YOHAN RI
PANG SHOUG
MOUGSOUG"
(Revelation)
Yohan gi he: da" pang shug mougsoug" ri lhid" nyid da" ayo, moo Khristain yi gi shen" yhen' pyi: sho: zi shau" nyid. Khasu" wim gari Aseing Yesu ri loem" jeing" yoomo nghoid. He: mougsoug" lhid" su: da" myid soin' tid nau da" khyoo: gi myid byu ziyo' yoem: byid: tho' moo gootu:- nyangnu" houg: su" thoung" shau" nyid uri loem" jeing" khyoo: geingteing jo, wa shid re" lhid" kaid zi nghoid. He: jhoem: mungdang: ri shau" nghab myang bang: gi nheig byu joyoo ri shau" yu boem lho: wigi he: jhoem: dang: mo myoo: loo boug moo bo da" pang shug to" khyoo: yo' yoeb, myang khyoo: gi gootu: byu yi shid re" se' gyoo: yau: nyid nghoid loug we' hau: apyaid ayo, mo Khristain byu yi se' gyo: phoid: yu da" avoid bo dangtu khyo" thoid' pang shug to". He: mougsoug" mo dangkang: gyeing" ri adu go" da" yoeb, myang aja: ja: alheung: lheung: apyam: pyam:- pang shug to". He: da" jhoem: dang: mo dangkang: ri jid" jid" nug nug phoid: kyo" jang" moo adu go" da" khyoo: joem bo nyid. Nghoid loug we' he: jhoem: dang: da" akang' gi jang jang za: nghoid. Hau" dangkang: da" akhyoo" jhung: shoem: gi phoo Mangsoo gi Aseing Yesu Khristu khyo" wigi yu satan yo' dage" nya: gyivoo joem dangain" ri lo" thang moo gi jhoid" jhoid bain bain oung: doid, lo" lho: Nyang: ri loem" jeing" khyoo: moo jhug zug, nyid bang: ri jeju" bo da" mougkhung: seig myidjang seig yo' coung" nghei byid: wa ga: zi nghoid nyid.1
1 He: da" jhoem: mungdang: gi Yesu Khristu da" pang shug byid: khyoo: ri lhid" xoem" to" da" khyoo: nghoid. Mangsoo hid: su" pang shug da" khyoo: gi Ade: myang" loo: ri bue" thu' loo wa da" khyoo: nya: deizoo: yi yo" se' toin" shid byid: nyid. Khristu gi nya: moug: lagyoo: yi ri nhang: kaid khyo" nya: deizoo: Yohan ri he: khyoo: se' nhang: ziyo'
2 Yohan gi nyang: shau" myang yu khyoo: ri doem tid khyo" hid: moo bo da" khyoo: joem gi Yesu Khristu khyo" Mangsoo jhang mo pang shug da" mungdang: joem nghoid.
3 He: moozoo" gi bue" loo wa da" ayo, jhang loo bye: yoomo he: mougsoug" ri nghab su: gi ngi: lhoo' wa. Hau: lho: he: da" lapi: dang: ri tam" gyoo: su: yo' he: mungdang: moo lhid" too" moo too" ri cang yhe: loo" su: gi ngi: lho' nyid.
4 Ngoo Yohan gi Asia mung" mo phung nyhed' loem bang: jhang khyoo: mougsoug" lhid" kaid. Goonham' pyaid he: da" pyaid thang: phyang" pyaid khanham' we' dangoid nyid da" Venyi: nyhed' yug jhang mo we'
5 Loem ga" da" sagsi phoo'- shid: jangmo xangshid" doem dei to'' yu zi shau" da" mougmyid Khokham" yi ri vhoeb khang" nyid da" Yesu jhang mo nghoid loug we' jeju" yo' myenjham" khyoo: ri nanu" shau" kham: yu goo" baja"- nyang: gi nanu" ri jheddab yoomo shid kham: khyo" wigi ngoonu" da" yau: noo yooboo mo loid byoin loo" nhang: lho:
6 Nya: phoo' Mangso da" moozoo" ri yo" voin vu, wa shid re" ngoonu" ri khainjung aya: ab, byid: da: Yesu Khristu gi moug: kha: thang: myid kha: thang: moo myonhoo: phung" yoeb zoug: myeing" zoug: thui: gi pyaid moo too: moo dabo jo, baja" o"- Amen.
7 Yu" ge'. Nyang: gi jhoem: moug" zhoung: lho: doem gyoo" loo wa nghoid. Aseing ri lham: toin wigi thoug" bang: yo' dage" byu yi dangain" mo, gi shau" myang boem wa zi nghoid. Mougmyid tho' mo byumyu" bain sho' mo, gi nyang: yoomo ngau yed, leung lo" boem wa zi nghoid. Houg: su" bue" loo baja" o".
8 Goonham pyaid he: da" pyaid thang: phyang" apyaid moo ju" sho' danyid nyid da" athang agoin yoem: moo" bo Aseing Mangsoo gi da tid nyid. Ngoo gi xangshid" su: we' lo" thang mo su: we' nghoid- ga: tid nyid.
9 Ngoo gi Aseing mungdain yo' Aseing byumyu" yi kham zo: nyid da" sho" jhen: kyikhyeug, shen" yhen khyoo: ri nanu" yo' dage" bo kham zo: nyid su: nanu" da" mangnhung" phoo' Yohan nghoid. Ngoo gi Mangso da" mungdang: yo' Yesu toin" shid to" deingmain" da" mungdang: ri kho" kyoo" yoomo Padmu gagyoo: kang moo yhe: de" pyam zi shau" jo.
10 Aseing da" bidnyid ri Venyi: moo ngoo bo lo" byug wigi ngoo gi laboo" zeing moid myheung te" da" thui: ri nga" nung thang moo tid nyid zi shau" gyo.
11 Hau: da" thui: gi nang yo" myang yu bye: da" khyoo: joem ri mougsoug" bug moo lhid" kaid to" lho: Ephesu voo- Samurna voo Pegamu Thuatira Sardi Philadephia yo' Ladoki voo moo zheung: nyid da" phung nyhed loem: bang: jhang khyoo: foin: kaid we' ga: tid.
12 Houg: ngoo ri ji nyid su: ri shau" myang sho' ngoo houg: su" lheung: yu" kaid ri sheing: myibung: nyhed loem: yo'
13 Hau: myibung: joem da" agung moo gi byu Xangsu: yhang: te" zi dayug ri ngoo myang- hau: yug gi nya: khanheig ju" da" byisheung: ri void ci: wigi yang gang moo sheing: phyid" cu" ri cu" ci.
14 Nya: da" xam: gi phyu: da" yang moug" yo' gyu: yhang: ti" phyu: jo. Nya: myojid" gi myiyham: doem yhang: ti" dab nyid.
15 Nya: da" khyid: gi myi thung: moo nhe' kyeung to" da" gyid: gyeing" yhang: ti" ne, jo. Nya: da" thui: gi gye" gyi: da" gyid lung" gyoo" thui: yhang: ti" myeung nyid.
16 Nya: lo, yo lo, moo gi kyi: nyhed cab, zhoeb ci- nya: nhoid mo gi sham: soo" eig shoid tho' da" lhab, sham: thu nyid nya: da" myonhoo: gi nyid" gung bid moo" su: bang nyid.
17 Hau: yug ri myang lang" nya: da" khyid: yang: moo shid: su: yhang: ti" ngoo leung, lo- nyang: gi nya: lo, yo lo, nga" tho' moo ki" byid: lho: Agyug- ngoo gi xangshid" mo su: we' lo" thang mo su: we' nghoid- ga: tid.
18 Ngoo gi dadei nyid su: we' nghoid- ngoo shid: bye: nghoid loug we' apyaid atoo: moo ngoo dadei nyid shid: loo" no lo" da" khyoo: yo' moovoo moug: da" atho' moo we' vhoeb wa amyeung" ngoo yo.
19 Houg: yoomo nang shau" myang bye: da" khyoo: ri we' akhid" jo, jo, gu: ri we' thang: phyang" bue" loo wa khyoo: ri we' lhid" too" we.
20 Hid: nang myang da" nga" lo, yo lo, moo kyi: nyhed cab, yo' zhoung: to" da" sheing: myibung: nyhed loem: da" zau" to" dangkang: gi hid: su" nghoid. Hau: sheing: myibung: nyhed loem: we' phung nyhed loem nghoid.