18
(2 Sam 8:1-18)
1 Dayo, zoo: myang" thang: ri David gi Philisti byu yiri gyi yhe: khaid zain: lho: oung: doid pyam da:. Nyang: gi Gad voogung yo' hau: lheing khoem voogung joem ri nyangnu" lo, mo lhoid yu bye:.
2 Nyang: gi Moba byumyu" yiri we' gyi oung: pyam wigi houg: bang: gi nya: byu yi bue" lo lho: nyang: ri khang" doug kaid ago".
3 Hau: thang: David gi Hamad moug: nam mo Zoba moug: mo Suri khokham Hadadeza ri gyi khaid da:. Ciwim gari: Hadadeza gi Uphrad gyung: atho' du mougmyid ri vhoeb wa soin' nyid yoomo nghoid da:.
4 David gi hau: yug da" gyi myang: rheing" dakhyeing"- myang: jui: gyizoo: nyhed khyeing"- gyizoo: eig moin nghoid da:. Nyang: gi gyi khaid myang: rheing" dashoo: loem: shid re" za: myang: joem ri myheig yu lho: deing da" gu: dangain" ri khyid: zain: khyau" pyam da:.
5 Khokham Hadadeza ri pang" yu wa shid re" Damasku mo Suri byu yiri nhang: kaid boem lang" David gi houg: bang: ri yhe: khaid zain: wigi byu eig moin eig khyeing" yug ri said pyam da:.
6 Hau: thang: nyang: gi nyangnu" mougmyid moo: gyidab koid da:. Houg: bang: gi nya: lo, khoug: mo byu bue" lo wigi nyang: ri khang" doug kaid ago". Aseing gi David ri khyi khang" moo" moo: oung: doid nhang: da:.
7 David gi Hadadeza da" gyizoug: yi ci boem da" sheing: goo joem ri shoem" yu wigi Yerusalem khyoo: ci: lo" da:.
8 Ref 18:8: 1Kh 7:40-47: 2 km 4:11-18. Nyang: gi Hadadeza wigi vhoeb nyid da" Tibhad yo' Kun voomoo" mo gyid: mid" myoo" sho' ri we' yu pyam da:. (Sholumon gi gyid: mid" thung" lhang"- zeing boung: joem yo' Noku Yhoem: Moo" shid re" gyid: mid" zi joem koid yu da:.)
9 Hadadeza da" gyidab goin" ziri David wigi oung: pyam khyoo: ri Hamad khokham Toi shau" gyo: da:.
10 Houg: yoomo khokham Toi nyang: nyang: myoo: sho' lheing: yhe khaid zain: yu" da" Hadadeza ri David oung: pyam yoomo nyang: ri yhe: shau" wa yo' ngi: shab byid: wa shid re" nya: zoo: Yoram ri nhang: kaid da:. Yoram gi sheing- ngei- gyid: mid" wigi koid da" jhungshug joem David jhang ci: yhi: byid: da:.
11 Khokham David gi hau: joem ri nyang: khaid oung: yu da" Edom- Moba- Amon- Philisti- Amaleg byumyu" yi mo shoem" yu da" sheing- ngei joem yo' dage" noku jang" moo ci: wa shid re" shugbyid: da:.
12 Ref 18:12: Cng 60 Dang: Vhu". Zeruia da" yuggi zoo: Abishai gi Edom byu yiri xoo" lang" khung" moo: khaid zain oung: pyam wigi damoin shed khyeing" yug ri said pyam da:.
13 Nyang: gi Edom mung" goem: sho' moo: gyidab koid lho: hougmoo: nyid bang: gi khokham David da" lo, khoug: mo byu yi bue" lo ago". Aseing gi David ri khyi khang" moo" moo: oung: doid nhang: da:.
14 David gi Israela damung" goin" ri vhoeb wigi byumyu" yiri khanham we' tarha" nyeing veing ziyo' geing: geing: teing teing vhoeb nyid khyoo: ri si' nhang: da:.
15 Abishai da" nya: mang: Yoab gi gyizoug: moo" nghoid. Ahiluda da" yuggi zoo: Yehoshaphad gi lhid" xoem" moo" ri yoovoin yu su: nghoid.
16 Ahitub da" yuggi zoo: Zadog yo' Abiatha da" yuggi zoo: Ahimeleg tang: gi khainjung nghoid. Seraia gi khokham kho" mo moo" seing: nghoid da:.
17 Yehoiada da" yuggi zoo: Benaia gi David da" kang: zung" vhujhung: nghoid lho: David da" yuggi zoo: yigi nya: moo" mo myang: da" joyoo moo: zei: nyid boem ago".