COUNG" NGHEI 85
1 Aseing we" nang gi re" da" mougmyid ri nheug khyeug nyid.
Israela byumyu" yiri dalheung: doem nyid gi yab gi nhang: loo bye:.
2 Nang gi re" byumyu" yi da" yooboo joem ri khyoid pyam byid: wigi
nyangnu" da" shoid vhang: yooboo joem ri khyam" sa: byid: pyam bye:.
3 Nyangnu" ri nheug yo: khyoo: nang toem pyam lho: wigi
re" da" nheigloem: loung nyid ziri we' jham" loo" nhang: nyid.
4 Ngoonu" da" khyoid yu Aseing Mangsoo we"-
ngoonu" ri akhang: yo' dakhyoo" ti" doem lhoem: tau yu we'.
Ngoonu" ri anoug angei akoid nyid loo.
5 Nang gi ngoonu" ri apyaid atoo- nheug jha" yo: nyid wa zi nghoid la".
Re" da" nheigloem: ngei" nyid zi khanham we' athang loo wa la".
6 Ngoonu" ri yoem dalheing: doem foin' byid: we'.
Hougsu" nghoid lang" gi ngoonu" re" da" byumyu" yi nang ri coung" nghei nyid boem wa zi nghoid.
7 Aseing we" re" da" geung: teung jhed khyeing: kang: khyeing:-
ngoonu" ri toin" shed byid: we'. Nang bo pang" khyoid yu khyoo: ngoonu" ri byid: we'.
8 Aseing Mangsoo tid nyid da" dang: ri ngoo tam" gyo: nyid.
Ngoonu" gi akoo" adau: da" khyoo: moo
avhang: lheung lo" nghoid rigi nya byumyu" yi nghoid da-
ngoonu" ri ngei pyo: myenjham" khyoo: byid: wa
Nya: dangsoo" khoin" too" byid: bye:.
9 Nyang: ri phoug" tab, ngi: shab bang: ri
nyang: khyoid yu wa gyeing" nyang: jen" jen" nghoid nyid ziyo'
nya: da" khyoid yu phung" yoeb gi
ngoonu" da" mungdain: moo: dajo, jo, wa nghoid.
10 Jheddab ziyo' zed" lhed nheigloem: zung" da" khyoo: gi dage" bo thu lo wigi
deungmain" ziyo' ngei pyo: myenjham" khyoo: gi
babug bug go" loo wa zi nghoid.
11 Byu yi da" tam" gyo: cang yhe: khyoo: gi
mougmyid tho' moo to' do, lo" wigi
Mangso da" deungmain" khyoo: gi mougkhung: mo goeb, yu" nyid wa zi nghoid.
12 Aseing gi ngoonu" ri nyid gi nyid di nhang: wa zi yo'
ngoonu" da" mungdain: gi gug zoo meiloem:
shivoo: shiloem athang agoin- thu ri" nhang: wa zi nghoid.
13 Deingmain" da" khyoo: gi Aseing da" shid khyoo: yhe: lo" wigi
nya: shid re" khyoo: nyheung byid: wa zi nghoid.