RUTHA
MOUGSOUG" PUG
(Ruth)
Yug yoo myenjham" tung" da" Rutha da" mhoomyid: lhid" pug gi athoug" akhyoug: wim nyid da" ayo, mo tarha" agyi yi da" lhid" pug moo bo kaid to" zi nghoid. Moba myiyi: Rutha gi Israela yuggi dayug wigi lo, xo' yu zi shau". Hau: yuggi shid: lo" da" uri Rutha gi nya: nid ri gooki' lid gyoug phoug" wigi Israela yi da" Mangsoo ri geing: teing loem khoug: khyoo: ri toin" shed su: nghoid. Thang" thang moo nyang: gi shid re nya: yhoem: seing: pho da" byumyu" yi khoug: mo yhoem: seing: phoo aseug jang" moo doem shoug" lo". He: da" lo, xo' myi: pheing" fang khyoo: khyo" wigi Israela byumyu" yi da" gyi: thang khokham zeing David da" nya: phyid" bue" loo bye:.
Tarha" agyi yi da" mhoomyid: moo Mangso byumyu" yigi Mangso jang" mo gang: lo" uri nheig koug nheig shu: byoo dain byoo shoo" khyoo: thung" shoug" lo ziri lhid" to". Hougsu" nghoid loug we' Rutha da" lhid" pug moo tungbau myhi' Rutha gi Israela bang: da" Mangso jhang khyoo: phug lheug loem khau: lo da" jang" mo agyid asoo: yo" lo da" khyoo: ri lhid" to" lho: Mangsoo moo nheigloem: zung" da" byumyu" akung: ako'' bue" loo bye:.
1
1-2 Goonham' Israela mung" moo khokham ga: zi anyid shi" ri phang" khoug gyo" lo. Yuda mung" mo Bedlehem voobyu Ephrad byukung: moo bo da" Elimeleg gi nya: yhoem: seing: myhi' Naomi yo' nya: yug gi zoo: tang: Malon yo' Khilion ri shu" lho: wigi Moba mung" moo yhe: nyid wa shid re" zug byung: lo" ago". Nyangnu" gi houg: moo yhe: nyid nyid da" ayo, moo Elimeleg gi shid: lo" byug wigi Naomi gi nya: yug gi zoo: eig yug yo' nyid deung jo. Hau: yuggi zoo: tang: gi Moba myiyi: Orpa yo' Rutha ri lo, xo' yu ago". Zain xi: koo: myang" lo" thang: ri Hau yuggi zoo: tang: Malon yo' Khilion eig yug we' te: shid: khare" boem wigi Naomi gi zoo: we' yhoem: seing: phoo we' ayoo" loo: nyid deing khoo' bye:.
Ayo, dajhi' myang" lo" thang: ri Aseing gi nya: byumyu" yiri gug zoo gi nhang: khyo" wigi mainkaid byid: nyid bye: ga: ziri Naomi gi shoug" gyoo: yoomo nyang: gi nya: dumoo" tang: yo' dage" Moba mung" mo thu loo wa ga: jen" jen" soin' too" bye:. Nyangnu" gi Yuda mung" khyoo: dage" doem tau" loo" wa khyo" nghoid bye:. Nghoid loug we' houg: moo Naomi gi dumoo" eig yug ri ?Nga" dumoo" tang: we" re" eig yug da" re" myhi' re" phoo bang: jhang khyoo: doem loo" ge'. Re" eig yug gi shid: loo" su: eig yug ri we' ngoo ri we' zei: zhoo" loo bye: ziyo' dakhyoo" ti" Aseing gi re" eig yug ri mainkaid byid: baja" o". Re" eig yug yhoem: doem yo" lho: nyid gi yab ge loo" wa shid re" Aseing gi re" eig yug ri pang" thoug byid: baja" o"? ga: tid.
Houg: yoomo Naomi gi nya: dumoo" tang: ri boobug bug bye:. Houg: lang" nya: eig yug gi zheung: ngau lho: 10 Nya: nid ri ?Nga" eig yug we' re" byumyu" yi jang" moo bo loo wa? ga: tid ago".
11 Naomi gi ?Nga" dumoo" tang: we" daloo" ge'. Nga" jhang cikoid se' bo cang loo wa. Re" eig yug da" yhoem: seing: phoo bui" wa da" zoo shang: doem yo" yoo" shi" wa ein: jhoo: go" la". 12 Nga" dumoo" tang: gi yhoem: khyoo: dajha" tau" loo" loo: ge'. Ngoo we' apyaid lid loo" bye: yoomo yhoem: doem ge yoo" loo: wa zi anghoid loo:. Hougsu" anghoid lang" nheig byu jang: boo shi" yoomo akhamyen nyang: lo, xo' wigi yug gi zoo: khu: nghoid ein: rilang" 13 houg: bang: gyi: loo sho' yo" lang" nyid goo" wa la". Dayug yug wigi lo, xo' yu nau jang" mo re" tang: ri toem' too" byid: ti" abui" wa goo" la". Agi wa nga" dumoo" tang: we' age bue" khyoo: ri re" tang: we' si' gu nghoid. Aseing gi ngoo ri jhoug" mho' ga: ri re" tang: shid re" gye" myid apyoo: jang: bui" bye:? ga: doem tid.
14 Hougsu" ga: lang" nya: eig yug gi gyi" sho' doem ngau ago". Orpa gi nya: nid ri boo bug bug lho: vhu" too" khari" bye:. Nghoid loug we' Rutha koem' gi nyang: moo za: da jha" pu" lhang" nyid. 15 Houg: yoomo Naomi nyang: ri ?Rutha we" re" bi: gi nyang: nya: byumyu" yo' nyang: nya: yu phara" jhang khyoo: doem lo" abye:. Nyang: yo' dage" dacang loo" we? ga: tid.
16 Rutha koem gi ?Nang ri too" kho' lho: re" jang" moo acang loo wa khyo" ngoo ri ajhoin" nyid. Nang ju" da" joyoo khyi' khang" moo" moo ngoo cang ju" loo wa. Re" byumyu" gi nga" byumyu" nghoid. Re" Mangsoo gi nga" Mangsoo nghoid baja". 17 Nang shid: joyoo moo ngoo shid: wigi houg: moo nyang: myhoeb shoung: pyam zi kham wa. Shid: yoomo za: anghoid rigi nang yo' ngoo gang: goo" lang" gi Aseing jang" mo xo: thang da" shen" yhen khyoo: ngoo moo ju" baja"? ga: doem tid.
18 Rutha gi cang nau da" nheigloem: teing" teing ga: bo nyid yoomo Naomi gi ciwe' aga: loo: jha" nyid pyam.
19 Hougsu" nya: nid tang: gi Bedlehem moo ju" sho' lo" abye: go". Bedlehem voogung moo ju" vang lo" ri nya: nid tang: yoomo voogung goin" su" lu: fu: go" lo. ?He: zigi Naomi nyang: deing" deing nghoid la"? ga: houg: mo myhi' zeing yi lhoem: tid lang" ago".
20 Nyang: koem' gi ?Ngoo ri Naomi aein: loo: goo". Mara daein: loo: ge'. Athang agoin yoem: moo" boo su: gi ngoo ri gye" nyang: kyid: kyid: khoo" nhang: abye:. 21 Ngoo hid: mo thu lo" uri myoo" sho' yoo" su: nghoid. Nghoid loug we' Aseing gi ngoo ri akoem: dashu" loo lo. Aseing gi ngoo ri doin: khyo' pyam lho: athang agoin yoem: moo" boo su: ngoo ri sho" jhen: loo" nhang: bye: ri ciyoomo ngoo ri Naomi ein: nyid shigoo" wa lha"? ga: wigi phug tid.
22 Houg: yoomo he: zigi Naomi gi nya: dumoo" Moba myhi' Rutha yo' dage" Moba mung" mo khasu" doem ju" tau" lo khyo: nghoid. Nya: nid tang: gi yoono, yham" yo, ri Bedlehem voogung moo ju" lo ago".