14
(2 Sam 5:11-16)
Turu khokham Hiram gi Phaga: phung: daphung: David jhang nhang: kaid da:. Nyang: gi David ri khokham kho" koid wa shid re" shamu seig thung"- lug baid bang:- lo, moo" zei: bang: ri byid: kaid da:. Houg: lho: David gi nyang: ri Aseing wigi khokham khyo" koid nhang: lho: nya: byumyu" yi gang mo nya: mungdain: ri nyid gi yab gi nhang: lho: nyang: ri khyen: sain' to" ziri myid boin: lo da:.
David gi Yerusalem moo: yhoem: seing: myhi' myoo" sho' yu wigi yuggi zoo: myiyi: zoo: myoo" sho' yo" da:. Vhoo: moo: lhid" too" bang: gi Yerusalem moo: khu: bang: nghoid. Houg: bang: gi Shamua- Shoba- Nathan- Sholumon- Ibhara- Elishua- Elpeled- Noga- Nepheg- Yaphia- Elishama- Beliade yo' Elipheled bang: nghoid ago".
(2 Sam 5:17-25)
Akhid" David gi Israela mung" goin" ri vhoeb da" khokham bue" nyid bye: ga: ziri Philisti byumyu" yi shau" gyoo: lang" nyangnu" gyidab gi David ri myheig yu wa shid re" to' yhe: lo" da:. Hougsu" yoomo David gi: nyangnu" yo' shau" goo" wa shid re" to' yhe: lo" da:. Philisti byumyu" yi Rephim lang: khung" moo: ju" yhe: lho: lhoid zo: nyid boem ago". 10 David gi Mangsoo ri ?Philisti byumyu" yiri ngoo gyi yhe: zain: wa la". Nang ngoo ri ung: doid nhang: wa la".? ga: myid: da:.
Aseing gi ?Yhe: zain: we' Ngoo nang ri ung: doid nhang: wa? ga: phoug tid da:.
11 Hougsu" yoomo David gi nyangnu" ri Bala- Perazim joyoo moo: gyi zain: lho: ung: yu pyam da:. Nyang: gi ?Mangsoo gi gyid khyoid su" gyivoo yi gyidab ri lid phyed yhe: wa shid re" ngoo ri ci: da? ga: tid da:. Houg: yoomo hau joyoo ri Bala- Perazim ga: myheing ago". 12 Philisti byumyu" yi tang" phang: lo" boem ri nyangnu" da" yu phara" soolhoo: ri too" kho' boem ago". David gi hau: joem ri nghe' pyam wa shid re" amyeing" byid: bye:.
13 Dayo, zoo: ri Philisti byumyu" yigi langkhung" khyoo: doem re" lho: doem re" lhoid zoo: nyid boem. 14 David gi Mangsoo ri dalheing doem myid: sham: yu" ri Mangsoo gi ?Hid: mo gyi ayhe: zain- goo" shoid khyo" lheing yhe: wigi seig xu: gam joem anam khyo" nyangnu" ri gyi zain: wa shid re" soin jen" to" we'. 15 Seiggam phyoo moo: gyi khaid ri" thui: ri nang shau" gyoo: lang" gyi zain: we'. Ciwim gari: Philisti gyidab ri ung: pyam wa shid re" ngoo gi re" shid khyoo: yhe: loo" wa? ga: tid. 16 David gi Mangsoo amyeing" byid: to" ziyo' dayhang: ti" koid wigi nyang: gi Philisti byu yiri Gibeon mo zi Gezera khyoo: thang sho' khaid tau" pyam da:. 17 David da" myeing gi khyi khang" moo" khyoo: fu" lo" lho: Aseing gi byumyu" khang" moo" David ri gyoug nhang: da:.