9
(1 Kh 10:1-13)
1 Sheba mo khokham myhi' gi khokham Sholumon myeing gyi: nyid ga: ziri shau" gyo: wigi yau: da" dang: myid: yo' nyang: ri jham" yu" wa shid re" Yerusalem khyoo: nyang: gyung: so" yhe: lo" da:. Nyang: gi nyang: shu" ci: da" byu phung: moo" yo' dage" nam pyo: ja: joem lug aja: ja: yo' sheing: myoo: sho' ri tho' da" gola-ug phung: ri shu" ci: da:. Nyang: yo' Sholumon shoug" goo" lang" nyang: shau" myid gu: dangain" Sholumon ri myid bye:.
2 Sholumon gi hau: joem dangain" ri doem phuid: sho' kyoo" bye:. Hau: joem gi nyang: phuid: kyoo" wa shid re" athei" youg: nghoid da:.
3 Sheba khokham myhi' gi Sholumon Khokham da" phajhi" ri shau" gyo: ziyo' Sholumon koid da" khokham kho" ri we' shau" myang bye:.
4 Nyang: gi Sholumon da" zoobui" moo joung: to" da" zoo: shug ri we' nya: gyizoug: bang: da" yhoem: joem ri we' nya: khokham kho" mo moo" voin bang: yo' nyangnu" void ci: da" byimi joem ri we' nya: zooshug pui" moo nya: shid re" dei byid: nyid da" dei zoo: yi da" byimi ri we' wigi Noku Yhoem: Moo" khoug: moo nyang: ngei" byid: da" xoin" joem ri we' myang bye:. Hau: joem gi nyang: ri so' aboo loo: sho' mau" hang" nhang: bye:.
5 Nyang: gi khokham ri ?Nang yo' re" phajhi" khyoo: ri nga" mungdain: mo ngoo shau" gyo: zigi joo nhung:.
6 Nghoid loug we' he: joem dangain" ri ngoo nyang: are" yu" cang cang gi ngoo nyangnu" tid ziri ayo" loem" wa nghoid. Ngoo he: gu: mo eig boem mo daboem koo: date: shoug" gyo. Re" phajhi" yo' re" yoo" zoo: yoo" shug zigi ngoo ri tid kyo" tho' je" myo: nyid da:.
7 Re" shidkhoin" moo khanham we' nyid lho: re" phajhi" dang: khyang" joem ri shau" gyo: yu wa akho akhang" yo" boem da" re" dei zoo: yigi khayhi' zhafa: ge la".
8 Re" Mangsoo Aseing ri coung" we' Nyang: gi nang ri khayhi' vho: ngei ziri nang ri nya: myeing khyo" vhoebkhang" wa shid re" Israela khokham koid nhang: da" khyo" wigi ci: shug byid: abye:. Nyang: gi Israela byumyu" yiri jheddab nyid wigi nyangnu" ri apyaid atoo: goem loem byid: nau nyid da:. Tarha" yo' tarha" deing: byeung" khyoo: ri yo" zoem: wa shid re" nyang: nang ri nyangnu" da" khokham koid nhang: bye: zi nghoid? ga: tid.
9 Nyang: gi khokham Sholumon ri nyang: ci: lo da" jhungshug ri byid: bye:. Hau: joem gi sheing: wim tain: koo yo' nam pyo: ja: yo' lug aja: ja: gye" myoo: sho' nghoid. Sheba khokham myhi' wigi byid: da" ge da" nam pyo: ja: ri nyang: khanham we' ayo" kham: yu yu" nghoid da:.
(\v 10 Khokham Hiram yo' khokham Sholumon da" lhid ku" bang: gi Ophira mo sheing: ci: lo ago". Nyangnu" gi junipa: seig joem yo' lug aja: ja: ri we' yu lo da:.
11 Sholumon gi hau: seig joem ri Noku Yhoem: Moo" yo' khokham kho" mo zoem" lhang: koid lho: music phung: bang: shid re" teing yo' teing shi: koid jang" moo ci: da:. Yuda mung" moo houg: yhang: te" zi shid phyang" khanham we' amyang yu" nghoid ago".)
12 Khokham Sholumon gi Sheba khokham myhi' ri nyang: mho' gu: ja: khang" moo" ri byid: bye:. He: zigi nyang: voin re" da" jhungshug thid jang" moo loung: byid: zi nghoid da:. Hau: thang: nyang: yo' nya: thang: cang bang: gi Sheba mung" khyoo: doem tau" lo" ago".
(1 Kh 10:14-25)
13 Zain khang" zain khokham Sholumon shoug" yu da" sheing: gi 25 tain: jain" nghoid da:.
14 Hau: tho' ago" oung" zoo: oung" shug bang: yo' phaga: ga: bang: wigi byid: da" kheing" we' bo da:. Arabia khokham yi yo' Israela mung" du zoug: yi wigi we' ngei yo' sheing: joem ri ci: ri" byid: ago".
15 Sholumon gi goo dakhyab moo baid to" da" sheing: 4 joid: wigi tab to" da" goo zeing eig shoo: khyab ri koid da:.
16 Houg: lho: dakhyab moo baid pye" to" da" sheing: eig joid: jain" wigi tab to" da" goo zoo: soem" shoo: khyab ri we' koid da:. Nyang: gi hau: joem dangain" ri Lebanon seig moo" yoo beingdo, moo kaid to" da:.
17 Khokham gi khokham zhungtang zeing daloem: ri we' koid da:. Houg: moo: dadu ri xang: zei yo' tab lho: deing da" gu: rigi sheing: gyeing" wigi tab pyam da:.
18 Hau: zhungtang khyoo: do, yhi: wa zoem" lhang: khoem: khyug khoem: dab lho: houg: moo sheing: tab to" da" khyid: nang: tang tab to" da:. Zhungtang eig shoid moo lo, zei: dab wigi shoid khang" mo" moo khang: khyi: lhoo: shab to" da:.
19 Zoem" lhang: moo khangkhyi lhoo: daxe: eig loem: dab lho: zoem" lhang: khoem: khang" moo" mo athang: thang: moo khangkhyi lhoo: dadu: du: dab da:. Gootu: kha: mungdain: moo we' he: zhungtang yo' du zi khanham we' ajo, yu" nghoid da:.
20 Khokham Sholumon da" koem: joem dangain" we' sheing: yo' koid lho: Lebanon seig moo" yoo ga: da" yab do, moo" mo oug" khu lang: bain dangain" we' sheing: yo' koid to" da:. Sholumon da" apyaid moo ngei ri phoug" dab ja: ga: ajhoo: goo" nghoid da:.
21 Nyang: gi khokham Hiram da" gyid sangphoo joem yo' dage" panglai: gu: da" gyid sangphoo joem dajoem yo" da:. Nya: da" gyid sangphoo joem gi soem" zain ri dalheing: tau" lo lho: sheing:- ngei- xang: zei- myoug no,- myoug ni joem ri tho' lo ago".
22 Khokham Sholumon gi mougmyid dang mo khokham gootu: dangain" mo tho' jonu" je yo" lho: phajhi" je boo su: nghoid da:.
23 Nyangnu" dangain" bang: gi Mangso wigi nyang: ri byid: to" da" phajhi" shoug" gyoo: wa shid re" nyang: yo' sham: ago".
24 Nyangnu" mo yugkhang" moo" gi jhungshug khyo" ngei zi sheing: zi joem byisheing: joem gyi: jonu" joem- zoo xoin" nam pyo: cid" joem myang: joem loo kung" joem Sholumon ri byid: ago". Zain khang" zain hougsu" xo' koid nyid ago".
25 Khokham Sholumon gi nya: da" myang: rheing" yo' myang: joem shid re" myang: khoem: myid: khyeing" yo" da:. Houg: lho: myang: jui: da" myang: damoin eig khyeing" yo" da:. Nyang: gi hau: joem mo dayham" ri Yerusalem moo to" lho: deing da" gu: rigi gootu: voomoo" myoo" sho' moo to" to" da:.
26 Nyang: gi Uphrad gyid lang mo zi Philisti yo' Egutu mung" mougkyoo" ju" sho' mo mougmyid moo vhoeb da" khokham yi dangain" tho' mo gyi: thang su: nghoid da:.
27 Nyang: vhoeb da" ayo, gyoo: moo ngei gi Yerusalem moo jo, da" lug boem yo' dakhyo"- shamu thi" gi Yuda boem khyid: mo yu" yu" phofoem gam yo' dakhyo" agoin agoo" bue" jo, da:.
28 Sholumon gi myang: joem ri Musri mung" yo' gootu: mung" khang" moo" mo qei yu da:.
(1 Kh 11:41-43)
29 Sholumon da" mhoomyid: apoem: ayang: mo zi athang: ju" sho' gu: mo deing gu: ri Lapi: Nathan da" mhoomyid: pug moo we' Shilo mo Ahiya da" Lapi: dang: lhid" xoem" pug moo we' Israela khokham Yeroboam da" khyoo: we' bo lhid" to" da" Lapi: Ido da" yoeb myang lhid" xoem" pug moo we' lhid" xoem" to" ago".
30 Sholumon gi Yerusalem mo Israela mung" goin" ri zain loem: myid: xi: vhoeb da:.
31 Nyang: shid lo" byug wigi David da" voomoo" moo myhoeb pyam ago". Houg: lho: nya: yuggi zoo: Rehoboam gi nya: khoo: moo khokham xo' koid da:.