COUNG" NGHEI 81
1 Ngoonu" da" goem loem byid: nyid su:-
Mangsoo ri nyho: coung" nyid ge'.
Yaku da" Mangsoo ri jikhoin" dang: yo' coung" nghei nyid ge'.
2 Yhang: thui: myheung thui: yo' teing she: lho:
zeing tau nu" joem ri baid myheing ge'.
Teing joem yo' teing nu" joem ri gyo: ngei tung" baid myheung kaid ge'.
3 Lhoo' xain" yo' lhoo, leung" nyid" ri pui" koid wa shid re"
laboo" ri moid: kaid ge'.
4 Hau: zigi Israela moo: bo jo, da" tarha" nghoid wigi
Yaku da" Mangso jang" mo yo" yu da-
pyeing: dang: khoin" joem nghoid.
5 Hau: zigi Egutu ri nyang: meing: zain: nyid uri Israela byumyu" yiri
byid: to" da" pyeing: khoin" nghoid nyid.
Ase, gyo: da" thui: dakhoin" ri ngoonu" shoug" gyo.
Hau: da" thui: gi hidsu" nghoid.
6 Nanu" da" nung" khung: mo yoovoin' ri ngoo yu khyo' pyam byid: wigi
nanu" da" myidzhoo" thung dang da" nung gyoin' joem ri ngoo yu khyo' pyam byid: bye:.
7 Nang kyi" khyeug zi shoug" nyid uri
ngoo ri yoid, nyid ziyo' ngoo gi nanu" ri: khyoid yu bye:.
Uglid hau, nyid da" akhoug: moo gau" jo, da" joyoo mo ngoo nanu" ri tu" byid: bye:.
Meriba gyid bug nam, moo ngoo nanu" ri ca: jham" yu" bye:.
8 Nga" byumyu" yi we' ngoo tid poin" nyid da" dang: ri tam" gyo: yu ge'.
Israela byumyu" yi we' nga" dang: ri nanu" tam" gyoo: wa shid mo
ngoo khayhi' vho: ngei nyid lha!
9 Nanu" gi gootu: da" yu phara" joem ri khanham we' ayo" noku boem wa.
10 Ngoo gi nanu" ri Egutu meing: mo wigi
khe: thu' yu da" nanu" Aseing Mangsoo nghoid.
Nanu" da" nhoid joem ri foo ge'- ngoo nanu" ri zoo: noem kaid byid: wa.
11 Nghoid loug we' nga" da" byumyu" yigi Ngoo ri: atam" gyo: boem.
Israela byumyu" yigi ngoo ri tam gyo: lho: cang yhe: boem zi anghoid.
12 Hougsu" nyangnu" da" nheigloem: thain: da" khyoo: khyo" yhe: loo" goo" baja".
Ngoo gi nyangnu" ri akhang" byid: kaid bye:.
13 Nga" byumyu" yigi ngoo tid da" dang: ri
tam" gyoo: byid: wa zi ngoo khayhi' gyeing" myid vho: nyid lha".
Nyangnu" gi ngoo moo: tam" gyo: cang loo wa zi
ngoo khayhi' gyeing" nheug byu nyid la".
14 Ngoo gi nyangnu" da" gyivoo joem ri myab myab soem" loo" nhang: wigi
nyangnu" da" gyivoo yi dangain" ri zain: oung: pyam byid: wa zi nghoid.
15 Ngoo ri: ngheung" nyid bang: gi nga" shidkhoin" moo:
gyoug voem ziyo' goeb pid lo boem wigi
nyangnu" da" yooboo dam shoug" zo: da" khyoo: gi
apyaid atoo: moo: jo, jo, wa zi nghoid bye:.
16 Nghoid loug we' ge thang da" sungsoo: cen: yo' ngoo nyangnu" ri khu: wigi
siyoo mo byooyhid: yo' nyangnu" ri nheugdeug sho' zo: gyi: nhang: wa zi nghoid.