15
1 Apyaid' ato: da" Mangsoo: ri loem" jeing" khyoo: nheigloem: geing: teing yoem: boo mo, ngoonu" gi- loem" jeing" nheigloem: yoem nu: mo ri loem" jeing" khyoo: abyo, loo" wa shid re" bo pang" thoug ge. Ngoonu" gi ngoonu" nya: myid pyo: khyoo: ri za: akoid' goo".
2 Ngoonu" yug khang" moo" gi- nyang: nya: byencang" ge da" khyoo: ri myid yu" lho:- loem" jeing" khyoo: geing: teing sho' ngeipyoo: nhang: ge.
3 Khristu gi nya: da" akyu" ri re" sho: khare" zi anghoid. Aseing gi nya: akyu" shoo: wa tho' moo jhoem: mungdang: moo- Aseing ri subi" juang" yi da" khyoo: gi gyeing" nyang: ngoo ri juang" yi khyoo: nghoid- ga: wigi tid to" zi yo" dakhyoo" ti" subi" juang" yi da" khyoo: kham zo.
4 Jhoem: mungdang: moo lhid" to" da" khyoo dangain" gi- kham zeing: yoem: vhoo" yo' nheigloem: geing: teing khyo" nyang: nya: nheig byu loem" jeing" khyoo: ri yo" yu wa shid re" ngoonu" ri jhau" shed tid kyeing" to" da" mungdang: nghoid.
5 Nanu" dangain" mo gi- Khristu koid shug aved asam" ri cang lho: wigi nheigloem: ung: khoug: daloem: za: boo wa shid re" kham zeing: yoem: vhoo" yo" geing: teing nheigloem: ri kaid byid: da" Mangsoo: gi Nanu" ri pang" thoug nyid baja".
6 Houg: lang" she' nanu" gi dakhoin" dathui: za: yo' ngoonu" da" Aseing Yesu Khristu da" nya: phoo' Mangsoo: ri damyeing" dathui: yo' za: yo" coung" nghei" nyid boem wa.
7 Houg: yoomo Khristu gi nanu" ri lhoem: kham: yu yhang: ti" Mangso da myonhoo: phung" yoeb doug bang: loo wa shid re" nanu" we' nyang: cang" nyang: lhoem: kham: yu go" nyid ge.
8 Khasu" wim gari Mangsoo: gi dang: thang" cab zung" su: nghoid yoomo phoug" phyid" yi ri tid to" dang: theing khoin" byeung: loo nhang: wa shid re" gyoo" lo ein: ngoo tid nau.
9 Houg: yo' dakhyoo" ti" tungbau byumyu" yi gi Mangso da nheigkhyeig da" khyoo: ri shau" cung" nghei" wa shid re" we' nghoid . Jhoem: mungdang: moo
Houg: yoomo ngoo gi tungbau da" byumyu" yi da" khoug: moo Mangso da" phung" yoeb ri coung" nghei' byid wa.
Nya: myeing" khyang" ri coung" nghei lid jhoem" kaid wa- ga: tid to" zi yo" dakhyoo" ti" nghoid.
10 Jhoem: mungdang: moo doem tid zi gi
Tungbau byumyu" yi we" Aseing da" byu phung: yi yo' dage" ngeipyo: gau yi nyid ge" ga wigi we'.
11 ?Tungbau byumyu" bain sho' bang: we" Aseing ri coung" nghei byid: ge'
byumyu" bain sho' mo, we" nyang: ri coung" byid: nyid ge'? ga: tid to".
12 Xo' lho: Esaia tid zi gi Yesu da" nya: myid: nya: zoo: dayug gi nyid ri" wa-
tungbau byumyu" ri vhoeb' khang: wa shid re"
nyang: gi tungbau byumyu" ri tu: to' vhoeb' khang" nhang: lho:
nyangnu" gi nyang: moo nheig shid: nheig deig da" nheig byu, nheig nhei: khyoo: yoo" wa-
ga: tid to".
13 Gyeungshang: da" Venyi: phung" yoeb gi nanu" da" loem" jeing" nheig shid: nheig deig da" khyoo: ri geing: teing tho' moo geing: teing loo wa shid re" loem" jeing" nheig shid: neig deig nhang: da" Mangsoo: gi nanu" da" loem" jeing" yoomo nanu" ri gau yi ngei pyo: joeb byeung" nhang: zi yo" myenjham" khyoo: ri byid: baja" o".
14 Mangnhung" yi we" nanu" gi ge da" khyoo: ri nghoid loug we' phajhi" juyi yo" nghoid loug we' Joeb byeung" lho:- nyang: cang" nyang: yo" jhoug" yo" mho' go" da" khyoo: ri ngoo loem jeing" nyid.
15 Nghoid loug we' he: moug: soug" moo moozoo" dayham" yo" lho: nanu" ri tid poin" da" khyoo: moo ngoo gi mougsoug" bang, bang, lhid" to" zi nghoid.
16 Hau: da" amyeung" zeing gi tungbau byumyu" yi jhang moo moo" voin wa shid re" Khristu Yesu da" deizoo: yo" bue" da" khyoo: nyang: nghoid bye:. Gyeungshang: Venyi: khyo" tungbau byumyu" yi Mangsoo: vhoo: ngei da" xoin" du: bue" loo wa shid re" ngoo gi khainjung dayug yhang: ti" Mangso ngeibu: lu dang: ri kho" kyo" moo" voin vu nyid.
17 Houg: yoomo ngoo gi Khristu Yesu yo" dadeing: daloem: za: nyid lho:- Mangso da" moo" ri yo" voin nyid yoomo ngoo yo" nghoidboin: nyid bye:.
18 Tungbau byumyu" yi gi Mangso da" mungdang: ri tam" gyo: lo boem wa shid re" Khristu gi ngoo ri tid khyo" we' zei moo" khyo" we' ci nyid khyoo: ri ngoo agyug asho' loo tid kyoo" wa.
19 Houg: su" Mangso da" mungdang: ri yo" tam" gyo: lo da" khyoo: gi ngoo tid dang: zei so' yoomo we' goo" ki lid toin" shid da" mau" pho" moozoo" yoomo we' young" gyeing" Venyi: da" yoem: vhoo" yoomo we' nghoid nyid. Houg: su" nghoid yoomo ngoo gi Yerusalem voomoo" mo Iluri moug: joyoo khyi khang" moo" moo ju" sho' Khristu da" ngeibu: lu dang: ri kho" kyoo" bye:.
20 Subi" qei" to" da" ayang: tho' moo anau pug koid. Nga" nheigloem: moo gi Khristu da" khyoo: ashoug" gyo: yu" shi" da" jo yoomo za: ngeibu: lu dang: ri kho" kyoo" wa shid re" myid to".
21 Jhoem: mungdang: moo
Hau: yug da" khyoo: ri hang" we' atid yu nghoid loug we' nyangnu" gi shau" myang boem wa.
Ashoug" gyo: yu" nghoid loug we' nyangnu" gi se' gyo: boem wa- ga: lhid" to" zi yo" dakhyoo" ti nghoid nyid.
22 He: da" khyoo: yoomo ngoo gi myoo" sho' lheung: yoem: kaid yu" nghoid loug we' nanu" jhang moo ayo" ju" ri.
23 Nghoid loug we' ngoo gi he: joyoo moo zi ci: ca" da" moo" ri bain zei pyam bye:. Nanu" jhang khyoo: ri" wa shid re" zain void myang" sho' mo nyang: nheigloem: moo bo jo zi yo" dakhyoo" ti"
24 Akhid" nanu" jhang moo ju" re" wa ein: myid byu to". Ngoo Spin: mung" khyoo: gyung: so" lo" da" uri- nanu" jhang khyo" vang jang: wa shid re" myid soin: to". Nanu" jhang moo daso' re" theing: jang: lho:- Spin:: mung" khyoo: gyung: xo' so" loo" wa shid re" ngoo ri pang" thoug kaid nhang: nau.
25 Nghoid loug we' akhid" lei lei zoo: ngoo gi- Mangso da" phung: byu yi ri pang" thoug byid wa shid re" Yerusalem voomoo" khyoo: yhi: ca" .
26 Khasu" wim lha" ga: ri Makedoni mung" yo' Greek' mung" phung: byu yi gi- Yerusalem voomoo" moo zheing: nyid sho" jhen: da" Mangso: phung: byu yi ri Alu: jhungshug yhe: di" byid: wa myid phyed to" zi nghoid.
27 Nyangnu" hougsu" pang" thoug go" da" khyoo: gi- gootu: yoomo anghoid. Nyang: nheig myen: khyo" yoomo za: danghoid'. Gyeing" nyang: ein: rigi hau: sho" jhen: mo ri pang" thoug wa zi gi Nyangnu" moo yoovoin bo zi nghoid. Yuda byumyu" yi gi tungbau byumyu" yi yo" dage" Venyi: mainkaid jeju" joem' ri nyangnu" ri gam byid: rigi tungbau byumyu" yi we' Yuda byumyu" yi ri zoo: wa void wa moozoo" moo pang" thoug eung: nyid.
28 Houg: yoomo ngoo gi yo" khyu: yu da" alu: ngei ri nyangnu" ri yhe: yo" byid lho: ri she Spin:: mung" khyoo: gyung: xo' so" loo" wa nghoid. Khyoo: eung: yoomo nanu" jhang mo: vang jang: loo wa.
29 Ngoo nanu" jhang ju" lang" Aseing Yesu da" jhang mo joeb byeung" da" mainkaid jeju" shau" kham: zo: boem wa shid re" ngoo vang jang: loo zi nghoid.
30 Mangnhung" yi we"- Aseing Yesu Khristu ri ngoonu" loem khoug; yoomo we' Young" gyeing" Venyi: gi ngoonu" ri nheig. Khyeug jheddab yoomo we' nga" shid re" ngoo yo' dage" Mangso jhang moo yoem: kaid akyu" mho' wa shid re" nanu" ri ngoo yoem: byid: kaid.
31 Aseing Yesu ri goolhoo' aloem" jeing" da" Yuda byu yi ngoo ri kuang jangmo yo" loid, loo" wa shid re" we' ngoo gi: pang" thoug da" khyoo: ri Yerusalem voo moo nyid da" young" lho' Mangso da" phung: byu yi goug goug yi yi yo" lhoem: kham: yu wa shid re" akyu" bo mho' byid: ge.
32 Hau: thang: ri Mangsoo: vho: ngei nghoid ri gi- ngoo gi goug goug yi yi nanu" jhang ju" re" lho: nanu" yo" dage" shau" nyid wa nghoid.
33 Myen jham" da Aseing Mangsoo: gi nanu" dangain" mo yo" dage" danyid" nyid" baja" o"- Amen.