36
(2kh 23:30-35)
1 Yuda byumyu" yigi Yoshia da" yuggi zoo: Yoahaza ri khyen: yu lho: nyang: ri aya: dang: xu: gyoid byid: wigi Yerusalem moo khokham koid nhang: ago".
2 Yoahaza gi nyang: khokham bue" uri apyaid eig xe: soem" zain: nghoid bye: wigi Yerusalem moo lhammoo" soem" khyab vhoeb da:.
3 Egutu khokham Nekho gi nyang: ri thung: byu khyo" myheig yu wigi Yuda mung" ri kheing" khyo" ngei eig khyeing" juid: yo' sheing: eig xi: juid: koid: yu da:.
4 Nekho gi Yoahaza da" nya: nhung" Eliakim ri Yuda khokham koid nhang: wigi nya: myeing ri Yehoiakim ga: thid pyam byid: da:. Yoahaza gi Nekho wigi Egutu mung" khyoo: shu" lo" byug da:.
(2kh 23:36-24:7)
5 Yehoiakim gi Yuda khokham bue" lo uri apyaid eig xe: wim: zain nghoid wigi nyang: gi Yerusalem moo daxe: dazain vhoeb nyid da:. Nyang: gi nya: da" Aseing Mangsoo ri yooboo shoid da:.
6 Babelon khokham Nebukhadneza gi Yuda mung" khyoo: jhen" vang yhe: wigi Yehoiakim ri myheig yu lho: jangcoo" yo' tei" wigi Babelon khyoo: shu" lo" da:.
7 Nebukhadneza gi Noku Yhoem: Moo" mo ju, nu" dayham" ri de" lo" wigi Babelon mo nya: khokham kho" moo hau: joem ri lo" kaid to" da:.
8 Yehoiakim koid lo da" lo, moo" nghoid da" nya: aco' ajhoid lo, moo" joem yo' nyang: shoid loo bye: da" akhyeing" ashoeb moo" bo bo wigi ja: khang" moo" ri Israela yo' Yuda khokham yi mhoomyid: shen" dam pug moo lhid" xoem" to" ago". Nya: yuggi zo: Yehoiakhin gi nya: khoo: moo khokham xo' koid da:.
(2kh 24:8-17)
9 Yehoiakhin gi Yuda khokham bue" lo uri apyaid daxe: shed zain nghoid wigi nyang: gi Yerusalem moo lhammoo" soem" khyab daxi: nyid" vhoeb da:. Nyang: we' Aseing ri yooboo shoid da:.
10 Zain vang khoem" ju" lo lang" Nebukhadneza gi Yehoiakhin ri thung: byu khyo" Babelon khyoo: myheig shu" lo" lho: noku yhoem: jonu" joem ri de" lo" byug da:. Hau: thang: Nebukhadneza gi Yehoiakhin da" nya: goin Zedekia ri Yuda yo' Yerusalem da" khokham koid nhang: da:.
(2kh 24:18-20; Yer 52:1-3)
11 Zedekia gi Yuda khokham bue" lo uri apyaid eig xe: dazain nghoid wigi nyang: gi Yerusalem moo daxe: dazain vhoeb nyid da:.
12 Nyang: gi Aseing yooboo shoid wigi Aseing mungdang: ri tid su: Yeremia da" dang: ri nheigloem: nyhoem: khyo' wigi atam" gyoo: byid: nghoid da:.
(2kh 25: 1-21: Yer 52:3-11)
13 Zedekia gi nyang: ri jhug zug wa ga: Aseing myeing moo nyang: ri agyoo: atho' jham' tang: nhang: su: nghoid da" Khokham Nebukhadneza ri gyi koid thougtheung da:. Nyang: gi nheigloem: thid wa yo' Israela da" Aseing Mangso jhang phug loo wa shid re" nheigloem: thain: wigi he: pyam nyid da:.
14 Hau: tho' agoo" Yuda vhujhung: yi khainjung yi mung" byu yigi nyangnu" lheing khoem mo byumyu" yi da" yooboo shoid da" avoid ri cang wigi yu phara" soolhoo: joem ri no' ago". Houg: lho: nyangnu" gi Aseing nyang: nyang: wigi nyang: gyeung" shang: sho' koid to" da" Noku Yhoem: Moo" ri ayung" alho' koid pyam boem.
15 Nyangnu" phoug" phyid" yi da" Aseing Mangsoo gi nya: byumyu" yiri tid poin" wa Lapi: yiri xo' wigi nhang: kaid da:. Ciwim gari nyang: gi nyangnu" ri yo' Noku Yhoem: Moo" ri teung too" noug yoomo nghoid da:.
16 Nghoid loug we' nyangnu" gi Mangso da" lagyoo: yiri aphoug" akhyoid koid- nya: mungdang: joem ri cishu: anhang:- nya: lapi: yiri yi juang" pyam byid: ago". Houg lho: lo" thang moo nya: byumyu" yiri Aseing da" nheig yo: zigi hang" we' ayo" phang: loid loo sho' sung gyi: byug da:.
17 Houg: yoomo Aseing gi nyangnu" ri gyi zain: wa shid re" Babelon khokham ri shu" yu da:. Khokham gi Noku Yhoem: Moo" moo lang" Yuda zoolu: yiri said pyam da:. Nyang: gi ngi bang: gyi: bang:- myiyi: yuggi noo mo, gi mo, hang" ri we' nheig akhyeug nghoid da:. Mangsoo gi nyangnu" dangain" bang: ri nya: lo, khyoo: ab pyam da:.
18 Babelon khokham gi Noku Yhoem: Moo" yo' Noku Yhoem: Moo" mo ngei sheing: jonu"- khokham yo' nya: gyizoug: yi da" jonu" joem ri phyo' lhoid yu wigi ja: khang" moo" ri Babelon khyoo: de" lo" da:.
19 Nyang: gi Noku Yhoem: Moo" ri yo' voomoo"- khokham kho" joem ri yo' hau: jonu" joem dangain" yo' dage" nghe' pyam wigi voomoo" vang joem ri phyo' khyo' pyam da:.
20 Nyang: gi nyid deing da" bang: dangain" ri Babelon khyoo: shu" lo" wigi houg: moo nyangnu" gi nyang: ri yo' nya: amyed ashen yiri Persi khosen to' lo da" ayo, ju" sho' join yi khyo" dei byid: ago".
21 Hougsu" Aseing gi Lapi: Yeremia nhoid khyo" ?Dougno: Bidnyid akoid loo: theung: to" ziri doem byeung byid: khyo" Mungdain: ri nyhedxi: zain jham" coug: youg to" too" wa.? ga: tid to" da" dang: joeb byeung" lo da:.
(Ezra 1:1-4)
22 Lapi: Yeremia khyo" wigi Aseing nyang: tid da" dang: gi Persi khosen Kuru khosen bue" da" xang: shi" zain ri deung loo bye:. Nyang: gi Kuru da" nheigloem: ri nhoug" byid: wigi nya: mungdain: goin" moo vhoo: mo amyeing" dang: ri lhid" foin: lho: damungdain: goin" shoug" gyoo: sho' nyho: nghab nhang: bye:.
23 He: zigi Persi khosen Kuru da" amyeing" dang: nghoid. ?Mougkhung: mungdain: mo Aseing Mangsoo gi ngoo ri mougmyid gyab goin" ri vhoeb khang" nhang: wigi Yuda mung" Yerusalem moo we' nya: shid re" Noku Yhoem: Moo" koid wa shid re" ngoo ri yoovoin byid: too" bye: zi nghoid. Akhid" Mangso da" byumyu" yi nghoid boem da" nanu" dangain" gi: houg: khyoo: loo" ge'. Nanu" da" Aseing Mangsoo gi: nanu" yo' dage" nghoid baja" o" ? ga: zi nghoid da:.