13
1 Byu dangain" mo asuya zoug: yi da" amyeung" ri tam" gyoo: ca". Khasu" wim ga ri kha: asuya' nghoid loug Mangso akhang" mo za: anghoid ri hang" zoug: ayo" koid. amyeung" akhang" yo" da" zoug: yi gi Mangsoo: wigi soin' too" shau" mo nghoid.
2 amyeung" akhang" yo" da" asuya ri thoug shang" tu: mhug su: hang" nghoid loug we' Mangsoo: nyheung' soin' da" khyoo: ri thougtheung tu: mhug su: nghoid. Houg su" koid su: hang" we' nya: yooboo dam shau" kham: zoo: wa.
3 Byu gi yi gi asuya zoug: yi ri gyoug nyid anoo". Akhyeing" age moo" ri zei: nyid su: za: gyug ca" zi nghoid. Nang gi amyeung" akhang" yoo" mo, ri agyug loo: nyid nau la". Houg: rigi ge da" moo" ri zei: nyid we'. Houg: lang" zoug: yi nang ri coung" ngei byid: wa.
4 Khasu" wim ga ri nyang: gi nang ri akyu" koid baja" ga: Mangsoo nyheung' nyhid: to" da" deizoo: nghoid. Nghoid loug we' nang age da" moo" dazei: nyid nghoid rigi hau: zoug: ri gyug ca" . Khasu" wim ga: ri nyang: gi gyeing" nyang: yooboo yo" byid: da" akhang" yoo" su: nghoid. Hau: yug gi apyaid ato: Mangso da" deizoo: nghoid yoomo age da" moo" zei: mo, ri Mangso da" gung thid' khyo" yooboo dam kaid dang: phyed wa su: nghoid.
5 Houg: yoomo nang gi Mangsoo: yooboo dam kaid wa zi ri gyug yoomo za we' anghoid shi"- nyang: nya: da" nheigloem: soozoo: lheung: lho: asuya zoug: yi da" amyeung" ri tam" gyoo: ca."
6 He: khyoo: yoomo nanu" gi khang" doug, ri kaid ca". Khasu" wim ga: ri asuya zoug: yi gi nyangnu" da" moozoo" voin vu uri Mangso da moo" bo zei khyo" nghoid yoomo nghoid nyid.
7 Houg yoomo asuya zoug: yi ri byid: eung: da" zi ri byid: nyid ge'. Kheing" kaid eung: su: kheung"- khang" doug kaid eung: su: khang" doug kaid nyid ge'- amyeung" akhang" yoo" mo dangain" ri gyoug phau" myang: nyid ge'.
8 Nanu" nyang: cang" jheddab go" da" jhen: mo lid lho: ce: jhen: we' adab goo" goo". Subi" ri se jheddab su: gi tarha" ri bain cang pyeing bye su: nghoid.
9 Khasu" wim ga: ri subi" myiyi: alhoid'. Byu asaid'. Subi" da" zi akhoug"- myo, no: vhoo: aboo ga: da" Moshe tarha" yo" goo tu: da" tarha" dangain" gi re" yhoem: kyoo" cang ri nanya gung yo" dakhyoo" ti" jheddab we' ga: da" tarha" moo jhung: shoem: nghoid bye:.
10 Nyang: nya: yhoem: kyoo" cang" ri jheddab su: gi hau: yug ri khanham' we' akyu" yoem" loo" nhang: wa zi anghoid. Houg: yoomo nya: yhoem: kyoo" cang" ri jhed' se' dab su: gi Moshe da" tarha" dangain" ri cang nyid su: nghoid.
11 Nanu" gi nyang: nya: yhoeb' joyoo mo so" to' loo wa ayo, ju" bye: zi ri si' yoomo jhed' khyeing: kang: khyeing: tei" go" boem ca" bye:. Khasu" ga: ri ngoonu" khyoid yu shau" wa da" ayo, bidnyid gi Aseing Yesu' ri ngoonu" loem" jeing" shid" da" ayo mo je" ri jhang ju" lo nyid bye: yoomo nghoid.
12 Myen" ayo, lid lo" nyid bye:. Nyid" ju" loo wam bye:- houg: yoomo ngoonu" gi mougcoid' yo' sen: da" ziri acang boem looza: bidbang moo ci: ca" da" gyizuang ri void ci: boem ca" bye:.
13 Ngoonu" gi bidbang mo nya: zoo: yi yhang: ti" ge young" du khyoo: moo za: cang lo" boem ca. Yhid: shug foo" zo: lid khyoo:- akhyeung" ashoeb khyoo:- shava myiyi: yug gi cang zo: khyoo: yo' aved avhu: khyoo:- myeing" myo: yhoo she: zi yo' no" zo da" khyoo: ri jang" pyam lho: bidnyid" gung tu: yo, ti" nyang: daso" nyid shang.
14 Hau: tho' moo Aseing Yesu Khristu ri gyibyi: gyimi su" void ci: ge'. Gung shoo" vho: da" nheig shid: said nau khyoo: moo cang wa asoin' nyid goo".