10
(1 Sam 31.1-13)
1 Philisti byu yigi Israela byumyu" yi yo' Gilboa boem moo: gyi zain go" da:. Israela byu yi myoo" sho' hougmoo: said pyam zi shau" boem da:. Khokham Sholu yo' nya: zoo: yi bo bo wigi deing shi" da" gu: gi tang" phang: lo" ago".
2 Nghoid loug we' Philisti byu yigi nyangnu" ri cang khaid myi: wigi Sholu da" yuggi zoo: soem" yug- Yonathan- Abinadab- Malkhishua bang: ri said pyam ago".
3 Sholu da" aqei: ayam moo: gyipui" gye" thain: wigi nyang: ri gyivoo: yi da" myoo: joem zang" wigi gye" damxoo: sho' dam dab da:.
4 Nyang: gi nya: gyi jonu" ri vu byid: da" zooyam zoo: ri ?Re" shamcoin" wigi ngoo ri thau" said pyam we' houg: lang" Mangsoo ri aloem da" Philisti byu yi wigi ngoo ri ayu" juang" pyam goo" wa nghoid? ga: tid bye:. Nghoid loug we' hau: zooyam zoo: gi hougsu" koid wa gye" gyoug nyid da:. Hougsu" yoomo Sholu gi nya: shamcoin" ri she: yu lho: hau: ziyo' thau" zu: said yu da:.
5 Zooyam zoo: gi Sholu shid: bye: ziri myang lang" nyang: we' nya: shamcoin" yo' thau" said shid: zo: da:.
6 Hougsu" yoomo Sholu yo' nya: yuggi zoo: soem" yug goin" dage" shid: lo" ago". Houg: yoomo nya: amyed ashen yi dayug we' mung" avhoeb loo: nghoid ago".
7 Yezrela lang: khung" moo: nyid boem da" Israela byumyu" yigi gyizoo: yi tang" phang: lo" lho: Sholu yo' nya: yuggi zoo: yi shid: bye: khyoo: ri shau" gyo: boem lang" nyangnu" voogung joem ri she: pyam too" kho' lho: tang" phang: lo" boem ago". Hau: thang: Philisti byumyu" yi re" lo wigi hau: joem ri seing: yu pyam da:.
8 Gyi khaid pui" thang: nyid ri Philisti byu yigi shid: mang joem ri yhe: lhoid yu wa yhe: lo" ri nyangnu" gi Sholu yo' nya: yuggi zoo: yi da" shid: mang joem ri Gilboa boem moo: leung jo, boem ziri myang ago".
9 Nyangnu" gi Sholu da" vhuloem ri phyed pyam lho: nya: gyi khin joem ri khyoid shang: yu ago". Houg: lho: nyangnu" gi nyangnu" da" yu phara" soolhoo: joem yo' nyangnu" da" mung" byu yiri lu dang: gi tid fu" wa shid re" Philisti damung" goin" khyoo: lagyoo: yiri nhang: kaid ago".
10 Nyangnu" gi nya: gyi jonu" ri nyangnu" da" Noku yhoem: daloem: moo: to" to" wigi nya: vhuloem rigi nyangnu" da" yu phara" Dagon da" yhoem: moo: lhang" to" ago".
11 Gilead moo: nyid boem da" Yabesha byu yigi Sholu ri Philisti byu yi khasu" koid pyam boem khyoo: ri shau" gyo: boem lang"
12 Sarhi' thang da" byu yi yhe: wigi Sholu yo' nya: yuggi zoo: yi da" manggung joem ri yhe: yu lho: Yabesha khyoo: dang lo ago". Nyangnu" gi hougmoo: jo da" Shookhi" gam khyid: moo: houg: bang: ri myhoeb pyam lho: nyhed nyid" zoo: noem jang" ago".
13 Ref 10:13 a 1Sa 13:8-14: 15:1-24: b Xng 19:31: 20:6: 1Sa 28:7,8. Sholu gi Aseing ri jhug azug yoomo shid: loo" bye:. Nyang: gi Aseing da" amyeing" dang: ri atam" gyoo: nghoid da:. Nyang: gi Aseing yo' sham: goo" wa gungthid- shid: bye: bang: da" soobyoo yo' sham: go" wigi khyoo: shed yu wa khyoo: shoo: wa soin' bye:.
14 Hougsu" yoomo Aseing gi nyang: ri said pyam wigi Yese da" yuggi zoo: David ri mungdain: vhoebkhang" wa byid: pyam bye:.