COUNG" NGHEI 73
MOUGSOUG" SOEM" PUG
1 Mangsoo gi Israela byumyu" yi da" atho' moo
gyeung" nyang: ge nyid su: nghoid-
je" wigi nheigloem: phyu: yung" bang: da" atho' moo gi su: nghoid.
2 Nghoid loug we' ngoo gi
nheugshid: nheugdeug khyoo: alug lug ci: phyug pyam bye:-
nga" loem" jeung" nheigloem: we' alug lug thang byug bye:.
3 Khasu" wim gari akhyeing" bang: shid re" khyoo: khaid khang" moo"
ge lho, nyid da" khyoo: ri ngoo myang uri
hau: khyoo: yoomo phau: khuang nyid mo, ri
yu" noo" yoomo nghoid.
4 No ziyo' phu" zo: khyoo: ri nyangnu" ci: ashau" yu" nghoid ago-
Nyangnu" gi yoem bo ziyo' yang zain: nyid boem.
5 Nyangnu" gi gootu: byu yi yhang: ti"
phu" zo: khyoo: ri ashau" kham' zoo: nghoid ago".
Gootu: byu yi shau" da" yau: khe" kyi" khyeug zi
nyangnu" ashoug" nghoid ago".
6 Hougsu" nghoid yoomo nyangnu" gi
hau khuang khyoo: rigi yi: yhang: ti"
athoug" akhyoug: koid khyoo: rigi
adang byisheing: yhang: ti" void ci: boem ago".
7 Nyangnu" da" nheigloem: ung: khoug: joem gi
akhyeing" ashoeb khyoo: riza: foid, thu kaid nyid boem wigi
nyangnu" da" nheigloem: emyed gi akhyeing" ashoeb khyo"
myid soin: khyoo: joem yo' moo" myo: nyid ago".
8 Nyangnu" gi gootu: byu yiri juang" yi nyid boem wigi
ashoeb da" khyoo: riza: datid go" nyid boem.
Nyangnu" gi phau: khuang nghoid boin: nyid boem ziyo'
gootu: byu yiri doin: zeig zoo wa ziri myid soin: nyid boem.
9 Nyangnu" gi Mougkhung: tho' mo Mangsoo ri lang-
age da" gei sang: shang pyang: nyid boem lho:
mougmyid tho' mo byu yiri nheigloem: thain: ziyo'
amyeing" byid: nyid ago".
10 Hougsu" koid nyid khyoo: gi Mangso byu yi lang"
nyangnu" jhang khyoo: lheung: vang lo" boem wigi
nyangnu" tid da" khyoo: ce ja: ri nghoid loug we'
so, kho' tung" loem" jeung" nyid ago".
11 Nyangnu" gi" Mangsoo ri si' wa zi anghoid-
myhang: thang su: shoug" shoo: wa zi anghoid" ga: tid nyid boem.
12 Akhyeung" bang: ri hougsu" nghoid nyid boem wigi
nyangnu" gi athang agoin nyid de lo boem lho:
ayo, loem: khang" moo" moo je" ju yo" loo de lo nyid boem ago".
13 Houg: yoomo nga" da" gung du: ri yooboo akoid loo:
gyeung" shang: tung" yo" nyid zigi akoem: za: nghoid wa la".
14 Mangsoo we"- nang gi ngoo ri nyid" goin"
phu" zoo: shoug" nhang: nyid da:.
Nang gi ngoo ri nab kyo, ayo, khang" moo shen" yhen nyid da:.
15 Ngoo gi houg: yhang: te" da" khyoo: ri dato tid shoid nghoid rigi
ngoo gi re" byumyu" yi mo byu dayug khyo" wigi yo" zei: so, nyid zi anghoid.
16 He: da" sei: joem ri ngoo yoem kaid myid phoid sho: yu" bye:.
Nghoid loug we' hau: khyoo: gi nga" shid re se' gyo: phoid yu wa zi gye" yau: nyid.
17 Re" da" Noku Yhoem: Moo" khoug: moo ju" vang re" thang: ri
akhyeing" bang: moo: khasu" bue" loo ziri ngoo se gyoo: bye:.
18 Nang gi lung: ngei" zug lho: jhoid leung wa joyoo
moo nyangnu" ri nyid nhang: lho:
nyangnu" ri byo, yoin" wa joyoo khyoo: khyo' kaid wa zi nghoid.
19 Nyangnu" gi houg: jang:- phyo' shoin pyam zi shau" wigi
Nyangnu" da" lo" thang mo khyoo: gi
gyoug ci jo yoo khyoo: gyo" yhe: lo" nyid.
20 Aseing we" ngoonu" gi nab soin: ayo, moo
byoug byoug da" yhoebmo, su" za: nghoid nyid wigi
Aseing nang to' lo da" uri nyangnu" gi anyid byug lo: boem.
21 Ngoo myid soin: nyid khyoo: moo kyid kyid: kho" wigi
ngoo kham' zo: nyid khyoo: moo nheigloem: no nyid uri
22 Gougnyhoug ti" ngoo ko" pa" lo" lho:
ngoo nang ri ase gyoo: loo.
23 Nghoid loug we' ngoo gi nang yo' khanham we'
jhang jhang nyid ziyo' re" lo, gi ngoo ri zei: ci.
24 Re" da" jhau" shed khyoo: yo' ngoo ri vhu" shu" she: nyid lho:
Thang" thang phoug" tab, ngi shab khyo"
nang gi ngoo ri lhoem: kham: yu wa zi nghoid.
25 Mougkhung: moug: di moo nang mo lid lho: ngoo gootu: ciyo" lha".
Ngoo gi nang ri bain yo" too" bye:- mougmyid tho' moo: ngoo civhoo: shi wa lha".
26 Nga" nheigloem: yo' gung du: gi yoem neung: loo" wa nghoid.
Nyang: gi apyaid atoo: mo nga" yhouggyen: da" jonu" nghoid.
27 Nang ri she: pyam mo, gi gyeing" nyang: joem: lo" boem wa zi nghoid.
Nang moo: nheigloem: azung" bang: ri nang gi phyo' shoin' pyam wa zi nghoid.
28 Nghoid loug we' nga" shid re" koem gi
Mangso jhang yo" tain" tab yhe: lo" khyoo:
phung" yoeb bo da" Aseing Mangso jang" mo
goem loem byid: khyoo: shoug" kham: yu lho:
nyang: zei: bye: da" moo" zoo" joem dangain" ri
yo" tid fu" wa zigi khayhi' mau" pho" khyoo: nghoid lha".