11
1 Hougsu" nghoid yoomo ngoo gi myid kaid bye:. Mangsoo: gi nya: da byumyu" ri she: lhei" pyam bye: la". Gyeing" nyang: ashe: pyam. Ngoo nya: gungdu: nyang: lang" Israela byumyu" dayug nghoid nyid. Ngoo gi Abraham mo ko' gyoo" loo su Benyamin kung: moo boo su" dayug nghoid.
2 Mangsoo: gi xangshid" mo wigi nyang: khyen: yu to" da byumyu" ri ashe: pyam- jhoem: mungdang: moo Elia gi Israela byumyu" yi ri tu: mhoug lho:- Mangso jhang moo kau: to" mougsoug" du.
3 Elia gi- Mangsoo: we"- houg: bang: gi Mangso da Lapi yi ri said pyam boem abye:. Aseing da xoin" to phoin: ri lhu: phyo' pyam boem abye:. Ngoo dayug kyeing" deing o". Ngoo ri we' nyangnu" gi said pyam wa shid re" yoem: kaid nyid boem bye? ga: da" dang: ri nanu" asi' goo" la".
4 Hougsu" nghoid loug we' Elia ri Mangsoo: khasu" doem ga: lha". Mangsoo: gi ?Ngoo gi Bala yu phara" ri vhu" pid apid- no' we' ano' mo, byu nyhed khyeing" ri nga" shid re" teung too" byid: bye? ga: wigi tid.
5 Akhid" ayo, moo we' houg: yo" dakhyoo" nghoid nyid. Mangsoo: nheig khyeug yoomo khyen: to" da" byumyu" dajhi' zoo: deung nyid shi.
6 Mangsoo: gi houg: bang: ri nheig khyeug khyoo: khyo" khyen: yu to". Ngoonu" da" aved ri yu" lho: khyen: yu zi anghoid. Gyeing" nyang: Mangso khyen: yu da" khyoo: gi byu avoid ri yu" nghoid rigi nya: nheig khyeug khyoo: gi gyeing" da" nheig khyeug khyoo: anghoid.
7 Houg: yoomo khasu" tid wa lha". Israela byumyu" yigi nyangnu" sho: nyid ziri ashau" boem. Hau: zi ri myang mo gi Mangso khyen: to" da" byuphung: nu" zoo: da nghoid. Jain" nyid mo gi Mangsoo: khi: thui" ashau" gyoo: mo, nghoid.
8 Jhoem: mungdang: moo Mangsoo: gi- nanu" da nheigloem: ri deing lid nhang. Akhid" nyid" ju" sho' nyangnu" gi nyang: nya: da" khyoo: ri myang loug we' amyang boem. Shoug" gyoo: loug we' ashau" gyoo: boem ga: tid to" zi yo" dakhyoo" ti" nghoid.'
9 Hau: tho' moo David khokham gi-
?Nyangnu" da zoo: shug pui" joem gi nyangnu" shid re" teikhuang yhang: ti" we'
thoung: to" lhid yhang: ti" we' bue" nyid wigi nyangnu" gi
Joem: loo" wa yooboo dam kham zo: boem baja.
10 Nyangnu" gi yo" loug amyang nhang: wa shid re" myo, go jo, goo" baja" .
Nyangnu" phyid" doem: we' zheing: voin da yoovoin yoomo
khanham' we' jha" gyau: jo, boem baja" o'? ga: tid to".
11 Hougsu" nghoid yoomo Yuda byumyu" yi gi Mangso mungdang: ri she: pyam boem lho: apyaid atoo: soem" joem: shid: lo" boem bye la" ein: ngoo myid nau. Khasu" nghoid loug asoem" ajoem: loo" wa. Nyangnu" yooboo shoid nyid yoomo tungbau byumyu" yi gi khyoid yu shau" lo. Hidsu" bue" loo yoomo Yuda byumyu" yi gi tungbau byumyu" yiri noo" zo: nheigloem: bo lo boem.
12 Yuda byumyu" yi yooboo shoid khyoo: yoomo myo: lug mainkaid jeju" gi mougmyid goin" byo loo" bye:. Tungbau byumyu" yi we' mainkaid jeju" byeung" sho' yo" kham: zoo: bye:. Hougsu" nghoid ri Yuda byu damyu" goin" gi Khristu ri loem" jeing' kham: yu lo lang" nyangnu" gi mainkaid jeju" lang" shau" kham: zo boem wa.
13 tungbau byumyu" nghoid mo nanu" ri ngoo tid nau. Ngoo gi tungbau byumyu" yi da" lagyoo: nghoid zi yo" dakhyoo" ti" ngoo nya: da" moozoo" moo myonhoo: sho: yo" phau: khuang wa.
14 Ngoo gi ngoonu" byumyu" yi ri no" zo: da" byu nheigloem: ri kaid byid khyo" hau bang: khoug: mo dayham" gi khyoid yu khyoo: yo" shau" yu boem wa.
15 Mangsoo: gi nga" da" byumyu" ri she: pyam da" uri mougmyid byu yi ri nya gyivoo nghoid nyid jangmo bidnoem yi bue" loo nhang:- hougsu" nghoid yoomo Yuda byumyu" ri Mangsoo: doem kham: yu da" uri- Khasu" bue" loo wa lha". Shid: mang ri doem dei loo nhang: yhang: ti" mau" pho" moozoo" bue" loo wa nghoid.
16 Nyang: yo" da" zooyho' mo dajhi' za: yu lho: Mangsoo: ri xoin" ngei" nghoid ri zooyho' dangain" ri xoin" ngei" byid zi yo" du nyid. Seiggam mo seig gyi ri xoin" ngei" byid: nghoid ri seiggam goin" xoin" ngei" byid zi yo du.
17 Byu yi gi zhainloin:: gi akung: yi dayham" ri cu: khyo' pyam lho: deing jo, da" anghoid moo zhainloin:: lam" akung: ri doem xo lho: sho" too" se' nyid boem. Hau: zhainloin:: lam" gi agam gyid: ri jhoeb' yu yhang: ti" Tungbau byumyu" nghoid mo nanu" gi Yuda byumyu" yi jhang mo akyu" jeju" myoo" sho' shau" kham: yu boem.
18 Houg: yoomo nanu" gi cu: khyo' pyam shau" da akung: yo" du mo ri ayu" rui" goo". Nanu" gi khasu" ein: nghoidboin: nyid go" lha". Nanu" gi akung: ako' za danghoid' yoomo seig gyi: ri yoem: yo" pyeing byid: wa zi anghoid. Agyi: gi nanu" ri yoem: je yo" pyeing byid.
19 Nghoid loug nanu" gi- ngoonu" ri joyoo byid: wa shid re" zhainloin:: akung: gi yi ri cu: khyo' pyam anghoid goo" lo" ga: wigi tid goo" wa.
20 Nanu" tid zi yo" dakhyoo" we' deing: houg: bang: cu: khyo' pyam shau" da khyoo: gi nyangnu" gi Mangsoo: ri aloem khoug: boem yoomo nghoid. Hau: su wigi nanu" gi Mangsoo: ri we' loem" jeing" yoomo zhainloin: gam mo dakhyam" dayam' yo" bue" lo boem. Nghoid loug we' nanu" da gung ri nghoid aboin: loo za gyoug zid" nyid, ge'.
21 Mangsoo: gi zhainloin:: gam mo akhang: dab gu akung: yhang: ti" nghoid mo, rilang" vhoo" abyid: nghoid rigi- khasu" wigi nang ri vhoo" se' byid: wa la".
22 He jang" moo Mangsoo: gi- khayhi' gyeing" nheig khyeug shoo" se' myen: da" khyoo: yo' khayhi' gyeing" noo sho' yooboo dang: se' kho: da" khyoo: ri ngoonu" shau" myang boem. Mangsoo: gi yooboo shoid mo ri gye thain: sho' yooboo dam yo" byid nyid da" khyo" ein: ri nanu" gi Mangso nheig khyeug khyoo: ri yo" xo kham: yu sho' cang koid zei: so' ri gi Mangsoo: gi nanu" da" tho' moo nheig khyeug nheig myen: nyid wa zi za nghoid. Hau: nheig khyeug myen: da" khyoo: ri shau" kham yu sho' akoid' acang loem boem ri koem' gi nanu" ri we' Mangsoo: gi cu: khyo' pyam wa.
23 Yuda byumyu" yi gi nheigloem: thid' lho: Mangsoo: ri loem" jeing" lo boem nghoid rigi anghoid moo akung: doem xo' toid lho: sho" to" zi shau" boem shi" wa. Mangsoo: gi he: da" moo" ri yo" zei: su: nghoid.
24 Dang: thang: said ba ein: rigi tungbau byumyu" nghoid mo nanu" ri akhang: nanu" nya: da" zhainloin:: shi" lam" kung: mo zain: phyed yu lho: nanu" da" akhang' mo agam nghoid da" zhainloin:: gi mo ako moo yo" xo' sho" nghoid rigi akhang: zhainloin:: akung: gi nghoid da" mo- Yuda byumyu" yi ri akhang: zhainloin:: gam zeing, moo doem xo' sho" too" wa zi gi je lei wa anghoid la".
25 Mangnhung" yi we"- nanu" gi nyang: nya: da" gungdu: ri gye se' nheig bo ein: amyid wa shid re" ngoo gi Mangsoo: zau" yhoem" to" da" no thang da" khyoo: yi ri nanu" ri tid khoo" nau. Hau: zau" yhoem" to" da no thang da" khyoo: gi hidsu" nghoid. Yuda byumyu" yi gi khanham' we' vhuloem thain: nyid wa zi anghoid. Khyoid yu khyoo: ri shau" wa da: tungbau byumyu" yi bainsho' Mangso byu yi bue" lo da" yo ju" sho' za nghoid.
26 Hau: thang: rigi Mangso wigi Israela damyu" goin" khyoid yu shau" wa zi nghoid.
Jhoem: mungdang: moo Khyoid yu da" Aseing gi Ziun boem mo thu' re" lho:
Yaku da nya: myid: nya: zoo: yi jhang mo
anyhoin: athoung" khyoo: dangain" ri soid' pyam wa nghoid
ga: wigi toin" shid wa zi nghoid.
27 Ngoo Mangsoo: gi houg: bang: da" yooboo dangain" ri khyoid byid: uri
nyangnu" yo" he: thang" cab' too" wa>>
ga: wigi tid to" zi yo" dakhyoo" ti" nghoid.
28 Khasu" wim ga: ri ludang: gi ri she: pyam yoomo Israela byumyu" gi Mangso da gyivoo bue" loo bye:. Hang" bue" loo da" khyoo: gi tungbau byumyu" yi nanu" akyu" yoo" wa shid re" nghoid. Nghoid loug we' Mangsoo: gi nyangnu" ri khyen: yu yoomo nyangnu" da" phoug" phyid" yi ri byid kaid da" dang: theing khoin" ri yu" lho: nyangnu" ri jheddab ashi".
29 Mangsoo: gi hang" ri nghoid loug khyen: yu lho: mainkaid jeju" byid: wa ga: bain phyed: to" thang: ri nheigloem: ase' fain" loo: su: nghoid.
30 Tungbau byumyu" ein: da" nanu" gi- dalheung: ri Mangso da" dang: ri atam" gyo: boem nghoid loug we' akhid" uri Mangso da" nheig khyeug zi nanu" shau" kham zoo: nyid zi gi Yuda byumyu" yi gi Mangso: da" dang: atam" gyo: boem yoomo nghoid.
31 Houg: yo" dakhyoo" ti" Mangso nheig khyeug da" jeju nanu" shau" kham: zoo wa shid re" Yuda byumyu" yi gi akhid" ju" sho' Mangso da dang: ri atam" gyo: boem. Nanu" shau" kham yu da" jeju yo" dakhyoo" ti" shau" kham yu goo" baja.
32 Xangsu: byu yi dangain" mo gi- nya: mungdang: ri atam" gyo: boem yoomo Mangsoo: gi nyangnu" ri thung: loung" da byu yi yhang: ti" bue" byid nhang. Mangsoo: hidsu" koid da" khyoo: gi nyangnu" ri nheig khyeug nheigloem: yo" toin" shid wa shid re" nghoid.
33 Apyaid' ato: Mangso da" jeju" gi gye gye jo nhung: lha".
Mangso da" phajhi" lasi' yo' se' yeig phajhi" gi gye no jo, nhung:
nya: dang: phyed dang: phyed da" khyoo: ri hang" yo" phoid' kyoo" wa lha".
Nya: moozoo" ri hang" se' gyoo: byid: wa lha".
34 Jhoem: mungdang: gi
Hang" gi apyaid ato: Aseing myid soin' to" khyoo: ri yo" si wa lha".
Hang" su: gi Mangsoo: ri phajhi" yo" byid: wa lha".
35 Mangsoo: gi jeju" doem yo" toug" byid: sho'
kha: yug gi Mangsoo: ri jeju" yo" koid wa lha"?
ga: wigi tid to" zi yo" dakhyoo" ti" nghoid.
36 Mangsoo: gi- jo, moojo, ri phain" to" lho: hau: zi joem gi Mangsoo: khyo" wigi we' Mangso shid re" nghoid loug we' dageing: teing" jo boem. Mangsoo: gi apyaid atoo: myonhoo: phung" yoeb doug bang nyid baja" o" Amen.