16
1 Kenkhrea phung: mo phungtau nghoid da" nga" nham" moo" Phobe ri nanu" jhang khyoo: nhang: kaid. Nyang: gi phung: moo aja: ja: gye bo se' pang" zei: su nghoid.
2 Nanu" gi Mangso da" phung" byu yi nyang: cang" koid kham: yu go" moo" khyo" nyang: ri we' Aseing da" myeing mo kham: yu ge. Nyang: moo ca" da" khyoo: bo ri coem' pang" thoug byid: ge'. Nyang: gi byu myoo" sho' ri pang" thoug lid: loo su: nghoid. Ngoo ri we' gye pang" thoug yu" su: nghoid.
3 Khristu Yesu da" moozoo" coem' zei: jang" moo nga" moo" zei: byencang" Priskela yo" Akula tang: ri we' ngoo u" kaid.
4 Nya: eig yug gi nga" shid re" kang: ab so' ab sho' moozoo" bo voin vu yu" su: eig yug nghoid . Nya: eig yug ri ngoo kyeing" za: anghoid tungbau: byumyu" phung: byu dangain" mo we' jeju" boin: nyid boem.
5 Nyangnu" da" yhoem: moo lhoung noku" nyid da" phung: byu yi ri we'
ngoo u" kaid da" khyoo: ri bo tid khyoo" byid: ge'. Asha' moug: moo xangshid" phung: vang loo su: nga" da" bidnoem phoo' Eponetu ri we' bo u" byid ge'.
6 Nanu" da shid re" moo" ri gye bo zei: byid: su nghoid da" Mari ri we' bo u" byid: ge'.
7 Nga" byukung: mo ngoo yo' dage" thung: loung" yu" da" Androniku yo' Yuni eig yug riwe' bo u" byid: ge. Nyang: eig yug gi Lagyoo: amain" khyo" myeing fu" lho: nga' shid mo Khristain bue" loo su: eig yug nghoid.
8 Khristu yo" dadeing: daloem: za nyid su nyang: yo" loem" jeing" bidnoem Ampliatu: ri we' bo u" byid ge'.
9 Khristu da" moozoo" ri voin vu da jang" moo nga" moo" voin luzoem" cang" nghoid da" Orban yo' ngoo jed dab da" bidnoem Staku ri we' bo u" byid: ge'.
10 Khristu moo byu gyeing" nghoid da" Apele ri we' bo u" byid: ge'. Aristobulu da yhoem bang: ri we' bo u" byid ge'.
11 Ngoo yhang: ti" Yuda byumyu" dayug nghoid da" Herodoin ri we' bo u" byid: ge'. Narkiso da" yhoem: mo Khristain mangnhung" yiri we' bo u" kaid byid: ge.
12 Aseing Mangso da" moo" bo voin vu su: Truphena yo" Truphosa eig yug ri we' bo u" kaid ge'. Hau Aseing moo" moo gye yoem: bo kaid da" nga" jheddab byencang" Persi ri bo u" byid ge'.
13 Hau: Aseing moo Ruphu ri we' ngoo ri nya: zoo: dayug ti" yu" cung: su: Ruphu nya: myhi' ri we' bo u" byid ge.
14 Asunkritu- Phelegu- Herea- Patroba- Herma yo' nyangnu" yo' dage" nyid da" gootu: Khristain: mangnhung" yi dangain" mo ri bo u" byid: ge.
15 Philogu- yo" Yulia- Nerea yo' nya: nham" moo" Olumpa yo' nyangnu" yo" dage" nyid da" Mangso da" phung: byu dangain" mo ri we' bo u" byid: ge'.
16 Nanu" dayug yo" dayug jhed' jhed' kug kug young" lho' boobug, yo" u" goo" ge' Khristu da" phung: byu dangain" mo gi nanu" ri u" kaid boem ago".
17 Mangnhung" yi we" nanu" shau" jhau" yu da: tid poin" tid khyeing" mungdang: ri nung phug pyam lho: subi" ri aveing" goo" nhang: da" zi- khyoo vhang: shu" vhang: loo" mo ri zid" nyid ge'. Houg: bang: ri jhang" pyam ge'.
18 Houg: bang: gi ngoonu" da" Aseing Yesu Khristu da moo" voin mo anghoid. Nyanu' nya: da" zoo: noem kha: ja: shau" zoo: wa ashug" zoo: wa da" khyoo: ri za: te: myid yu" mo nghoid. Nyangnu" gi nu" nham' da" dang: ri tid cung" myeing" cung" thui: yo" wigi deingmain" nyid mo, rilang" yo" mhoug zoo: se' ago".
19 Nanu" gi ge da ngeibu: lu dang: ri khayhi' ju" sho' loem" jeing" geing: teing ci: da" khyoo: ri byu dangain" mo nyang: shau" gyo: ci: boem bye:- houg: yoomo ngoo gi nanu" da" shid re" gye gau yi nyid. Nanu" gi ge da" moo" kha: ja: nghoid da" zi ri se' da" phajhi" boo mo nghoid lho: wigi aco' ajhoid' da" moo" yo" sen: lho: wigi ce: yooboo adab mo bue" loo nhang: nau.
20 Myen jham" Aseing Mangsoo: khamyhang amyang" ri Nanu" da" khavoo: khoug: moo satan ri
nang: zeug pyam nhang: wa ngoonu" da" Aseing Yesu da" jeju" ri Nanu" shau" kham zoo: baja" o".
21 Ngoo ri pang" thoug nyid da" byen cang- Timothi' yo" nga" byumyu" nghoid da" Luki Yason yo" Sosipata gi nanu" ri u" kaid ago".
22 He: mougsoug" lhid" su: gi ngoo Tertiu nyang: lhid" da" zi nghoid. Ngoo we' phung: byu dayug khyo" nanu" ri u" kaid zi nghoid.
23 Ngoo ri being" di" su:- phung: byu yi akyu" mho' zeing: foem: nyid da" yhoem: seing: Ge-u we' nanu" ri u" kaid. Hau: yoomo ngei deig, zoem: su: Erastu eig yug Kuartu we' nanu" ri u" kaid.
24 Ngoo nu" da" Aseing Yesu Khristu da" jeju" ri nanu" dangain" mo shau" kham: zo: boem baja" o" Amen.
25 Mangsoo: da" phung" yoeb myho, nhoo: ri ngoo nu" coung" nghei" boem shang ngoo khyo" kyo" tid Khristu Yesu da" lu dang: gi khyo" we' shid phyang" pyaid mo, zau" to" da" no thang deingmain" tarha" khyoo: ri toin" shid khyo" we' Mangsoo: gi ngoonu" da" loem jeing" khyoo: ri geing: teing nhang:.
26 Nghoid loug we' Akhid" uri hau: tarha" gi Lapi yi da" jhoem: dang: khyo" wigi bang myang thu' loo nhang: abye:. Byumyu" bain sho' mo gi Mangso da" mungdang: ri yo" tam" gyo: lo boem wa shid re" apyaid atoo: dei nyid da" Mangso amyeung" yo" dakhyoo" ti" hau tarha" ri tid fu" kaid bye:.
27 Dayug kyeing" nghoid lho: dangain" ri yo" myang se' da" Mangsoo: gi Aseing Yesu Khristu khyo" wigi apyaid atoo: moo bug thu' sheing" jhu" da" myonhoo: phung" yoeb dajo jo nyid baja" o" Amen.