27
(2kh 15:32-38)
Yotham gi apyaid eig xe: wim: zain moo khokham bue" lo wigi Yerusalem moo daxe: khyug zain vhoeb nyid da:. Nya: myhi' gi Zadog da" nya: myiyi: zoo: Yerusha ga: su: nghoid. Nyang: gi nya: phoo koid lo ziyo' dayhang: ti" Aseing ri vho: ngei nhang: da" moo" ri koid da:. Nghoid loug we' nya: phoo yhang: ti" Noku Yhoem: Moo" moo shoem: nam pyo: ja: nghe' ngei" da" khyo" wigi yooboo akoid nghoid da:. Nghoid loug we' mung" byu yigi yooboo xo' koid ago".
Yotham gi Noku Yhoem: Moo" mougzhung: shoid khoem" moo" ri koid wigi Yerusalem mo Ophela ga: da" joyoo moo voomoo" vang zhug ce" lo" moo" ri koid da:. Yuda mung" mo boem joem cang voomoo" joem de: da:. Seig moo" yoo cang gyidab joem yo' pyuzung joem koid da:. Nyang: gi Amon khokham yo' nya: gyidab ri gyi khaid pui" ri koid wigi nyangnu" ri khaid oung: pyam da:. Hau: thang: nyang: gi Amon byu yiri vhoo: moo lhid" to" da" khang" doug ri soem" zain ju" sho' zain khang" moo" doin: zeig koid nhang: da:. Hau: joem gi ngei myid: tain:- sungsoo: bye: wim: sen- Yoono, bye: wim: sen nghoid da:. Yotham gi nya: Aseing Mangsoo ri nya: jhug zug tung" tam" gyo: cang yhe: wigi yoem je je bo re" da:. Yotham vhoebkhang" da" ayo, moo bue" da" khyoo:- gootu: nyang: gyi khaid da" khyoo: nyang: cang nyid da" khyoo: joem dangain" ri Israela yo' Yuda khokham yi da" mhoomyid: shen" dam pug moo lhid" xoem" to" ago". Yotham gi nyang: khokham bue" re" uri apyaid eig xe: wim: zain nghoid da:. Nyang: gi Yerusalem moo daxe: khyug zain vhoeb da:. Nyang: gi shid lo" wigi David voomoo" moo nyang: ri myhoeb shoung: pyam ago". Nya: yuggi zoo: Ahaza gi nya: khoo: moo: khokham xo' koid da:.