6
1 Hougsu" nghoid rigi khasu" ein: tid boem wa lha". Mangso da" jeju" ri je myo: loo wa shid re" yooboo khoug: moo daxo' loung" jo, shi" wa la".
2 Hougsu" anghoid o"- yooboo yoomo ngoonu" bain shid: bye: mo ngoonu" gi khasu" wigi yooboo khoug: moo daloung" jo, shi" wa la".
3 ngoonu" gi Aseing Yesu yo" dadeing: daloem: za bui" wa shid re" babtisma ri kham: yu da" uri- Khristu yo" dage" shid: kham bye: da" khyoo: ri nanu" gyeing" nyang: se boem bye:.
4 Houg: yoomo nyangnu" gi babtisma kham khyo" wigi Khristu yo" dage" shid: kham: lho:- nyang: yo' dage" myhoeb pyam zi shau" boem bye:. Aseing yo" dage" shid: kham: da" khyoo: gi pho' da phung" yoeb yoemso yo" Khristu ri shid: da" jangmo doem dei to'' loo nhang: zi yo" dakhyoo"- ngoonu" gi kangso Aseing moo doem yo" dei nyid wa shid re" nghoid.
5 Khasu" wim ga: ri ngoonu" gi nyang: yo" dakhyoo" ti" nyang: yo' dage" shid: lo" boem nghoid loug we' nyang: yo" dakhyoo" ti" shid: jangmo doem dei to'' loo wa zi nghoid.
6 Hau: tho' moo gootu: ngoonu" da" byu xoug" nheigloem: ri Khristu yo" dage" pyang" zeing moo baid jen" said pyam nhang: bye: da" khyoo:- hidsu" baid jen" said pyam nhang: da" khyoo: gi yooboo da" yoemso da" byuxoug" nheigloem: ri phyo' koid pyam khyo" wigi yooboo join pyaid mo lhoid' byoin loo" nhang: wa zi nghoid da" khyoo: ngoonu" se boem.
7 Khristu yo" dage" shid: kham su: gi yooboo yoemso khoug: moo anyid loo.
8 ngoonu" gi Khristu yo" dage" shid: rigi nyang: yo' dage" kangso dei nyid wim bye: zi ri loem" jeing"
9 Khristu gi shid: jangmo doem dei to'' loo" bye: yoomo thang: phyang" khanham' we' ashid: loo wa zi ngoonu" se'. Shid: lo" da" khyoo: gi nyang: ri ayo" vhoeb khang" ci loo.
10 Hougsu" nghoid yoomo nyang: shid: kham khyoo: gi yau: noo yooboo shid re" dalheung: za shid: kham zi nghoid. Nyang: gi Mangsoo: shidkhoin" moo kangso dei zoem" khau: nyid bye:.
11 Houg: yo' dakhyoo" ti" nanu" we' yaunoo yooboo moo shid: lo" nghoid loug we' Khristu Yesu yo" dadeing: daloem: khyo" Mangsoo: shidkhoin" moo kangso dei zoem" khoug: nyid bye:.
12 Houg: yoomo nanu" gi nanu" nya: da" gung sho" nheigloem: ri acang loo" wa shid re" yooboo yaunoo gi shid" loo" se' da" nanu" gungdu: ri thang: phang" khanham' we' vhoeb khang" loo: wa anghoid.
13 Nanu" da gungdu akung: ako' joem ri we' khanham' we' yooboo akoid' nhang: loogoo". Houg: yooboo koid wa tho' rigi nanu" gi shid: jangmo doem dei loo mo agyeing" khyo" we' deingbyeing" moozoo" dagung goin" ci: yhung: nyid khyo" we' nyang: tu: nyang: gung ri Mangso jhang moo xoin" to' pyam ge.
14 Yooboo gi nanu" da Aseing anghoid loo- khasu" wigi nanu" gi Moshe tarha" vhoo moo anyid loo: Mangso jeju" khoug: moo nyid mo danghoid' lo.
15 Hougsu" nghoid yoomo ngoonu" gi Moshe da tarha" vhoo moo anyid loo yoomo ngoonu" gi ci wim yooboo koid shi" wa go" la". Hougsu" koid wa shid re" dangkang: ajo, loo.
16 Byu dayug nhang: zo zi shau" nyid su: gi nhang: zoo: su: da" join nghoid zi nanu" goo" lhoo: si bye:. Gyeing" nyang: nanu" ri yooboo wigi nhang zo: zi dashau" nyid shi" rigi nanu" gi yooboo join nghoid nyid shi"- Nanu" koid da" yooboo aphoug" gi shid: lo" da" khyoo: nghoid. Gyeing" nyang: nanu" gi Mangso da" dang: ri tam" gyo: da" aphoug" gi Mangsoo: da" shid moo deingbyeing" mo bue" loo wa.
17 Nanu" gi dalheung: ri Yoobo join koid yu" nghoid loug we' akhid" gi jhau" shid khyoo: ri tam" gyo: loem" jeing" da" deing byeung" khyoo: ri nheigloem: ung: khoug: dangain" yo" nanu" kham: yu bye: yoomo ngoo gi Mangso da jeju" ri coung" nghei" nyid.
18 Nanu" gi yooboo da join pyaid mo loid byoin lo lho:- deing byeung" da join bue" lo boem bye:.
19 ( Nanu" gi gungshoo" nheigloem: khyo" ase' gyoo: yoomo lei da" dang: khyo" tid nyid). Goonham' gi age akhyeing da khyoo: aja: ja: ri zei: wa shid re" nanu" nya: da" gungdu: ri anyhoin: athoung" aco' ajhoid' khoug: moo join khyo" bain sho' ab pyam boem bye:. Houg: yo' dakhyoo" ti" akhid" nanu" gi- gyeungshang: ge thang da" moo" ri zei: wa shid re" nyang: tu: nya: da" gungdu: ri deingbyeing" da" khoug: moo join gyeing" khyo" nanu" gung ri ab pyam ge'.
20 Nanu" gi Yoobo da" join koid nyid da uri- deingbyeing" da" khoug: mo loid byoin lo" boem.
21 Hau: da" uri nanu" zei: nyid da" moozoo" gi- nanu" nyang: ri akhid" ju" sho' asho" ashid: bui" nhang: zi nghoid. Hau: da akyu" gi- shid: lo" khyoo: nghoid.
22 Nghoid loug we' akhid" nanu" gi yooboo da" lo, khoug: mo, loid byoin thu' lo lho:- Mangso da: join yi bue" lo loem bye:. Nanu" yo" yu da" akyu" gi Aseing da" shid re" nyang: nya: kangso dei khyoo: bain" sho' xoin" to' pyam bye yoomo lo" thang moo gi apyaid ato: kangso akyu" yo" yu wa khyoo: nghoid bye:.
23 Yooboo da aphoug" gi shid: lo" khyoo: nghoid. Nghoid loug we' Mangsoo: da" phoug" asang: jeju" jhungshug koem' gi- ngoonu" da Aseing Yesu Khristu yo" dadeing: daloem khoug mo yo" da" apyaid ato: kangso nghoid.