2
Hau: Ephesu phung mo moug: lagyo: jhang khyoo:- hidsu" ein: lhid" kaid we' He: da" mungdang: gi lo, yo lo, moo kyi: nyhed cab ci: lho: zhoung: to" da" sheing: myibung: nyhed loem: da" agyoo: moo so" yen" su: jhang mo mungdang: nghoid. Nang ci koid lid loo bye: da" moozoo" ri ngoo se'- nang khayhi' yoem: kaid lho: moo" zei: nyid zi nang khayhi' yo" kham zeung: nyid ziri ngoo se' nyid. Nang gi akhyeung" da" byu yi yo' lagyoo: anghoid zi lagyoo: nghoid ga: mhoug mo, ri ca: yu" lho: se' lang" gi khyam" sa: abyid: lo: ziri ngoo se. Nang gi kham zeung: lho xangshid" re sho" jhen: kyi khyeug khyoo: ri gye" kham bye:- nghoid loug we' ce" yoem: ashoin:. Nghoid loug we' nang ngoo ri xangshid" yhang: ti" ajheddab loo: yoomo nang ri yooboo foin: jang: ngoo myang . Nang khayhi' byid gyoo" loo" bye: ziri se' we' re" da" yooboo mo nheigloem: thid lo lho: xangshid" ri cang loo bye: yhang: ti" boem cang we. Houg: su" nheigloem: athid loo lo: nghoid rigi re" jhang khyoo: ngoo re" wigi re" da" myibung: ri hau: joyoo mo ngoo yu pyam byid: wa. Nghoid loug we' Nikola da" cangzoo: yi da" aved asam" ri ngoo ngheung" nyid yhang: ti" nang we' bo ngheing" yoomo nang ri coung" byid: cang daloem: bo ashi.
Venyi: gi phung yi ri khasu" ga: tid, nyid ziri nookhyab' dab bang: gi gyo: yu goo" baja. Oung: doid loo" bang: ri Mangso khyam: moo yug jo, da" kangso shi" gam, mo ashi" ri zoo: wa da" akhang" ngoo byid: wa nghoid.
Samurna phung da" moug: lagyoo: jhang khyoo:- hid: su" ein: lhid" kaid we' He: da" dang: gi xang: shed' su: yo' lo" thang su: shid: lo" lho: kangso doem dei loo su: yug jhang mo mungdang: nghoid. Nang thoung" shau" nyid da" sho" jhin: yaukhi" khyoo: ri ngoo se' nyid nang gi damyoung, sho" jhen: nyid nghoid loug we' gyeing" nyang: ga: rigi nang yoo" su: di su: nghoid nyid. Nyang: nya: da" gung ri Yuda byumyu" nghoid ga: tid nyid mo, gi nang ri theung shang" gyi koid mo, nghoid nyid boem ziri ngoo se' nyid. Nyangnu" gyeing" gyeing" ga: rigi Yuda byumyu" anghoid- satan da" byumyu" yi danghoid nyid boem ago". 10 Nang shau" kham zoo: wa da" sho" jhin: yaukhi" shid re" agyug nyid. Yu satan gi nanu" mo dayham" bang: ri thung: moo lhoung, to" lho: jham" ca: yu da" sho" jhen: shen" yhen zi shau" goo" wa nghoid loug we' nheigloem: geing: zug, jo, we' houg: lang" ngoo nang ri oung: lo" da" kangso bidmug byid: wa nghoid.
11 Venyi: gi phung yi ri khasu" ga: tid nyid zigi nookhyab' dab mo, gi gyo: yu goo" baja"- oung: doid loo mo, gi eig lheung: shid: da" jam joug, shau" loo wa zi anghoid.
12 Pargamu phung da" moug: lagyoo: ri hid: su" ein: lhid" we' he: da" mungdang: gi eig shoid tho' da" lhab, sham: yoo" su- jhang mo nghoid. 13 Nang nyid da" joyoo ri ngoo se'- hau: joyoo gi satan da" zhungtang jo, jang: nghoid. Nga" geing: zug, da" sagsi phoo- Antipa ri hau: satan nyid jang: moo said pyam boem uri lang" nang gi ngoo ri loem" jeing" khyoo: ri ashe: pyam. 14 Nghoid loug we' nanu" moo yooboo foin: jang: dajhi' bo- Khasu" wim gari Israela byumyu" ri soolhoo: ri teing: byid: da" zoo: noem ri zoo: wa ziyo' avoid avhu: ein: da" yau: shoo: goo" wa shid re" Bala ri jhau" byid: Balam da" jhoug" myeing" moo bo cang loo" bang: nanu" moo dayham" bo nyid ago". 15 Houg: yo' dakhyoo" ti" nanu" da" akhoug: moo Nikola da" cangzoo: yi jhau" byid: da" akhyoo" moo bo cang loo" mo, we' bo nyid. 16 Houg: yoomo re" yooboo mo nheigloem: myab, thid loo we' nheigloem: athid lo nghoid rigi amyang" ri ngoo re" wigi nga" da" nhoid mo, thu da" lhab, sham: yo' nyangnu" ri jab, pyam loo: wa.
17 Venyi: gi phung yi ri khasu" ga" tid nyid ziri nookhyab' dab mo, gi gyo: yu goo" baja"- oung: doid loo" mo, rigi yhoem" to" da" Mana zooyho' ngoo byid: lho: yug du: ngab, ri moin: moin: phyu: da" kyi: myhoo: lug daloem: loem byid: wa. Hau" lugboem mo myeing rigi shau" kham: yu su: mo lid wigi hang" we' ase' bo nghab.
18 Thuatira phung da" moug: lagyo: jhang khyoo:- hid: su" ein: lhid" we. He: mungdang: gi myojid" myiyham: doem ti" dab nyid wigi nya: khyid: gi gyid: gyeing" yhang: ti" doug, bang nyid da" Mangso nya: zo: jhang mo mungdang nghoid. 19 Ngoo gi nang ci koid nyid ziri se'- re" da" jheddab khyoo:- loem" jeing" khyoo: we' re" da" moo" voin khyoo: yo' nheigloem: sheung: khyoo: ri ngoo se. Akhid" nang zei: nyid moo" gi xangshid" tho mo je ge ziri ngoo se. 20 Nghoid loug we' nang gi nya: jhoug" myeing" khyo" nga" cangzoo: yi ri avoid avhu: koid nhang: lho: soolhoo: ri teing: byid: da" zoo: noem zo: shug da" yooboo shoid sho' khyoo: shu" vhang: nhang: su: myiyi: myhi' Yezebela ri nyid nhang: nyid shi" yoomo, nang ri yooboo foin: jang: jo. 21 Nyang: ri nya: yooboo mo nheigloem: thid loo wa shid re" ngoo ayo, byid: too" bye:- nghoid loug we' nyang: gi nya: avoid avhu: koid khyoo: mo nheigloem: anau thid' loo: nghoid da. 22 Houg: su" nghoid yoomo ngoo gi nyang: yo' dage" myi: shoid lang' shoid da" moo" zei: nyid bang: ri gyi" sho' da" noodam' yo' nya: yhoeb cuang tho' moo du" pyam too" wa nyang: yo' dage" akhyeung" da" moo" zei: lho: nheigloem: athid loo mo, ri we' ngoo houg: su" nyang: koid loo wa. 23 Nya: thang: cang mo, ri we' ngoo said pyam loo wa. Houg: lang" ngoo gi yug khang" mo" da" nheigloem: yo' myid soin: khyoo: joem ri myang kyang nyid su: nghoid ziri phung yi dangain" se' lo boem wa zi nghoid. Nyangnu" nya: da" lo, moo" yo' dakhyoo" ti" aphoug" ri ngoo byid: loo wa zi nghoid.
24 Nghoid loug we' Thuatira voo moo deung nyid shi" da" byu yi dayham" gi hid: yhang: te" akhyeung" da" jhoug" myeing" khyoo: ri abo cang mo, yo' satan da" no, thang phajhi" khyau" khyoo: nghoid ga: subi" tid da" khyoo: moo abo cang loo" loo: za: deung nyid mo, nanu" da" tho' moo gootu: yoo: lid: ngoo afoin: loo. 25 Nghoid loug we' nanu" gi nanu" nya: da" lo, moo" ri ngoo ju" re" jang" moo ju" sho' geing: geing: teing teing zei: ci: ge. 26-28 Ngoo vho: da" khyoo: moo lo" thang nyid" ju" sho' beung: abyid cang nyid khyo" yo" oung: loo" mo, ri nga" pho jhang mo ngoo yo" yu da" amyeung" akhang" yo' dakhyoo" ti" ngoo byid: wa. Hau: da" amyeung" akhang" gi joto' lham: dung: yo' vhoeb khang" lho: myid zhoo" yam: joem ri agang gang asi" si"- mhoin' pyam yhang: ti" nyangnu" gi byumyu" bain sho' tho' moo yo" oung: pyam wa zi nghoid. Hau: boo" myhu: ri we' ngoo nyangnu" ri byid: shi" wa
29 Venyi: gi phung yi ri khasu" ga: tid nyid ziri nookhyab' dab mo, gi gyo: yu goo" baja.