28
(2kh 16:1-4)
Ahaza gi apyaid eig xi: zain moo khokham bue" lo wigi nyang: gi Yerusalem moo daxe: khyug zain vhoeb nyid da:. Nyang: gi nya: phoug" phyid" khokham David da" ge avoid ri acang nghoid da:. Hau: gungthid nyang: gi Aseing ri avho: ngei nhang: da" moo" joem ri koid da:. Houg: lho: Israela khokham gi avoid ri cang koid da:. Nyang: gi to' wigi Bala gungdu soolhoo: joem ri: koid nhang: lho: Hinnom lang: khung" moo shoem: nam pyo: xu: nghe' ngei" byid: da:. Israela byumyu" yi jhen" vang yhe: uri Aseing wigi hau: mungdain: mo khaid thu pyam da" byumyu" yi da" aco' ajhoid lo, moo" ri leug yu" yu lho: yu phara" soolhoo: joem ri xoin" khyo" nya: yuggi zoo: yiri lang" nghe' ngei" byid: da:. Tungbau yu phara" ri no' da" joyoo joem bouggung joem bid shoem: gam yang: khang" moo" moo Ahaza gi xoin" ngei" byid: wigi shoem: nam pyo: ja: xu: nghe' ngei" byid: da:.
(2kh 16:5)
5-6 Khokham Ahaza yooboo shoid yoomo nya: Aseing Mangsoo gi Suri khokham wigi nyang: ri gyi khaid oung: pyam nhang: lho: Yuda byumyu" yi myoo" sho' ri thung: byu yi khyo" Damasku khyoo: shu" lo" da:. Aseing gi Ramalia da" nya: yuggi zoo: Israela khokham Peka ri we' Ahaza ri oung: pyam wa khang" byid: wigi danyid" ri za: nheing loem voem" thang da" Yuda gyizoo: 120,000 yug ri said pyam da:. Nyangnu" phoug" phyid" yi da" Aseing Mangsoo gi hid su" bui" wa akhang" byid: da:. Ciwim gari Yuda byumyu" yigi nyang: ri she: pyam pyam yoomo nghoid da:. Zikhri ga: da" Israela gyizoo: dayug gi khokham Ahaza da" yuggi zoo: Maseia ri we' khokham kho" vhoeb su: Azrikam ri we' khokham pho da" vhoo: mo yug nghoid da" Elkana ri we' said pyam da:. Yuda byumyu" yigi nyangnu" da" mang: nhung" yi danghoid loug we' Israela gyidab gi myiyi: 200,000 yug yo' zooshang: yiri thung: byu yi khyo" myheig yu wigi lanyhoeb myoo" sho' yo' dage" Samari voomoo" khyoo: shu" phang: lo" ago".
Obed ga: da" Aseing da" lapi: dayug gi Samari voomoo" moo nyid da:. Nyang: gi Israela gyidab Yuda thung: byu yi yo' dage" doem tau" lo nyid wigi voomoo" khyoo: vang loo wa nghoid uri yhe: tau" yu wigi nyang: gi ?Nanu" da" phoug" phyid" yi da" Aseing Mangsoo gi Yuda yiri nheig yo: lho: nyangnu" ri nanu" wigi oung: pyam nhang: da:. Nghoid loug we' akhid" nyang: gi nyangnu" ri nanu" wigi gye" akhyeing" da" khyo" said pyam da" thui: ri shau" gyo: abye:. 10 Houg: lho: akhid" nanu" gi Yerusalem yo' Yuda mung" mo myiyi: yuggi yiri nanu" da" join koid pyam wa soin' ago". Nanu" we' nanu" da" Aseing Mangsoo ri yooboo shoid bye: ziri asi' goo" rhe". 11 Nga" dang: ri tam" gyoo: we'. He: thung: byu yigi nanu" da" nya: mang: nhung" nya: nhammoo" yi nghoid ago". Nyangnu" ri loo" nhang: pyam ge'. Anghoid lang" Aseing gi nya: da" nheig joem: yo: jang" moo nanu" ri yooboo dam byid: loo wa? ga: tid da:.
12 Mougzhung: shoid mungdain: mo vhujhung: myid: yug nghoid da" Yehohanan da" yuggi zoo: Azaria- Meshilemod da" yuggi zoo: Berekhia- Shalum da" yuggi zoo: Yehizkia- Hadlai da" yuggi zoo: Amasa bang: we' gyidab bang: koid da" moo" ri ngeug thug pyam boem. 13 Nyangnu" gi ?Hau: thung: byu yiri hid: khyoo: ashu" loo go". Ngoonu" gi Aseing ri yooboo shoid boem bye:. Ngoonu" ri yooboo dam byid: wa moin: sho' nyang: ri nheig yoo: nhang: bye:. Akhid" nanu" gi ngoonu" yooboo ri myo: ri" nhang: wa da" moo" ri zei: nau boem? ga: tid ago". 14 Houg: lang" gyidab bang: gi thung: byu yiri yo' lanyhoeb joem ri mung" byu yiri yo' vhujhung: yiri ab byid: boem. 15 Houg: lho: thung: byu yiri shoem" yu to" da" lanyhoeb joem mo byimi gam byid: wa shid re" byu myid: yug ri moo" byid: ago". Nyangnu" gi houg: bang: ri byimi joem khyid: zhung" joem byid: da:. Zoo: noem shug phoo" ri we' nyangnu" ri gi" koo: byid: da:. Houg: lho: nyangnu" dam khoo: moo joid wa zhainloin: xu: joem ri gam byid: da:. Khyoo: ayo" soo" sho' yoem: sung neing: bang: ri loo zei: joem gung tho' moo zhung: nhang: wigi thung: byu yi dangain" ri Yuda mougmyid moo jo, da" thab gam voomoo" Yerikho khyoo: shu" tau" lo" ago". Hau: thang: Israela byu yigi Samari mo yhoem: khyoo: doem tau" lo boem bye:.
16-17 Edom byu yigi Yuda ri doem re" khaid zain: wigi thung: byu yi myoo: sho' ri myheug she: lo" ago". Houg: yoomo khokham Ahaza gi Asuri Khosen Taglat Alesa ri bo pang" yu wa byu nhang: byid: wa shid re" mho' kaid da:. 18 Hau: ayo, moo nyang: Philisti byu yigi bidvang shoid mo boem khyid: joem mo voogung joem yo' Yuda mougpyi: shoid mo voogung joem ri re" khaid zain: boem. Nyangnu" gi Bed Sheme- Aiyalon yo' Gederod voomoo" joem Sokho- Timna- Gimzo yo' hougmo voozoo: joem ri lhoid seing: yu wigi hougmoo ayang: zhug lho: de: nyid ago". 19 Yuda khokham Ahaza gi nya: mung" byu yi akho: akhang" ri anghoid akhuang koid pyam wigi Aseing ri ayung" alho' koid pyam yoomo Aseing gi Yuda mung" ri yau: khi" bui" nhang: da:. 20 Asuri khosen gi Ahaza ri pang" thoug byid: wa gungthid- nyang: ri ngeug thug wigi nyang: ri yau: khi" koid byid: da:. 21 Houg: yoomo Ahaza gi Noku Yhoem: Moo" mo khokham kho" mo mung" byu yi da" vhujhung" yi yhoem: joem mo sheing: ri yu wigi hau: joem ri khasing: phoo ri byid: da:. Hougsu" koid nghoid loug we' ci: ayo" pang" thoug byid: nghoid da:.
22 Nyang: shau" da" yau: khi" gi gye" xo: loo lang" Ahaza gi Aseing ri goo vhu" tho' yooboo je shoid lo da:. 23 Nyang: gi nyang: ri oung: pyam da" Asuri byu yi phara ri xoin" ngei" byid: da:. Nyang: gi ?Asuri yu phara" joem gi Asuri khokham yiri pang" thoug byid: boem yhang: ti" ngoo ri we' nyangnu" yo" pang" thoug byid: goo" wa ein: ngoo hau: joem ri xoin" ngei" byid: zi nghoid? ga: tid da:. He: zigi nya: adang moo yo' nya: byumyu" yi adang moo kyi" khyeug zi bui" nhang: da:. 24 Hau: tho' ago"- nyang: gi Noku Yhoem: Moo" mo jonu" joem ri yu yu wigi adu adu baid kho' pyam da:. Nyang: gi Noku Yhoem: Moo" ri myhid" to" lho: Yerusalem khyi' khang" moo" moo phoin: joem ri zhug to" da:. 25 Yuda voomoo"- voogung khang" moo" moo tungbau yu phara" joem ri no' da" joyoo koid wigi houg moo tungbau yu phara" joem ri shoem: nam pyo: ja: xu: nghe' ngei" byid: da:. Hid: su" koid wigi nya: da" phoug" phyid" yi da" Aseing Mangsoo da" nheig yo: ziri nyang: nya: gung moo ju" lo nhang: da:.
26 Nyang: vhoeb da" ayo, xang: shi" mo zi lo" thang ju" sho' moo bue" lid lo da" khyoo: joem gootu: dangain" ri Yuda yo' Israela khokham yi da" mhoomyid: shen" dam pug moo lhid" xoem" to" ago". 27 Khokham Ahaza shid: lo" lho: Yerusalem moo myhoeb pyam boem bye:. Nghoid loug we' khokham loeb yoo moo amyhoeb nghoid ago". Nya: yuggi zoo: Hezekia gi nya: khoo: moo khokham xo' koid da:.