9
Ngoo gi Khristu yo' nyid. Ngoo amhoug- main" da" dang: ri tid. Ngoo main: da" dang: ri da tid da" khyoo: gyeungshang: da" Venyi: vhoeb' khang" khyo" wigi nya: ung: khoug: nheigloem: gi thangcab nghoid. Nga" da" nheigloem: gi nga" byumyu"- nga" suid" shoo" yi da" shid re" myidmyoo: ungloug nyid. Atho' tid sho' nheig moo no nyid. Ngoonu" da" akyu" shid re" ngoo gi Mangso da" nheing" myeing" ri we' Khristu mo gang: goo" nau da" nheigloem: bo. ngoonu" gi Mangsoo: khyen:' yu to" da" byumyu" nghoid. Mangsoo: gi nyangnu" ri zoo: gi joem khyo" coung" nghei tu: to' to" lho: nya: da" myonhoo: phung" yoeb, ri yo" bo kham: zoo: wa akhang" byid to". Mangsoo: gi nyangnu" yo" dang: theing go" to" zi ri we' tarha" byid: to" zi ri we' deingmain" da" noku khyoo: ri we' yo" yu lho:- nyangnu" gi Mangso da" dang: theing" khoin" joem ri yo" too" mo, nghoid. Ngoonu" gi Yuda byumyu" phoug" phyid" mo xo' gyoo" loo mo nghoid. Khristu we' byuxeig khyo" ga: ri gi houg: bang: da" byukung: nghoid. Jo, moojo,- nyid moo nyid ri vhoeb' khang" da: Mangsoo: gi- apyaid atoo: moo myonhoo: phung' yoeb dabo nyid baja" o"- Amen.
Mangso da" dang: theing khoin" gi- abui" loo wa ein: ngoo atid' noug. Khasu" wim ga: ri Israela byumyu" dangain" gi Mangsoo: khyen: yu to" da" byu yi anghoid. Hau tho' moo Abraham: mo ko' gyoo" loo mo dangain" mo gi Abraham: nya: myid: nya: zoo: gyeing" yi anghoid. Mangsoo: gi nang gi Isag' mo za myid: yi zoo: yi yo" loo wa ga wigi Abraham: ri tid to" . Dakhyo" doem ein: rigi xangsu: gungshoo" khyo" khu: loo mo dangain" gi Mangsoo: nya: zoo yi anghoid. Mangsoo: dang: theing to" khyo" khu: loo mo za: Mangso da" nya: zoo: agyeing" yi nghoid. Mangsoo: gi- ayo byeung" loo lang" ngoo ju" ri" wa. Sara gi yuggi zoo khu: ri" wa? ga: wigi Abraham ri dang: theing to".
10 Hau: tho' moo Rebedkha: da nya: zoo: eig yug gi- ngoonu" nya: phoug" Isag' da" nya: zoo: tang: nghoid. Eig yug goin" ri Mangsoo: akhyen: yu. 11-12 Houg: yoomo nya: eig yug akhu: loo shi" da" uri- ge da moo"- akhyeing" ashoeb' da moo" ci: akoid' shi" re nyang:- Mangsoo: gi Rebedkha: ri re" zoo mang: moo" gi nya: nhung" ri shau" zei: zhoo" wa- ga: tid too" bye:. Mangsoo: hid: su" ga: tid to" khyoo: gi- Aseing nyang: myid to" zi yo" dakhyoo" ti" Mangmoo" ri akhyen: yu looza: nya: nhung" ri khyen: yu da" khyoo: toin" shid wa shid re" nghoid. 13 Jhoem: mungdang: moo ngoo gi Yaku ri khyen: yu- Eso" ri gi khyen: pyam ga: bo.
14 Houg: su" koid da" khyoo: ri Mangsoo: gi- atarha" ein yo" tid wa la". Ce: khyo" we' hougsu" ayo" tid. 15 Mangsoo: gi Moshe ri Ngoo nheig khyeug wa su: ri nheig khyeug wa. Jeju" koid noug su: ri jeju" koid wa? ga: tid nyid. 16 Houg: yoomo Mangsoo da khyen: yu khyoo: gi byu yi vho: da" khyo" anghoid. Byu xangsu: yi yoem yo" kaid jang" khyo" we' anghoid. Mangso nheig khyeug jangmo za: danghoid'. 17 Mangsoo: gi Yu Phara-u Khokham" ri tid zigi ?Nang ri kho: kham" zeing, khyo" ngoo tu: to' to" da" khyoo: gi nang moo nga" da phung' yoeb ri thoin" shed' wigi mougmyid gyab goin" moo nga" myeing fu" loo" nhang: wa shid re" nghoid? ga: tid da" khyoo: jhoem mungdang: moo bo. 18 Houg: yoomo Mangsoo: gi nyang: nheig khyeug wa yug ri nheig khyeug lho: nyang: vhuloem thain: nhang: wa su: ri vhuloem thain: nhang.
19 ?Hougsu" nghoid loug we' Mangsoo: gi byu xangsu: yi ri cisu" wim yooboo yo" foin: wa lha". Hang" gi Mangsoo: vho: da" khyoo: ri yo" ngeug pyam wa lha"? ga wigi ngoo ri myid: noug mo boo wa. 20 Bid noem phoo we" nang gi khate" su: nghoid lho: wigi Mangsoo: ri hidsu" yo" myid: lha". Phain" so: too" su: wigi phain" to" Aseing ri Aseing nang ci koid ngoonu" ri phain" to" ein: yo" myid: wa lha". 21 Oug" koid su: da" myid u" nug ri nyang: vho: khyo" oug" khu' ri yo" koid to" anghoid la". Nyang: gi Myid unug dathung" mo za- oug" gi oug" gang: yo" koid thu anghoid la".
22 Mangsoo: we' houg: yo' dakhyoo" ti" koid. Mangsoo: gi- nheug yo: khyoo: toin" shid lho: nya yoem vhoo" phung" ri se' lo boem wa shid re" vho: ngei nyid. Nghoid loug we' nheig yo: zi thoung" shau" lho: byo, joem: loo" moin: mo ri gye kham zeing: yau: nyid. 23 Hau tho' mo gootu: Mangsoo: gi nyang: nheig khyeug nyid mo ri nya: da" joeb byeung" myonhoo: phung" yoeb ri shau" myang nhang: wa shid re" vho: ngei nyid. Houg: bang: gi Mangso da myonhoo: phung" yoeb yo" bo vang kham: zoo: nhang: wa da" shid re" Mangsoo: nyang: nyheung' too" mo, nyang: nghoid bye:. 24 ngoonu" gi Yuda byumyu" khoug: mo za: anghoid. Tungbau byumyu" khoug: mo we' Mangsoo: khe: yu too" mo nghoid. 25 Hoshe da" jhoem: dang: moo Mangsoo: gi-
Nga" da" byumyu" anghoid mo ri
nga" byu phung: ein wa.
Ngoo ajheddab da" byumyu" ri
ngoo jheddab da" byumyu" ein: wa.
26 Kha: joyoo mo nghoid loug we' nanu" gi nga" da" byu phung: anghoid ga shau" tid mo gu: gi-
dadei nyid da" Mangso da" nya: zoo: yi- ga wigi-
myheing zi shau" boem wa- ga wigi tid to".
 
27 Israela byumyu" yo" sen: lho:- Esaia gi- Israela amyu" yi gi- panglai: mid' doem: myhoo: myo: loug boem nghoid loug we' nyangnu" khoug: mo dayham" za: khyoid yu zi shau" wa. 28 Khasu" wim ga: ri Mangsoo: gi mougmyid tho' moo nyid da" byu dangain" ri anoo: atheing: loo: hain: hain: tarha" dang: phyed byid: wa yoomo nghoid ga: kho" kyo" lid: lo. 29 Hau tho' mo apyaid atoo: mo yoem: moo" bo da Mangsoo: gi ngoonu" da" byumyu" dayham" ri khyam" sa: ato' byid: nghoid rigi- ngoonu" gi Sodom yo" Gomora ti" thoung" shau" goo" wa ga: akhang: re lapi: Esaia tid kyoo" khare" zi yo" dakhyoo" ti" nyang: bue" loo bye:.
30 ngoonu" tid nau da khyoo: gi hid: su" nghoid. Mangso da" shidkhoin" moo deingbyeing" mo bue" loo wa shid re" yoem: akaid da: tungbau byumyu" yi gi- Aseing Yesu ri loem jeing" loem" jeing" khyoo: khyo" Mangso shidkhoin" moo deingbyeing" mo yo" bue" lo da akhang" yo" yu boem. 31 Nghoid loug we' khyen: too" shau" da" byumyu" yi gi Mangso da" shidkhoin" moo deingbyeing" mo yo" bue" lo da" tarha" ri sho: yen" nghoid loug we' ashoug" myang boem. 32 Ce: noem wim amyang lha". Nyangnu" zei: da" moozoo" gi- Mangsoo: ri loem" jeing" jang" moo ayang: aqei" loo:- nyangnu" da" tarha" cang pyeung da" jang" moo za: ayang: qei" yoomo nghoid. Houg: su" nghoid yoomo nyangnu" gi jhoem: mungdang: moo toin" shid to" da" lug loem: moo thoung" leung abye: go". 33 Jhoem: mungdang: moo Tam" gyoo: ge'-
byu yi thoung" thue: leung loo" nhang: wa shid re"
lug daloem: ri Ziun boem tho' moo ngoo zhug too" wa.
Byu yi gi hau: lug loem: ri thoung" lho: leung: loo" goo" wa.
Nghoid loug we' hau: lug loem: ein: da Khristu ri nheigloem: ung: khoug: bain" sho' loem" jeing" su: gi-
Khanham' we' nheigloem: byo loo" wa zi anghoid ga: wigi bo jo da.