COUNG" NGHEI 9
Aseing we" nang ri
nga" ung: khoug: nheigloem: bain sho yo'
nang ri coung" nghei nyid wa. Nang koid bye: da" mau"
pho" moo" zoo" bain sho ri ngoo tid fu" nyid wa.
Nang ri nghe: khau: ayang: koid lho:
ngoo gau yi lid jhoem" yang" wa. Myhang: thang da"
Mangsoo nang ri ngoo coung" nghei jikhoin" dang: tid nyid wa nghoid.
Nga" gyivoo joem gi nang thu' myhang: loo lang-"
yu: zoid phang: lo" lho: nyangnu" gi leung gyoeb shid: lo" boem bye:.
Nang gi tarha" dang: phyed khyoo: moo
nyeung nyeung veung" ziyo' deungbyeung" zi
nghoid lho wigi nang gi nga" shoid khyoo: dang: phyed byid: nyid.
Nang gi Mangsoo abo bang: ri
dang: phyed byid: lho: akhyeing" ashoeb bang: ri
mhoin' pyam wigi nyangnu" gi toem: pyam zi shoug" bye:.
Ngoonu" da" gyivoo joem gi apyaid atoo: moo: joem: thang byug bye:.
Nang gi ngoonu" da" voogung joem ri we'
phyo' sain" pyam byid: wigi hau: voogung joem gi khanham we' jha" byoug loo" bye:.
Nghoid loug we' apyaid atoo: mo Aseing gi apyaid ato: khokham" nghoid.
Nyang: gi yooboo dang: phyed wa shid re"
nya: zhungtang ri nyeung too" bye:.
Nyang: gi deing: byeung" khyo" mougmyid ri
vhoebkhang" nyid lho: nyeung veung" khyo"
byumyu" cang: joeb bang: ri dang: phyed byid: nyid.
Aseing gi doin: zeug shoug" bang: da"
phang: khoug: jang- yau: khe" kyi" khyeug shau" da" uri
loid byoin myenjham" joyoo nghoid.
10 Aseing we" nang ri si bang: gi
nang ri loem" jeung" loem khau: lo boem wa zi nghoid.
nang gi re" jhang khyoo: tain" tab, loo bang:
hang" ri we' alhoem: khaid pyam.
11 Ziun moo: vhoebkhang" nyid da-
Aseing ri coung" nghei jikhoin" khoin" nyid ge'.
Nyang: koid moo" zoo" dangain" byumyu" bain sho mo, ri: tid kyoo" ge'.
12 Mangsoo gi yau: khe sho" jhen bang: ri
myid boin: nyid. Nyang: gi nyangnu"
da" ngau yoid thui: ri ato" myhid.
Nyangnu" tho' moo: age khyo" koid mo, ri
yooboo dam kaid nyid.
13 Aseing we" ngoo ri nheug khyeug shi" we'.
Gyivoo joem koid yoomo ngoo khayhi' kyi" khyeug sho"
jhen: shoug" nyid da" khyoo: ri yu" xoem" too" byid: we'.
Ngoo ri shid: gyoin mo khyoid yu shi" we'.
14 Houg: lang" ngoo gi Yerusalem voo byu yi
shidkhoin" moo yo" yab jo, lho: ngoo nang ri
coung" nghei khyoo: dangain"- nyangnu" ri
yo" tid kyoo" wa zi nghoid.
15 Mangsoo ayoo" mo, gi gyoin: du: to" boem-
Nyangnu" gi nyangnu" da" gyoin: moo:
byed, gyo" zi shau" boem abye: go".
16 Aseing gi: deungmain" khyo"
dang: phyed nyid wigi nya: gung du: ri
pang shug bye:. Akhyeung" da" byu yigi
nyangnu" nya: da" moo" zoo" khyo"
nyang: khyo' tei" moo: nyang: myi" jo, boem abye:.
17 Mangsoo ri she: pyam bang: dangain" mo, yo'
akhyeing" ashaoeb mo, dangain" da" khyoo: lo" thang moo: gi
shid: lo" khyoo: za: nghoid.
18 Ca" nyid yo nyid mo, ri khanham we'
to" myhed pyam wa zi anghoid. Sho" jhen:
kyi" khyeug shoug" mo, gi nheug byu jang: ayoo" loo: sho'
dapyaid goin" doin: zeug to" zi shoug" nyid wa anghoid.
19 Aseing we" gyoo" loo we'
byu yi nang ri yo" juang" wa akhang" abyid:-
Mangsoo aboo mo, ri re" shidkhoin" moo: zheung" yu lho:
nyangnu" ri dang: phyed byid: we'.
20 O" Aseing we" nyangnu" ri gyoug dain'
nyid nhang: we'. Nyangnu" gi byo, yoin" shid: lo" ja: za:
nghoid nyid ziri si' nhang: we'.