COUNG" NGHEI 80
1 Israela byumyu" yi da" yang zung" su: we'
ngoonu" ri tam" gyoo: byid: we'.
Yang phung: yi da" vhujhung: phoo we' shoug" gyoo: byid: we'.
2 Ephrim- Benyamin yo' Manashe byumyu" yiri
nanya: gungdu: nyang: thu shug we'.
Re" da" yoem: moo" zeing ri toin" shed wigi
ngoonu" ri khyoid yu wa shid mo ju" ri" we'.
3 Mangsoo we"- ngoonu" ri doem shu" tau" loo" re o".
Re" da" nheig khyeug shoomyen: nheigloem: ngoonu" ri toin" shed byid: we'.
Houg: lang" ngoonu" gi khyoid yu zi shau" boem wa nghoid.
4 Gyi: myhang: da" Aseing Mangsoo we"- nang gi khamyhang" ju" sho'
re" da" byumyu" yi da" akyu" mho' dang: ri nheug yo: nyid shi" wa la".
5 Nang gi ngoonu" ri koug shu" ziri zoo: noem ti" byid: zho" wigi
ngoug byid ri khu zeing mo kaid jhoug nyid da:.
6 Nang gi ngoonu" da" mougmyid yoosoo" ri
ayam: aqei: mo mungdain joem wigi re zain: yu nhang: nyid da:.
Ngoonu" da" gyivoo joem gi ngoonu" ri
aphoug" akhyoid koid nyid boem bye:.
7 Athang agoin yoem moo" bo da" Mangsoo we"-
ngoonu" ri doem shu" tau" loo" re o".
Re" da" nheug khyeug shoo" myen: khyoo: ngoonu" ri toin" shed re-
houg: lang" ngoonu" gi khyoid yu zi shau" boem wa nghoid.
8 Nang gi Egutu meing: mo zabyid nei dakhaid ri yu ci: lo wigi
gootu: byumyu" yiri nang khaid thu pyam lho:
hau: ziri nyangnu" da" moug: moo: sho" to" abye:.
9 Hau: da" zabyid gyi: joem gi myid jang: moo: cen' zoug lo" wigi
gootu: byumyu" yiri nang khaid thu pyam lho:
hau: ziri nyangnu" da" moug: moo: sho" to" abye:.
10 Hau: ziri bouggung joem ri nya: bid shoem yoeb yo' oug nghoeb pyam wigi
hau: da" ako' joem gi gye" gyi: myhang: da
shamu gam joem ri oug nghoeb lo" nyid abye:.
11 Hau: da" akung: ako' joem gi gyid thoem" zeing moo ju" sho'
Uphrad gyid moo" gyung: moo: ju" sho' toid loung: loo" bye:.
12 Hau: ziri kyam, lheung to" da- khyam: joem ri
nang gi ce noem koid ein: phyo' pyam nyid lha"
akhid" gi he: da" khyoo: khyo" lid loo" mo, hang" we'
hau: zabyid shi" ri shoug" khau" phyo nyid boem abye: ago".
13 Hau: shigam' ri vhujhung: joem gi nang: nhe" khyoid lid lo" wigi
gougnyhoug goug: doo: joem gi hau: ziyo' voem: gyi: nyid abye: go.
14 Gyi: myhang: thang da" Mangsoo we"-
ngoonu" jhang khyoo: doem tau" loo we'.
Mougkhung: tho' mo ngoonu" ri goeb yu" kaid wigi
re byumyu" yiri khyoid yu wa shid re" ju" ri" we o".
15 Nang sho" to" lho: gyi: myhang: yang" loo nhang: da" zabyid gam ri
re" lho: goem loem byid: we'.
16 Re" da" gyivoo joem gi hau: ziri myi: nghe' kaid boem wigi
thoug lheung: pyam lo" boem bye:.
Akhid" nyangnu" ri gye yoo: nau nheigloem: yo' yu" lho:
nyangnu" ri phyo' pyam byid we'.
17 Nang khyen: yu bye: da" byumyu" yi ein: da- yoem gye" bo loo sho'
nang tu: to' kaid da" byumyu" yiri yu" zung" yu" lhoug byid: we'.
18 Nyangnu" gi khanham we' nang mo khyoo thang: theung lho:
phang: thu lo" boem wa zi anghoid.
Nyangnu" ri doem dei loo nhang: we' nyangnu" gi nang ri coung" nghei nyid boem wa zi nghoid.
19 Gyi: myhang: thang da" Mangsoo we"- ngoonu" ri doem shu" tau" loo re, o".
Re" da" nheug khyeug shoo" myen: da" nheigloem:-
ngoonu" ri toin" shed byid: we' houg: lang" ngoonu" gi
khyoid yu zi shau" boem wa nghoid.