COUNG" NGHEI 77
1 Ngoo gi Mangsoo ri gyi" sho' yoid nyid.
Ngoo gye" yoid nyid yoomo nyang: gi ngoo ri: tam" gyoo: byid: bye:.
2 Yau: khe" kyi" khyeug zi shoug" nyid uri ngoo Aseing ri akyu" mho' nyid.
Damyen, goin" ngoo gi nga" lo, ri tu: ci: lho: noku nyid.
Nghoid loug we' nheug teing ung: teung khyoo: ri ngoo ashau" myang.
3 Ngoo gi Mangsoo khyoo ri: myid yu" nyid uri so, moo" damyhang nyid lo.
Ngoo myid soin: yu" uri myid youg: myid nhoug khyoo: ngoo shoug" nyid.
4 Myen, goin" nyang: ngoo ri nhau" to" wigi
ngoo myid soung myo: nyid yoomo dang: lang" ayo" tid loo.
5 Ngoo gi lid loo" bye: da" bidnyid joem ri myid soin: yu" kaid ri
lid: loo" bye: zain void joem ri myid boin: nyid.
6 Ngoo gi damyen, goin" no" no, myid yu" bye:-
ngoo myid yu" ziyo' ngoonya gung ri ngoo myid yu bye:.
7 Aseing gi ngoonu" ri khanham we' jha" she: pyam too" wa la".
Nyang: gi ngoonu" ri khanham we' ajha" vhoo: loo: wa la".
8 Nyang: gi ngoonu" ri jheddab khyoo: jha" no: pyam lo: wa la".
Nya: da" dangsoo" khoin" ri we' phyo' shoin' pyam wam: bye: la".
9 Mangsoo gi nheug khyeug shoo" myen: khyoo: ri jha" to" myhed pyam bye: la".
Nheug khyeug wa gungkhoo: jha" nheig yo: nyid bye: la".
10 Houg: lang" ngoo tid zigi Mangsoo gi ce" yoem so, we' aboo ga: wigi
tid da" khyoo: gi ngoo ri gye" noo nhang: da" khyoo: nghoid ein: tid.
11 Aseing we" re" da" gyi: thang moo" zoo" joem ri
ngoo myid boin: nyid wa nghoid.
Nang zei: lid loo: bye: mau" pho" moo" zoo" joem ri
ngoo doem myid boin: nyid wa zi nghoid.
12 Nang zei: shoug loo bye: khyoo: dangain" ziri ngoo myid yu" nyid wa zi nghoid.
Re" da" gyi: thang moo" zoo" joem ri ngoo myid soin: yu" nyid wa nghoid.
13 Mangsoo we"- nang zei: lo da" khyoo: khaid khang" moo" gi gyeung" shang: nyid.
Nang yhang: te" nghoid thang Mangsoo gootu: khyayoo: we' anyid loo.
14 Nang gi mau" pho" alhoo: again' moo" zoo" joem ri zei: da" Mangsoo nghoid nyid.
Byumyu" yi da" mo, phung: gug moo re" da" yoem so, ri toin" shed, loo bye:.
15 Re" da" yoem so, yo' re" da" byu
Yaku yo' Yoseb da" amyed ashen joem ri nang khyoid yu bye:.
16 Mangsoo we"- gyid gi: nang ri myang lang-
houg: bang: gi nang ri gyoug nyid lho:
panglai: gyid da" no, thang joyoo mo
gyid yi we' nain" nyid ago".
17 Jhoemmoug" joem gi moug: ri vo, khyo' kaid byid: wigi
mougkhung: khyo" moug: goin' myheung lho:
moug: gyab joyoo khyi khang" moo" lhab' myeug nyid.
18 Re" da" moug: goem: thui: myeing nyid wigi
lhab' myeug myi: yo' mougmyid goin" ziri thoin" pang byid: nyid.
Moug: gyab, goin" gi nain" lho: lei" nyid.
19 Nang gi beung: mhoid tho' khyo" so" lid: lo" wigi
no, da" panglai: gyid ri neug phyed lid lo" nyid.
Nghoid loug we' re" da khyid: khoo: joem ri
hang" we' ayo" myang boem nghoid da:.
20 Nang gi Moshe yo' Arun eig yug ri vhujhung: koid lho:
re" da" byumyu" yiri yang zoem: su: yhang: ti" shu" lo yu" abye:.