8
(1 Kh 9:10-28)
Sholumon gi Noku Yhoem: Moo" yo' nya: khokham kho" ri eig xi: zain koid da:. Nyang: gi khokham Hiram wigi byid: da" voomoo" joem ri we' doem de: lho: hau: jang" moo Israela byu yiri yhe: nyid nhang: da:. Nyang: gi Hamad yo' Zoba mougmyid ri seing: yu lho: Dain" pyoid yoo moo Palmura voomoo" ri gye" geing: teing sho' koid pyam da:. Nyang: gi zookhoo: too" wa shid re" joyoo agung nghoid da" Hamad mo voomoo" joem ri we' doem de: da:. Sholumon gi vhoo: mo voomoo" joem ri we' doem de: da:.- Hau: joem gi tho' Bed Horon- vhoo: Bed Horon (Khoem" yo' Khoem" kyang dab to" da" geing: teing voomoo" joem) Balad voomoo"- he: voomoo" joem dangain" gi nyang: zookhoo: to" wa yo' nya: da" myang: joem yo' myang: rheing" joem to" to" da" voomoo" joem nghoid ago". Nyang: gi Yerusalem mo Lebanon mo nyang: vhoeb da" mougmyid jang: sho' mo nyang: soin' to" da" gu: dangain" ri bui" sho' koid da:. 7-8 Sholumon gi mungdain: ri nyangnu" seing: yu boem uri Israela byu yi wigi asaid pyam loo teing too" shau" boem da" Khanan byu yi da" amyed ashen yi dangain" ri moo" joem zei: nhang: da:. Houg: bang: gi Hiti byu- Amori byu- Perizi byu- Hivi byu- Yebusi byu yi nghoid wigi houg: bang: da" amyed ashen yigi akhid" ju" sho' xo' wigi join bue" nyid ashi". Israela byu yiri gi moo" joem azei: nhang: nghoid da:. Nghoid loug we' gyizoo: yi gyizoug: yi myang: rheing" koin" zoug: yi yo' myang: jui: bang: khyo" gi moo" zei: da:. 10 Yhoem: koid da" moo" aja: ja: moo join moo" koid da" byu yi adang moo yu" gung" wa gyizoug: 250 yug nyid ago".
11 Sholumon gi nya: yhoem: seing: myhi'- Egutu khokham myiyi: zoo: ri David da" voomoo" mo zi nyang: shid re" koid byid: da" yhoem: khyoo: phung" yu da:. Sholumon gi ?Nyang: gi Israela khokham David da" khokham kho" moo age nyid Ciwim gari Dang: Theing Kuid: jo, da" joyoo khamoo: nghoid loug we' hau: zigi gyeung" shang: da" joyoo nghoid yoomo nghoid da? ga: tid da:.
12 Sholumon gi Noku Yhoem: Moo" shidkhoin" moo nyang: koid to' da" phoin: dang moo Aseing ri xoin" ngei" byid: da:. 13 Gyeung" shang: da" bidnyid khang" moo" shid re" Moshe da" tarha" moo tid to" ziri cang wigi nyang: gi nghe' ngei" xoin" ngei" byid: da:. Hau: bidnyid joem gi Dougno: Bidnyid lhoo' xain" pui" bidnyid dazain moo: dalheing: koid da" doocid" akaid da" zooyho' zoo: pui"- shivoo: yham" pui"- zoem" pui" bidnyid joem nghoid ago". 14 Nya: phoo David wigi to" too" kho' da" tarha" joem ri cang wigi nyang: gi coung" nghei ziyo' jikhoin" khoin" jang" moo yo' khainjung yi moo" zei: jang" moo bo pang" tug boem da" Levi byu yi yo' khainjung yi da" nyid" khang" nyid" moo" ri soin' too" byid: da:. Nyang: gi Mangso byu David wigi amyeing" byid: to" ziyo' dakhyo" khoem" duang: khang" moo" moo ayo, adu khyo" cang wigi nyid" khang" nyid" moo" zei: wa shid re" Noku Yhoem: Moo" goem loem bang: ri we' soin' to" da:. 15 David wigi khainjung yiri yo' Levi byu yiri zi too" yhoem: joem yo' gootu: moo" zoo" yo' sen: wigi jhau" shid too" kho' gu: ri jid" jid" nug nug koid ago".
16 He: ayo, ju" ri Sholumon da" moo" zoo" joem dangain" bain abye:. Aseing da" Noku Yhoem: Moo" apoem ayang: koid shid" jang" moo bain da" ayo, ju" sho' mo moo" dangain" oung: doid da:.
17 Hau: thang: Sholumon gi Edom mung" moo jo, da" Thoem" ni gyid guid" gyid yam mo Eziongebera yo' Elad khyoo: yhe: da:. 18 Khokham Hiram gi nya: da" gyizoug: yi yo' lhid ku" yu" bye: bang: shu" vhu" she: da" akhoug: moo gyid sangphoo ri Sholumon da" gyizoug: yi yo' dage" Ophira mung" khyoo: gu: yhe: lho: Sholumon jhang khyoo: sheing: daxe: khyug tain: jain" ci: loo byid: da:.