6
(1 Kho 8:12-21)
Hau: thang: khokham Sholumon akyu" mho'
?Aseing we"- nang gi nyid wa joyoo ri jhoemmoug" pung yo' moug: coid ri khyen: yu bye:.
Akhid" ngoo gi nang apyaid atoo: nyid wa joyoo daloem: nghoid da:.
Noku Yhoem: Moo" daloem: ri re" shid re" ngoo koid bye:? ga: mho'.
Israela Byumyu" yi dangain" houg: moo yab jo, ago". Khokham phoo gi nyangnu" shoid khyoo: myonhoo: phug lo wigi Mangso mainkaid jeju" nyangnu" adang moo mho' byid: bye:. Nyang: gi ?Israela da" Aseing Mangsoo ri coung" ge'. Nyang: gi nga" phoo David ri ?Nga" byumyu" yiri Egutu mung" mo ngoo shu" thu lo da" ayo, mo akhid" nyid" ju" sho' Israela mung" moo ngoo ri noku wa noku yhoem: koid wa joyoo khyo" voomoo" daloem: ri we' ngoo akhyen: too"- Houg: lho: nga" byumyu" Israela ri vhu' she: wa byu dayug ri we' ngoo akhyen: too". Nghoid loug we' akhid" ngoo gi ngoo ri noku ku" we joyoo khyo" Yerusalem ri khyen: too" bye:. Houg: lho: nga" byumyu" ri vhoeb wa David nang ri khyen: too" bye:? ga: tid da:.
Sholumon gi xo' lho: ?Nga" phoo David gi Israela Aseing Mangsoo ri noku wa joyoo Noku Yhoem: Moo" daloem: koid wa shid re" soin' too" bye:. Nghoid loug we' Aseing gi nyang: ri ?Nang nga" shid re" Noku Yhoem: Moo" koid wa ziri vho: ngei nyid zigi jo, da:. Nghoid loug we' nang gi hau: ziri khanham we' ayo" koid wa. Nga" Noku Yhoem: Moo" ri koid wa su: gi re" yug gi zoo:- nanya: yuggi zoo: aseing: nyang: nghoid ri" wa? ga: tid da:.
10 ?Akhid" Aseing gi nya: dang: theing ri cang pyeing abye:. Ngoo gi nga" pho da" khu moo: Israela khokham khyo" yo" xo' koid bye:. Houg: lho: ngoo gi Israela da" Aseing Mangsoo ri noku coung" wa shid re" Noku Yhoem: Moo" daloem: ri ngoo yo" koid bye:. 11 Ngoo gi Noku Yhoem: Moo" khoug: moo Aseing wigi Israela byumyu" yo' dang: theing koid to" da" Dang:Theing lug pyi" bo da" Dang: Theing Kuid: ri kaid too" bye:? ga: tid da:.
(1 Kho 8:22-53)
12 Hau: thang: byumyu" yi da" shid koin" khyoo: Sholumon yhe: lho: phoin: shidkhoin" moo yab jo, wigi lo, ri tu: ci: lho: akyu" mho' da:. 13 (Sholumon gi gyid: mid" gainbyam: daloem koid lho: hau: ziri vang" agung moo to" to" da:. Hau: zigi sheing: khyoo: pyi: khyoo: shid pe: lam wigi myhang: khyoo: wim: pe: bo da:. Nyang: gi hau: gainbyam: khyoo: do, lo" lho: nyang: ri yugkhang" moo" wigi myang da" joyoo moo poid thug thoug wigi nya: lo, ri moug: khyoo: tu: to" da:.) 14 Nyang: akyu" mho' zigi ?Israela da" Aseing Mangsoo we"-. Mougkhung: mougdi tho' moo we' mougmyid dang moo we' nang yo' du da" yu phara" anyid. Nang gi re" byumyu" yi yo' to" to" da" dang: theing ri zoem: ci: wigi nyangnu" nheigloem: oung: khoug: dangain" wigi nang ri tid dang: gyo: wigi nyangnu" dei nyid yoomo nya: jheddab myid nyangnu" ri nang ci: shug byid: da:. 15 Nang gi nga" phoo David ri to" da" dangsoo" ri cang pyeing abye:. Akhid" nyid" gi dang: khoin" khang" moo" joeb byeung" lo abye:. 16 Akhid" Israela da" Aseing Mangsoo we"- nang gi nga" phoo ri nya: amyed ashen dayug gi ajang" Israela khokham khyo" vhoeb nyid wa ga: dangsoo" byid: to" da" dangsoo" gootu: ri we' jhug zug byid: la. Nyang: nang ri nyeing" za: tid dang: gyo: lo ziyo' dakhyoo" ti" nyangnu" ri we' nang ri tid dang: gyoo: wa shid re" pang" thoug byid: la. 17 Houg: yoomo akhid" Israela da" Aseing Mangsoo we"- re" dei zoo: David ri nang dangsoo" byid: to" da" gu: ja: khang" moo" ri bue" loo nhang: la.
18 Nghoid loug we' O" Mangsoo we"- he: mougmyid dang myi yi: yi yuggi yi da" agyoo: moo nang gyeing" nyang: yo" nyid wa la". Mougkhung: dangain" yhi nghoid rilang" re" shid re" agi" nghoid rigi ngoo koid to" da" Noku Yhoem: Moo" gi khasu" yo" go" wa la". 19 Nga" Aseing Mangsoo we"- ngoo gi re" dei zoo: nghoid. Ngoo akyu" mho' dang: ri tam" gyoo: byid: lho: ngoo nang ri mho' yoid khyoo: ri tam" gyoo: byid: la. 20 He: Noku Yhoem: Moo" ri myen" ri nyid" ri zung" yu nyid byid: la. Hid moo nang noku coung" wa ga: dangsoo" byid: too" yoomo ngoo hid moo he: Noku Yhoem: Moo" khyoo: myonhoo: shu: lho: akyu" mho' dang: ri tam" gyoo: byid: la. 21 Nga" akyu" mho' dang: joem yo' re" Israela byumyu" yi he: joyoo khyoo: myonhoo: shu: lho: akyu" mho' dang: ri tam" gyoo: byid: la. Mougkhung: moo jo, da" re" yhoem: mo ngoonu" ri tam" gyoo: byid: wigi ngoonu" ri yooboo khyoid byid: la.
22 ?Byu dayug gi gootu: dayug ri shoid da: ga: yooboo zhug zi shau" wigi nyang: yooboo ayo" da" khyoo: ri jham' tang: wa shid re" he: Noku Yhoem: Moo" khyoo: shu" loo shoug" lang" 23 O" Aseing we"- mougkhung: mo tam" gyoo: byid: lho: re" dei zoo: yiri dang: phyed byid: la. Yooboo yo" da" yug ri nyang: moin: yi" ziyo' dakhyo" yooboo dam byid: wigi yooboo ayo" da" yug rigi loid byoin nhang: kaid la.
24 ?Re" byumyu" Israela gi nyangnu" nang ri yooboo shoid lho: nyangnu" gyivoo yi wigi khaid oung: pyam zi shoug" lang" nyangnu" re" jhang phug lo wigi he: Noku Yhoem: Moo" khyoo: re" lho: yooboo khyoid byid: wa shid re" nheigloem: nyhoem: khyo' wigi nang ri akyu" mho' lang" 25 Nyangnu" ri mougkhung: mo tam" gyoo: byid: la. Re" byumyu" yi yooboo ri khyoid pyam byid: lho: nang wigi nyangnu" yo' nyangnu" phoug" phyid" yiri byid: to" da" mougmyid khyoo: nyangnu" ri doem shu" tau" loo byid: la.
26 ?Re" byumyu" yi nang ri yooboo shoid boem yoomo nang wigi moug: vo ziri toem' pyam thang: ri nyangnu" nheigloem: thid lho: he: Noku Yhoem: Moo" khyoo: myonhoo: shu: wigi nheigloem: nyhoem: khyo' zoo" re nang ri akyu" mho' lang" 27 O" Aseing we"- mougkhung: mo wigi nyangnu" ri tam" gyoo: byid: lho: re" dei zoo: Israela byu yi da" yooboo joem ri khyoid pyam byid: wigi jo, zi nghoid wa shid re" nyangnu" ri jhau" byid: la. Hau: thang: O" Aseing we"- nang wigi re" byumyu" yiri geing: teing da" moug: khyo" byid: to" da" he: re" da" mougmyid moo moug: voo nhang: la.
28 ?Mungdain: khoug: moo phang" khoug khoug zi lang: yoem" gyo" zi lid lung yo' jhenkhyeug joem wigi gug zoo mei: loem ri phyo' shoin' pyam shau" wigi re" byumyu" yi nyangnu" da" gyivoo yi wigi khaid zain: zi shoug" lang" nyangnu" phung: moo: noobau: phyoobau:- noo phyo" shoug" lang" 29 Nyangnu" akyu" mho' dang: ri tam" gyoo: byid: la. Re" byumyu" Israela yi mo dayug yug nheigloem: gyau: sho' koug wigi nyangnu" lo, ri he: Noku Yhoem: Moo" shoid khyoo: yeing lho: akyu" mho' boem nghoid rigi 30 Nyangnu" akyu" mho' dang: ri tam" gyoo: byid: la. Mougkhung: moo jo, da" re" yhoem: mo nyangnu" ri tam" gyoo: byid: wigi nyangnu" ri yooboo khyoid byid: la. Nang dayug za: byu xangsu: da" nheigloem: myid soin: ziri se' da:. Yugkhang" moo" ri nyang: moin: yi" ziyo' dayhang: ti" koid byid: la. 31 Hau lang" nang wigi ngoonu" phoug" phyid" yiri byid: to" da" mung" moo nyangnu" nyid da" ayo, dangain" moo re" byumyu" yi nang ri gyoug phau" myang: wigi tid dang: tam" gyoo: goo" baja".
32 ?Moug: vi: moo nyid da" tungbau byu dayug gi re" da" gyi: sheung: lho: yoem: so' bo khyoo:- nang gi ajang" moo" zei: wa jen" jen" nghoid nyid khyoo: ri shau" gyo: wigi he: Noku Yhoem: Moo" khyoo: akyu" mho' wa re" loo lang" 33 Nya: akyu" mho' dang: ri tam" gyoo: byid: la. Mougmyid byu yi dangain" gi re" byumyu" Israela byu yi yo' dakhyoo" nang ri se' wigi nang ri tid dang: gyoo: wa shid re" nyang: ri tam" gyoo: byid: lho: nyang: nang ri mho' gu: dangain" ri koid byid: wa. Houg: lang" he: ngoo koid to" da" Noku Yhoem: Moo" gi nang ri noku coung" wa shid re" koid to" da" joyoo nghoid ziri nyangnu" se' loo goo" wa.
34 ?Re" byumyu" yi nyangnu" da" gyivoo yiri gyi khaid wa nang amyeing" byid: wigi nyangnu" khamoo: nyid nyid nang wigi khyen: yu to" da" he: Noku Yhoem: Moo" khyoo: myonhoo: shu: wigi nyangnu" nang ri akyu" mho' boem lang" 35 Nyangnu" akyu" mho' nyid thui: ri tam" gyoo: byid: la. Nyangnu" ri mougkhung: mo tam" gyoo: byid: wigi nyangnu" ri oung: doid nhang: la-
36 ?Re" byu yi nang ri yooboo shoid wigi yooboo ashoid zi dayug we' anyid yoomo nang nheig yo: lho: nyangnu" ri nyangnu" gyivoo yi wigi nang khaid oung: pyam nhang: ziyo' nyangnu" ri gootu: mung" khyoo: thung: byu yi khyo" myheig yu loo" lang" hau: mung" gi gye" ve: nghoid loug we' 37 re" byumyu" yi akyu" mho' dang: ri tam" gyoo: byid: la. Hau: mung" moo nyangnu" nheigloem: thid lho: nang ri akyu" mho' wigi khayhi' yooboo shoid ziyo' nyangnu" khayhi' nheigloem: goid" lo boem ziri yooboo yhen: yu boem nghoid rigi O" Aseing we" nyangnu" akyu" mho' dang: ri tam" gyoo: byid: la. 38 Hau: mung" moo nyangnu" deingmain" ziyo' nheigloem: dain: dain: za: nheigloem: thid pyam wigi ngoonu" phoug" phyid" yiri nang wigi byid: to" da" he: mung"- nang khyen: to" da" he: voomoo"- re" shid re" ngoo koid to" da" he: Noku Yhoem: Moo" khyoo: nyangnu" myonhoo: shu: boem lho: 39 Nyangnu" da" akyu" mho' dang: ri tam" gyoo: byid: la. Mougkhung: tho' moo jo, da" re" yhoem: mo nyangnu" ri tam" gyoo: byid: wigi nyangnu" ri nheig khyeug byid: lho:-re" byumyu" yi da" yooboo dangain" ri khyoid pyam byid: la.
40 ?O" nga" Mangsoo we"- akhid" ngoonu" ri yu" lho: he: joyoo moo akyu" mho' da" dang: ri tam" gyoo: byid: la. 41 Aseing Mangsoo we"- akhid" too' we'. Re" yoem: so' da" asoo" nghoid da" Dang: Theing Kuid: yo' dage" Noku Yhoem: Moo" khyoo: vang yhe: wigi hid: moo apyaid atoo: nyid nyid we' re" khainjung yiri nyangnu" koid da" moo" dangain" moo mainkaid byid: lho:-nang nyangnu" adang moo gi yoomo re" byumyu" yi dangain" ngei pyo: nyid boem goo" baja". 42 Aseing Mangsoo we"- nang khyen: to" da" khokham ri angeug he: pyam. Re" dei zoo: David adang moo nang to" to" da" jheddab myid ri myid boin: byid: la? ga: akyu" mho' da:.