19
(2 Sam 10:1-19)
Amon khokham Nahasha shid: lo" lho: nya: yuggi zoo: Hanun gi khokham bue" lo da:. Khokham David gi ?Nya: phoo Nahasha ngoo ri koid lo ziyo' dayhang: ti" Hanun ri we' bidnoem nghoid da" khyoo: ri ngoo ci: shug ca" da? ga: tid da:. Houg: yoomo David gi nya: jheddab myid ri ci: shug wa lagyoo: yiri nhang: kaid da:.
Nyangnu" Amon mung" khyoo: ju" yhi: lang" Amon byumyu" vhujhung: yigi khokham Hanun ri ? Nang ri jheddab myid ci: shug wa shid re" David gi re" phoo ri ngi: shab wigi he: byu yiri nhang: kaid zi nghoid ein: nang jho: rhe" Hougsu" anghoid. Nyang: gi he: mung" ri oung: pyam wa shid re" jooyu" bang: khyo" he: mung" ri jooyu" wa shid re" hid: bang: ri hid: khyoo: nhang: kaid zi nghoid? ga: tid ago".
Khokham Hanun gi David da" lagyoo: yiri myheig yu wigi nyangnu" da" nhoid moug" joem yug pyam- nyangnu" byimi joem ri zhung thi" moo yham' phang pyam byid: wigi nyangnu" ri doem nhang: kaid da:. Nyangnu" gi yhoem: khyoo: loo" wa shid re" gye" sho' boem ago". Hougsu" bue" da" khyoo: ri David shau" gyoo: lang" nyangnu" da" nhoid mei: adoem yug cang cang gi adoem tau" loo lho: Yerikho moo: nyid boem wa shid re" nyangnu" ri dang: pyeung: kaid da:.
Khokham Hanun yo' Amon byu yigi David ri nyangnu" da" gyivoo khyo" koid yu bye: ziri myid boin: lho: nyangnu" gi Mesopotamia mung" tho' du yo' Suri mung" Makha yo' Zoba mung" mo gyi khaid myang: rheing" yo' myang: rheing" koin" bang: ri nghoo" wa shid re" ngei myid: xi: tain: koo: byid: ago". Nyangnu" gi gyi khaid myang: rheing" soem" moin eig khyeing" ri ngho" yu lho: Makha khokham gyidab yo' ju" lo wigi Medeba joyoo moo: dab re" koid wigi nyid boem ago". Amon byumyu" yi we' nyangnu" voomoo" joem dangain" mo thu lo wigi gyi zain wa jen" jen" nghoid nyid ago".
Bue" nyid khyoo: ri David shau" gyoo: lang" nyang: gi Yoab yo' gyidab goin" ziri nhang: kaid da:. Amon byumyu" yigi to re" wigi nyangnu" da" voomoo" zeing Raba khyoo: vang yhe: da" khoem" duang: moo: joyoo yu boem. Nyangnu" ri pang" thoug wa ju" re" boem da" khokham yigi jang: pa: moo: joyoo yu ago".
10 Yoab gi gyivoo wigi nya: shid vhu" khyo" yo' nungthang khyo" nyang: ri khaid zain: wa nghoid khyoo: ri se wigi nyang: gi ge thang da" Israela gyizoo: yiri khyen: yu lho: houg: bang: ri Suri byu yi shoid khyoo: myonhoo: shu: wigi joyoo yu nhang: da:. 11 Nyang: gi deing da" nya: gyizoo: yiri nya: nhung" Abishai ri vhoeb nhang: wigi nyang: ri Amon byumyu" yi shoid khyoo: myonhoo: shu: wigi joyoo yu nhang: da:. 12 Yoab gi nyang: ri ?Suri byu yi ngoo ri oung: lo nyid ziri nang myang lang" ngoo ri re" bo pang" yu la- houg: lho: Amon byu yi nang ri oung: lo nyid boem ziri ngoo myang lang" ngoo nang ri re" bo pang" wa. 13 Yoem: theing wigi voem" myid kaid ci we' ngoonu" byumyu" yi shid re" yo' ngoonu" Mangso da" voomoo" joem shid re" gyi yoem: kaid zain: shang. Aseing da" myid vho: ziyo' dakhyo" bue" baja"? ga: tid.
14 Yoab yo' nya: byu yigi khaid zain: wa shid re" shid khyoo: jhen" yhe: lo" ri Suri byu yigi phang: lo" boem ago". 15 Suri byu yi tang" phang: lo" nyid boem ziri Amon byu yi shau" myang boem lang" nyangnu" we' Abishai mo phang lo" boem wigi voomoo" khoug: khyoo: zoid vang lo" boem ago". Hau: thang: Yoab gi Yerusalem khyoo: tau" lo" da:.
16 Israela byu yi wigi nyangnu" ri oung: pyam bye: da" khyoo: ri Suri byu yi myid boin boem wigi nyangnu" gi Uphrad gyung: bid thug shoid Suri mung" joem mo gyidab joem ri shu" yu lho: Zoba khokham Hadadeza da" gyizoug: Shobag vhoeb da" akhoug: moo: nyangnu" ri nyid to" da:. 17 David gi he: khyoo: ri shau" gyoo: lang" nyang: gi Israela gyizoo: yiri zheing" yu wigi Yodan gyung: ri gu: dab lho: Suri byu yi shoid khyoo: myonhoo: shu: wigi houg: bang: ri joyoo yu nhang: da:. Gyi khaid zain: shid" lo wigi 18 Israela byu yigi Suri gyidab ri doem khaid tau" kaid boem. David yo' nya: byu yigi Suri gyi myang: rheing" koin" bang: nyhed khyeing" yug yo' khyid: so" gyizoo: myid: moin yug ri said pyam da:. Nyangnu" gi Suri gyizoug: Shobag ri we' said pyam ago". 19 Hadadeza vhoeb da" akhoug: moo nyid boem da" khokham yigi Israela byu yi wigi nyangnu" ri oung: pyam bye: khyoo: ri boin: so" loo lang" nyangnu" gi David yo' yug yo myenjham" khyoo: koid lho: David da" byu yi bue" lo da:. 20 Suri byu yigi Amon byu yiri khanham we' doem pang" wa myid aboo loo: nghoid ago".