nang yo" yu bye: zi ri geing: geing: dazoem: ci: we.
12 Oung: doid loo" su: rigi nga" Mangso Noku Yhoem: Moo" khoug: mo khung: voin zeingbung: daloem: bue" jo, nhang: wa nyang: gi houg: mo khanham we' thu' loo" loo: wa zi anghoid. Mougkhung: tho' nga" Mangso jhang mo ju" gyoo" lo da" Yerusalem voogung seig ein: da" voo myeing ri we' nga" Mangso myeing ri we' ngoo nya: da" myeing seig ri we' nya: da" tho' moo lhid" tab too" byid: wa xo' lho: nya: da" tho' moo ngoo nya: myeing seig ri we' lhid" tab too" byid: wa.
13 Venyi: gi phung yi ri khasu" ga: tid nyid ziri nookhyab' dab mo, gi gyo: yu goo" baja".
14 Ladoki phung da" moug: lagyo: jhang khyoo: hidsu" ein: lhid" we' He: da" mungdang: gi Mangsoo phain" to" da" ziyoo dangain" da" apoem: ayang: geingteing jo, ziyo' deing byeung" da" sagsi phoo- Amen, ga: su: jhang mo mungdang: nghoid.
15 Nang moo" zei: nyid ziri ngoo se'- nang gi ngi" we' anghoid- jham" we' ajham"- su: nghoid nyid ziri ngoo se' nyid nang gi ngi" lang" nge" zi jham" lang" gi jham" ziri ngoo vho: nyid.
16 Nghoid loug we' akhid" nang gi nge" zi we' anghoid- jham" zi we' anghoid- i, i, za: nghoid nyid yoomo nang ri nga" nhoid khoug: mo byi" thu' pyam loo wa.
17 Ngoo gi yoo" su: di su: nghoid yoomo ci: we' aca" loo:- ga: nang tid nyid. Nghoid loug we' nang gi khayhi' gyeung" da" asho" ajhen: nheigkhyeig cang boo su: nghoid nyid ziri Nanyang: gi ase' nhung: lha". Nang gi sho" jhen: su: byimi adab su: myo, jed, nu loem: su: danghoid nyid.
18 Houg: su" nghoid yoomo nang gi yo" loo de, loo wa shid re" sheing: gyeing" ri nga" jhang mo qei yu wa shid mo ngoo phajhi" byid- hau: tho' mo gootu: asho, ashid: da" shoo" cen: doem: moo goo wa shid re" yo' Nanyang: void wa shid re" phyu: gyeung" da" byimi ri nghoid loug we' nga" jhang mo qei yu we.
19 Ngoo gi ngoo nyang: jheddab mo, dangain" ri jhau" shed lho: yooboo dam kaid nyid houg: yoo mo nang gi yhau: gyen: khyo" koid nyid lho: re" yooboo mo nheigloem: thid loo re.
20 Yu" we' ngoo gi khoem" duang: moo yab, jo, lho: khoem" ko' nyid. Nga" da" thui: ri shau" gyo: lho: khoem" ri phang byid: su: da" yhoem: khoug: khyoo:- ngoo vang lo" lho: nyang: yo' dage" zo: shug wa nyang: we' ngoo yo' dage" shau" zo: shug nyid wa.
21 Ngoo gi oung: doid lo" wigi nga" pho da" zhungtang tho' moo nyang: yo' dage" shau" zhoung: jo, yhang: ti" oung: doid loo" su: ri we' nga" zhungtang tho' mo nga" nam, moo zhoung: jo, wa da" akhang" ngoo byid: wa.
22 Venyi: gi phung yi ri khasu" ga: tid nyid ziri nookhyab' dab mo, gi gyo: yu goo" baja.