15
David gi nya: shid re" David voomoo" moo: yhoem: joem koid da:. Nyang: gi Mangso Dang: Theing Kuid: shid re" we' joyoo daloem: soin' nyheing wigi hau: ziri zoem" koid nghoeb to" da:. Ref 15:2 Tid 10:8. Hau: thang: nyang: gi ?Levi byumyu" yi kyeing" za: hau: Dang: Theing Kuid: ri vu ca" da:. Ciwim gari: nyangnu" gi hau: ziri vu wa yo' apyaid atoo: nyang: ri dei byid: wa shid re" Aseing wigi khyen: too" bang: nghoid? ga: tid da:. Houg: yoomo David gi nyang: soin nyheing to" da" joyoo khyoo: Dang: Theing Kuid: ri vu, yu wa shid re" Israela byumyu" yi dangain" ri khe: zheing" yu da:. Hau: thang: nyang: gi Arun da" amyed ashen yi yo' Levi byumyu" yiri khi: nhang: kaid da:. Levi byumyu" Kohad kung: mo Uriela gi vhujhung: koid lho: nya: kung: mo 120 yug- Merari kung: mo Asaia vhujhung: koid lho: 220 yug- Gershon kung: mo Yoela vhujhung: koid lho: 130 yug- Elizaphan kung: mo Shemaia vhujhung: koid lho: 200 yug- Hebron kung: mo Eliela vhujhung: koid lho: 80 yug- 10 Uziela kung: mo Aminadab vhujhung: koid lho: 112 yug ju" re" ago".
11 David gi khainjung Zadog yo' Abiatha- Levi byumyu" yi nghoid da" Uriela- Asaia- Yoela- Shemaia- Eliela yo' Aminadab bang: khyug yug ri khe: yu da:. 12 Nyang: gi:Levi byu yiri ?Nanu" gi Levi kung: mo vhujhung: yi nghoid ago". Israela Aseing Mangso da" Dang: Theing Kuid: ri ngoo soin nyheing to" da" joyoo khyoo: nanu" yo" dang loo" wa shid re" nanu" nya: gung ri yo' nanu" da" Levi byu mang: nhung" yi gung ri younglho' sho' koid too" we'. 13 Ciwim gari: xang: shi" lheing: hau: ziri vu wa shid re" nanu" hougmoo: anyid boem yoomo we' nanu" nyang: we' noku eung: ziyo' dayhang: ti" anoku yoomo nyha" Aseing Mangsoo gi nyhang" ri yooboo dam byid: bye:? ga: tid da:.
14 Hau: thang: khainjung yi yo' Levi byu yigi Israela da" Aseing Mangso da" Dang: Theing Kuid: ri vu, wa shid re" nyang: nya: gung ri younglho' sho' koid boem ago". 15 Ref 15:15 Thu 25:14. Levi byu yigi Moshe khyo" wigi Aseing amyeing" byid: to" ziyo' dayhang: ti" hau: ziri keing: kaid wigi koo" tho' mo vu, boem.
16 David gi Levi byu vhujhung: yiri ngei pyoo: tung" jikhoin" khoin"- teing joem baid- jhabceing joem baid wa shid re" Levi byumyu" myoo" sho' ri khyen: soin too" wa amyeing" byid: da:. 17-21 Nyangnu" gi jikhoin" khoin" bang: kung: mo vhoo: moo: lhid" too" bang: ri gyid: boo" jhabceing baid wa shid re" khyen: to" ago". Houg bang: gi Yoela da" yuggi zoo: Heman- nya: bidnoem Berekhia da" yuggi zoo: Asab- Merazi kung: mo Kushaia da" yuggi zoo: Ethan bang: nghoid ago". Nyangnu" ri pang" thoug byid: wa shid re" nyangnu" gi thui: myhang: da" teing joem ri baid wa shid re" vhoo: mo Levi byu yiri khyen: to" ago". Houg: bang: gi Zekharia- Yeziela- Shemiramod- Yehiela- Uni- Eliaba- Maseia- Benaia bang: nghoid ago".
Thui: nyhoem: da" teing joem ri baid wa shid re" nyangnu" gi vhoo: mo Levi byu yiri khyen: to" ago". Houg: bang: gi Matithia- Eliphelehu- Miknea- Azazia yo' Noku Yhoem: Moo" lhoug zung" bang:- Obed Edom yo' Yeiela bang: nghoid ago".
22 Khenania gi music moo: jhang: yoomo Levi byumyu" yi music hpung: bang: da" vhujhung: koid wa khyen: to" zi shau" da:. 23-24 Berekhia- Elkana tang: gi Obed Edom- Yehia tang: yo' dage" Dang: Theing Kuid: lhoug zung" bang: khyo" khyen: to" zi shau" da:. Khainjung yi nghoid boem da" Shebania- Yoshaphad- Nethanela- Amasai- Zekharia- Benaia- Elieza bang: gi Dang: Theing Kuid: shid vhu" moo: laboo" moid wa shid re" khyen: to" zi shau" ago".
(2 Sam 6:12-22)
25 Houg: yoomo khokham David- Israela byumyu" yi mo vhujhung: yi yo' gyizoug: yigi Dang: Theing Kuid: yhe: vu yu wa shid re" Obed Edom da" yhoem: khyoo: yhe: lho: nyangnu" gi hougmoo: pui" zeing koid boem ago". 26 Nyangnu" gi Dang: Theing Kuid: vu, boem da" Levi byu yiri Mangsoo pang" thoug byid: baja" ga: nuloo: nyhed du:- yang nyhed du: xoin" ngei" byid: boem. 27 David gi music phung: bang: yo' nyangnu" vhujhung: Khenania yo' Dang: Theing Kuid: ri vu, da" Levi byu yi yhang: ti" ge da" zin: yung" pain" wigi khyoeb to" da" byisheing: void ci: da:. David gi zin: yung" pain" byikua" ri we' void ci: da:. 28 Dang: Theing Kuid: ri Yerusalem khyoo: vu, loo" bang: moo: bo cang boem da" Israela byu yi dangain" gi laboo" moid- nu khyau: moid- jhabceing baid- teing baid wigi gau yi ngei pyoo: tung" hau' yhe: lo" boem ago".
29 Kuid: ri voomoo" khoug: khyoo: vu, vang lo" nyid uri Sholu nya: myiyi: zoo: Mikha gi bangzoo: khoem" khyo" yu" kaid ri David gau yi wigi go" nhoin lho: byam jhu" nyid ziri myang lang" nyang: ri yu" phue: pyam da:.