COUNG" NGHEI 99
Aseing gi khokham nghoid- byumyu" yi gyoug nain" nyid boem.
Nyang: gi: dung dab da" dei noem tho' moo: zhoung: jo-
mougmyid yoosoo" gi nain" nyid.
Aseing gi Ziun tho' moo: phung" yoeb bo nyid wigi
mougmyid byumyu" yi da" atho' moo gyi: thang amyeing" yoo" su: nghoid.
Byu yugkhang" moo" gi nya: da" gyid myhang: thang khyoo: yo'
phung" yoeb bo da" myeing khyang" ri
coung" nghei nyid boem wa nghoid.
Nyang: gi gyeung" shang: su: nghoid nyid.
Zoug: myeing" ci: da" khokham we"-
nang gi deungbyeung" khyoo: ri vho: ngei nyid.
Nang gi Israela byumyu" yi da" akhoug: moo
nyeung veung" khyoo: ri koid too" byid: bye:.
Nang gi deungbyeung" khyoo: yo' gam mi gam shoo" yi da" khyoo: ri ci: lo abye:.
Ngoonu" da" Mangsoo ri coung" nghei ge'-
nya: da" zhungtang shidkhoin" moo noku nyid ge'-
Nya: gi: gyeung" shang: nyid su: nghoid.
Nya: da" khainjung Moshe yo' Arun- nyang: ri akyu" mho' su nghoid.
Samuela bi" gi Aseing gi nyangnu" ri tam" gyoo: byid: bye:.
Nyang: gi nyangnu" ri jhoemmoug" zeing mo dang: ji bye:-
nyangnu" gi nyangnu" ri byid: to" da-
tarha" yo' amyeing" dang: joem ri tam" gyo, cang lo boem bye:.
O" Aseing ngoonu" da" Mangsoo we"-
nang gi re" da" byumyu" yiri tam" gyoo: byid: bye:.
Nang gi nyangnu" da" yooboo joem yoomo
dam kaid shen" yhen loo loug we' nang gi yooboo ri khyoid pyam, byid: da"
Mangsoo nghoid khyoo: ri toin" shed loo bye:.
Ngoonu" da" Mangsoo Aseing ri coung" nghei byid: ge'-
nya: da" younglho' boug tho' moo: noku ge'-
ngoonu" da" Mangsoo Aseing gyeung" shang: su: nghoid.