16
1 Hau: thang: ri Noku Yhoem: Moo" khoug: mo thui: zeing myeung thu' lo- Hau" da" thui: gi Mougmyid tho' khyoo: Mangsoo nheig yo: zi bo da" goem nyhed loem: ri ci: thu' yhe: lho: foid shoin" kaid ge",, ga: moug: lagyoo: nyhed yug bang: ri tid zi ngoo shau" gyo.
2 Moug: lagyoo: xangshid" yug thu' yhe: lho: mougmyid tho' khyoo: nya: goem, ri foid khyo' kaid. Houg: lang" akhyeung" da" gougnyhoug zeung, da" myeing ri tab ci: zi shau" mo, yo' nya: khyang du soolhoo: ri no" mo, moo gye" gyoug pho" da" khe" no, moug: byeing myoug, lo boem.
3 Hau: lho: eig yug ein: da" moug: lagyoo: gi nya: da" goem, ri panglai: gyid thoem" moo" moo foid khyo' kaid- hau" gyid thoem" gi byu shid: yi da" suid" yhang: ti" bue" lo. Hau: gyid thoem" khoug: moo nyid da" dei noem gi suid" gyid bue" lo.
4 Soem" yug ein: da" moug: lagyoo: gi nya: da" goem, ri gyid moo" lang' joem yo' gyid bug yi da" atho' moo foid khyo' kaid. Houg: lang" gyid dangain" gi suid" gyid bue" lo.
5 Houg: lang" gyid ri vhoeb khang" da" moug: lagyoo: gi nang koid da" dang: phyed khyoo: gi deing nyeung" da" khyoo: nghoid- Nang gi akhid" pyaid lid loo" bye: apyaid moo nyid nyid da" gyeungshang: su: gi Nang kyeing" za: nghoid- ga: tid.
6 Houg: bang: gi gyeungshang: Mangso byu yi yo' nya: lapi: yi da" suid" ri foid shoin: pyam byid: boem bye: yoomo Nang gi nyangnu" ri suid" doem shug nhang: bye:- houg: gi nyangnu" kham moin: da" dam nghoid bye:- ga: tid nyid ziri ngoo shau" gyo.
7 Hau: thang: ri xoin" to' phoin: mo thu lo da" thui: gi athang agoin yoem: moo" bo da" Aseing Mangso- Nang dang: phyed nyid da" khyoo: gi deingmain" da" khyoo: yo' deing nyeung" khyoo: nyang: nghoid bye: ga: tid nyid ziri ngoo shau" gyo.
8 Hau: thang: ri myid: yug ein: da" moug: lagyoo: gi nya: da" goem, ri bid, da" atho' moo foid gyoin: kaid Houg: lang" bid gi byu Xangsu: yiri gye" nge" da" myiso' yo' nge" kyu" pyam nhang: zi shau" bye:.
9 Nyangnu" gi thain: da" myiso' yo' ngi" yoomo hau: shidgyoin amyeung" byid: su: Mangsoo ri damyen nheung" nyid go". Nghoid loug we' nyangnu" da" yooboo yoomo houg: yhi' gyeung" da" shen" yhen kyikhyeig shau" nyid boem nghoid loug we' nheigloem: athid lo boem ziyo' Nya: da" gyi: myhang: khyoo: ri acung" anghei' byid: nghoid ago".
10 Wim: yug ein: da" moug: lagyoo: gi nya: goem, ri akhyeung" gougnyhoug da" zhungtang tho' moo foid shoin" kaid. Houg: lang" akhyeung" gougnyhoug zeung' da" mungdain gi mougcoid teing: no, loo" khare" lho: nya: mungbyu yi we' khe" no lo boem yoomo nyang: nya: da" yhoo: ri ngaid zeug ci: boem bye:.
11 Nyang: nya: da" gyi: thain: khe" no nyid moug: byeing yoomo mougkhung: mo Mangsoo ri nheung" nyid boem ago". Nghoid loug we' nyangnu" gi nyang: nya: da" akhyeing" ashoeb da" khyoo: joem mo nheigloem: athid lo boem, shi" nghoid ago".
12 Hau: thang: ri khyug yug ein: da" moug: lagyoo: gi nya: da" goem, ri Uphrad gyid lang moo foid zei kaid- Houg: lang" bidthu shoid mo Khokham" yi ri" wa da" khyoo: bang" loo" baja" ga: gyid moo" lang' gi kyoug, kain" loo" bye:.
13 Hau: thang: ri ngoo gi poolheig yo' du go" da" agyeungshang: da" Venyi: soem" du: ri myang- nyangnu" gi main jung: ni zeung, da" nhoid mo we' akhyeung" gougnyhoug joem da" nhoid mo we' mhau' yen" da" lapi: yi da" nhoid mo we' zheung: thu' lo zi nghoid.
14 Nyangnu" gi main: yu joem da" soobyoo joem nghoid wigi alhoo: again joem ri yo" koid shug . Hau" Venyi: soem" du: gi yoem: moo" bo Mangso meing: zain: da" bidnyid' zeing mo, gyipui" khyoo:- mougmyid gyab, goin" moo nyid da" Khokham" yi ri dage" khe: zheing" wa shid re" thu' lo" boem.
15 Gyo: yu" ge'. Ngoo gi khoug" su: ju" re" yhang: ti" ju" ri" wa Houg: yoomo byimi avoid shoo" cen: doem: nghoid nyid ziyo' sube" da" shidkhoin" moo sho' athu' wa shid re" gyeung: boin: nyid wigi nyang: nya: da" byimi, ri zung" nyid su: gi ngi: lhoo' wa zi nghoid.
16 Hau: thang: moo hau" Venyi: joem gi Khokham" yi ri Hebre myeing" khyo" Armagedon ga: da" joyoo moo khe: zheung" phoung, too" bye:.
17 Hau: thang: ri nyhed' yug ein: da" moug: lagyoo: gi nya: da" goem, ri lid' moo foid tang" kaid- houg: lang" Noku Yhoem: Moo" khoug: moo jo, da" zhungtang mo thu' lo da" thui: moo" da thui: gi Moo" zoo" bain bye",, ga: tid thu' lo.
18 Houg: lang" gi lhab, myeug, zi moug: goem: goem: da" thui: joem yo' thui: moo" zeing myeung thu' lo ziyo' gyoug pho" da" myid leig zeing we' leug, thu' loo bye:. Byu phain" shed" da" bidnyid mo wigi houg: yhi' gyeing" gyi: da" myid leig zeing gi khanham we' aleug, yu" shi".
19 Babelon voomoo" zeing gi soem" gang go, gyam: gyo" pyam bye:- mougmyid tho' moo voomoo" joem dangain" we' byo, lo" pyam bye:. Mangsoo gi Babelon voomoo" ri myid boin: nyid zoore nya: da" goem, mo nheig yo: ein: da" so' thain: thang da" zabyid yhid:" ri shug nhang: abye:.
20 Gagyoo: kang joem yo' boem, lang' joem dangain" we' byug shang loo" khari" bye:.
21 Houg: lang" mouglaid mo dacab, ri 70 joid: koo: koo: su" bo da" leig voo cab, joem gi byu yi da" atho' moo vo, gyoin: lo. Houg: mo bue" thu' lo da" gyoug pho" shidgyoin yoomo byu yi gi Mangsoo ri nheung" nyid boem abye: go".