19
Yuda khokham phoo Yehoshaphad gi Yerusalem nya: khokham khoo" khyoo: yug yoo tung" doem ju" lo da:. Hanani da" yuggi zoo: Lapi: Yehu gi khokham phoo ri yhe: shoug" lho: nyang: ri ?Akhyeing" ashoeb ziyo' Aseing ngheing" da" bang: shoid khyoo: bo dab wigi pang" thoug byid: zigi jo, da" khyoo: nghoid ein: nang nyid jho: rhe". Nang koid da" moo" gi re" adang moo Aseing da" nheig yo: ziri ci: ri" byid: abye:. Hougsu" nghoid sho' nghoid loug we' nang moo ge zi dayham" bo da:. Nang gi mung" byu yi no' bye: da" yu phara" myhi' Ashera da" soolhoo: joem ri dangain" yu pyam lho: Mangsoo myid vho: ziri cang wa nang myid phyed abye:? ga: tid da:.
Yehoshaphad gi Yerusalem moo danyid nghoid loug we' nyangnu" phoug" phyid" yi da" Aseing Mangsoo jhang mung" byu yiri doem khe: tau" yu wa shid re" nyang: gi mougpyi: shoid Bersheba mo zi mougzhung: shoid Ephrim boem moug: athang: ju" sho' mung" byu yi phung: khyoo: main: main: gyung: so" da:. Nyang: gi Yuda mung" mo gyidab voomoo" khang" moo" moo tarha" agyi yiri sain' to" da:. Houg: lho: nyangnu" ri ?Dang: phyed da" khyoo: ri tid fu" jang" moo zid" lhid lho: koid we'. Nanu" gi byu da" amyeing" akhang" khyo" koid nyid boem zi anghoid. Aseing da" amyeing" akhang" khyo" koid nyid zi nghoid ago". Nanu" dang: phyed boem uri nyang: gi nanu" yo' dage" nghoid da:. Aseing ri ngi: shab byid: lho: zid" lhid wigi nyeing" koid we'. Ciwim gari ngoonu" da" Aseing Mangsoo gi mhau' zi myonhoo: khyen: zi khougvhoid jhungshug yu ziri zeing: kham: byid: su: anghoid ? ga: jhau" shid da:.
Yehoshaphad gi Yerusalem moo Levi byu yi khainjung yi yo' mung" byu vhujhung: yi dayham" ri Aseing da" tarha" ri phyo' shoin' da" moo" moo bo bo da" moo" anghoid lang" voomoo" byu yi agyoo: moo tarha" vang tid ngeig da" moo" joem ri dang: phyed wa tarha" agyi yi khyo" sain to" da:. Nyang: gi nyangnu" vhoo: mo khyoo: joem yo' dakhyo" jhau" shid da:. Hau: joem gi Nanu" gi nanu" moo" ri Aseing ri gyoug phug" ziyo' nanu" koid da" moo" ja: khang" moo" moo nyang: ri jhug zug za: tid dang: gyo: wigi koid ca" ago". 10 Voomoo" joem daloem: loem: mo nanu" mang: nhung" mung" byu yi nanu" shidkhoin" khyoo: byu said moo" anghoid lang" tarha" ri anghoid lang" amyeing" dang: ri phyo' shoin' da" gootu: moo" ci: ri" khang" moo" tarha" ca: yu" da" ayo, gyoo: moo nyangnu" nyang: khasu" koid ca" wa khyoo: ri nanu" nyangnu" ri nyeing" za: jhau" shid ca" ago". Houg: lang" nyangnu" gi Aseing ri thougtheung yooboo akoid go" wa. Nanu" hougsu" akoid boem nghoid rigi nanu" yo' nanu" da" mang: nhung" mung" byu yigi Aseing da" nheig yo: khyoo: ri shoug" kham zoo: wa. Nghoid loug we' nanu" gi nanu" da" moo" ri koid boem nghoid rigi nanu" gi yooboo ayoo" goo" wa. 11 Khainjung moo" Amaria gi laloem lakhoug: moo" yo' sen: jang" moo lo" thang amyeing" akhang" yoo" su: nghoid loo wa. Houg: lho: Ishamaela da" yuggi zoo: Yuda mung" zoug: Zebadia gi mung" byu yi yo' sen: da" moo" moo lo" thang amyeing" akhang" yoo" su: nghoid loo wa Levi byu yigi tarha" yung" mo dang: phyed da" moo" ri yu" byid: da" moo" yoo" bang: nghoid loo wa. Voem" da" myid bo lho: he: jhau" shid dang: ri lo, ju" koid we'. Aseing gi jo, da" shoid moo bo dab baja" o"? ga: zi nghoid da:.