22
(2 Kh 8:25-29; 9:21-28)
Arab byumyu" yi dayham" gi yhe: khaid zain: lho: khokham Yehoram da" yuggi zoo: zoothang yug Ahaza mo lid wigi dangain" ri said pyam ago". Houg: yoomo akhid" Yerusalem byu yigi Ahazia ri nya: pho khoo: moo khokham koid nhang: ago". 2-3 Ahazia gi apyaid eig xe: eig zain moo khokham bue" lo lho: Yerusalem moo: dazain vhoeb da:. Ahazia ri nya: myhi' Athalia ga: da" khokham Ahab da" myiyi: zoo:- Israela khokham Omri da" nya: myid: wigi akhyeing" da" moo" koid wa nyang: ri phajhi" byid: yoomo khokham Ahab' da" yhoemkhung: avoid ri cang koid da:. Nyang: Aseing ri thougtheung yooboo shoid bye:. Ciwim gari nya: phoo shid: thang: ri Ahab da" yhoemkhung: byu gootu: yi nya: da" phajhi' byid: bang: bue" loo yoomo nyangnu" gi nyang: ri shu" gyoeb gyoo" nhang: da:. Houg bang: da" phajhi" byid: ziri cang wigi nyang: gi Suri khokham Hazaela yo' gyi zain: jang" moo Israela khokham Yoram yo' zoem" da:. Gyi dab joem gi Gilead mo Ramod moo khaid zain: go" lho: Yoram gi gyipui" moo dam dab da:. Nyang: gi nya: dam ri byang" wa shid re" Yezrela voomoo" khyoo: yhe: lo" da:. Ahazia gi hougmoo nya: jhang khyoo: lam" yhi: bye:.
Yoram jhang lam" yhe: ziri Ahazia da" gyo" soem" wa khyoo: Mangso wigi bui" nhang: bye:. Ahazia houg: moo yhe: nyid nyid uri Ahab da" khokham kung: ri phyo' pyam wa shid re" Aseing wigi khyen: too" su: nghoid da" Nimshi da" yuggi zoo: Yehu ga: su: wigi nyang: yo' Yoram ri thougtheung zi shoug" ago". Yehu gi khokham kung: ri Mangso wigi dang: phyed ziri koid thu' uri Yuda vhujhung: yi yo' Ahazia yo bo cang re" da" Ahazia da" du zoo: yi daphung: yo' yhe: shau" da:. Yehu gi houg: bang: dangain" ri said pyam da:. Ahazia ri cang sho: lho: Samari voomoo" moo gau" nyid ziri yhe: sho: myang ago". Nyangnu" gi nyang: ri Yehu jhang shu" lo wigi nyang: ri said pyam boem. Nghoid loug we' nyangnu" gi Aseing ri dei byid: wa yo" bue" yhi koid loo su: nya: phoug" khokham Yehoshaphad ri phau" myang: byid: khyo" nya: manggung ri myhoeb shoung: ago".
Mungdain: ri yo" vhoeb wa da" byu Ahazia da" yhoemkhung: moo dayug we' adeing loo nghoid da:.
(2 Kh 11:1-3)
10 Khokham Ahazia da" nya: myhi' Athalia gi nya: yuggi zoo: said pyam shau" da" khyoo: ri si' yo' dalheing: dam nyang: gi Yuda khokham yhoemkhung: byu yi dangain" ri said pyam wa shid re" amyeing" byid: kaid da:. 11 Ahazia gi Yehoiada ga: da" Khainjung dayug yo' lo, xo' da" Yehosheba ga: da" nya: nhammoo" dayug yo" da:. Nyang: gi Ahazia da" yuggi zoo: yi mo dayug nghoid da" Yosha ri said pyam shoug" wa nghoid boem da" khokham nu" gootu: yi mo sam zoo: shu" phang: lo lho: Noku Yhoem: Moo" yhoeb yab dayab moo dei zhoo" wa byu dayug yo' nyhoem" shoung: to" da:. Nyang: gi hougsu" shoung: to" da" khyo" wigi Athalia lo, moo shid: wa jang" mo nyang: ri khyoid yu to" da:.
12 Athalia khokham myhi' khyo" vhoeb nyid da" ayo, gyoo: moo nyang: gi khyug zain nyang: houg: moo gau" nyid jo, da:.