12
1 Hougsu" nghoid yoomo Mangnhung" yi we"- Mangsoo: gi ngoonu" ri gye jheddab nheig khyeug yoomo Mangso moo" bo voin zi yo" dei nyid da" xoin" du: yhang: ti" bue" wa shid re" nanu" da" gungdu: ri xoin" to" ab noung" pyam ge. Hau: lang" she' nanu" gi Aseing ri deingbyeing" khyo" yo" noku boem wa.
2 Nanu" gi mougmyid asam" aved ri acang nyid goo" nanu" gi Mangsoo: ri nyang: tu: nya: da" nheigloem: xoug" bain sho' thid pyam lho: nheigloem: ung: khoug: aseig khyo" kham: yu ge'. Hougsu" koid lang" gi geda" khyoo: Mangsoo: vho: da" khyoo: ce: yooboo foin: jang: ajo lo: da" khyoo: ga: da" Mangsoo: vho: da khyoo: gi ci nghoid ga: ziri nanu" yo" se' lo boem wa.
3 Nanu" gi nyang: nyang: te: nghoid da tho' mo jain" lho: nghoid aboin: goo" wa shid re" ngoo ri Mangsoo: byid da" Venyi: jeju" jhungshug ri yu" lho:- nanu" dangain" mo jhang khyoo: ngoo tid pyeing: kyo" kaid. Nanu" yug khang" moo" gi nyang: nya: gungdu: ri phung' yau shang apyang: wa khyo" myid yu" nyid boem ge.
4 Ngoonu" da" gungdu: moo akung: ako' myoo" sho' bo wigi hau: akung: ako' loem: khang" moo" gi nyang: moo" nyang: bo boem.
5 Houg: yo" dakhyoo" ti" ngoonu" gi myo" sho' bang: nghoid loug we' Khristu yo" dadeing: daloem: za nghoid boem yoomo gungdu: daloem: mo da" akung: ako' za danghoid. Ngoonu" dangain" mo gi- daloem: yo" daloem: tei" xo' go" to" da" gungdu: akung: ako' za danghoid nyid.
6 Hougsu" nghoid yoomo ngoonu" yug kang" moo" gi nyang: nyang: yo" kham zoo: da" jeju" yo" dakhyoo" ti" Mangsoo: byid: da" jeju" ri se' ci yhoung: boem ca". Ngoonu" yo" yu da" jeju" yo" Mangso mungdang: ri tid nghoid rigi nyang: nya: da" loem" jeing" jo, gyam: yo" dakhyoo" ti" hau: jeju" ri ci: yhoung: nyid boem ca".
7 Gyeing" gyeing" nyang: ngoonu" yo" jeju" gi- subi" ri pang" thoug wa jeju" nghoid rigi pang" thoug nyid boem ca. Jhau" byid: wa jeju" yoo" su: gi- jhau" byid: nyid ca".
8 Ngoonu" yo" yu da" jeju" gi- subi" ri yoem: foin: byid wa jeju" nghoid rigi- yoem: foin: byid: ca" nyang: nya: da" ziyoo jonu" subi" ri gam byid: jeju" yoo" su: gi ngei" ngeipyoo: pyoo: gam, byid: ca". vhujhung: bui" wa jeju" yoo" su: gi yoem: kaid lho: vhujhung: koid nyid ca. Jam joug shau" mo ri pang" thoug wa jeju" yoo" su: gi ngei pyo: gau yi ziyo' pang" thoug nyid baja".
9 Nanu" da" jheddab nheigloem: moo akug void khyoo: dajhi' we' age boo. Nanu" gi anyhoin: athoung" da" khyoo: ri ngheing" lho: wigi ge' lho' da" khyoo: ri vho: ngei nyid ge.
10 Nanu" dayug yo' dayug gi mang: seing: nhung" seing: ri yhang: ti" jheddab kang: tei" go" nyid ge. Dayug wigi dayug ri coung" byid: wa so' phyed nyid ge.
11 Anei" loo: moozoo" jid, zoo" ri yoem kaid zei: nyid ge'. Nheigloem: yoem: booboo Mangso da" moozoo" ri zei: so voin vu nyid ge.
12 Nanu" moo nheig nhei: jang: boo yoomo gau yi ngei pyo: nyid ge. Koug shu: sho" jhen: lo da bidnyid ri geing: geing: teing teing koid nyid ge. Atheung: anoo: loo: akyu" damho' nyid ge.
13 Phoung: byu mangnhung" yi sho" jhen: lo da" uri coem' pang" thoug go" nyid ge. Gyung: so" yen" da" Khristain mangnhung" yiri pang" thoug being" de" nyid ge'.
14 Nanu" ri pyi: sho: shen" yhen' loo mo ri mainkaid dang: tid byid: ge'. Nghoid bye nyangnu" ri atau" nheing" looza: mainkaid dang: da tid nyid ge.
15 Gau yi mo yo" dage" gau yi nyid ge'. Ngau nyid mo yo" dage" bo ngau nyid ge.
16 Nyang: cang" nyang: myid so" nheig tei" go" nyid ge'. Phoug" ashoid goo"- azhei kyeing" moo" ri we' bo pang" zei ge. Nanya: gung ri phajhi" bo ein: nghoid aboin: nyid goo".
17 nanu" ri akhyeing" ashoeb khyo" re" koid su ri latoo: aphug goo". Byu dangain" mo yo" veing" goo" wa shid re" yoem: kaid nyid ge'.
18 Byu dangain" yo" myenjham" ngeipyoo: za: loem" jeing" nyid ge.
19 Bid noem yi we"- khanham' we' dam co' latoo: aphug goo". Mangsoo: za: dam co' latoo: daphug baja" . Jhoem: mungdang: moo Mangsoo: gi- ngoo gi dam co' latoo: phug wa. Nya: yooboo yo" dakhyoo" latoo phug byid: wa ga: tid nyid.
20 Houg: yoomo latoo: phug wa tho' re" jhoem: dang: moo bo zi yo" dakhyoo" ti" koid nyid ge'- Jhoem: dang: moo nanu" da" gyivoo yi zooyoid nyid uri voem: zhoo" ge'. Gyid shed' nyid ri gyid byid: jhug ge. Hougsu" koid lang" gi- nya: da" vhuloem tho' moo dab jo, da" myigyu: foid' boem" byid: zi nghoid ga: tid to".
21 Age khyo" wigi nang ri aoung: loo" nhang:- ge khyo" wigi- age da" khyoo ri oung: loo" nhang: ge'.