COUNG" NGHEI 7
O" Aseing nga" Mangsoo we'
goem coung: byid: wa shid re" ngoo re" jhang khyoo: tain" loo bye:.
Ngoo ri cang khaid myheug loo mo, da" lo, mo ngoo ri khyoid yu we'.
Hougsu" anghoid ri nyangnu" gi khangkhyi yhang: ti"
ngoo ri hang" we' ayo" khyoid yu lo: da"
joyoo moo she: khyoid lo" lho: hougmoo: ngoo ri
adu atoem koid ngaid ceung pyam goo" wa zi nghoid.
3-4 O" Aseing nga" Mangsoo we"-
ngoo dayug yug ri shoid vhang: nghoid rigi
bidnoem dayug ri fain" lho: nga" gyivoo ri ce: sei: abo jang" moo
athoug" akhyoug: gyi koid nghoid rigi
ngoo hid: yhang: te" khyoo: daja: ja: koid shoid rigi
Gyivoo joem gi ngoo ri cang khaid myhi: myheug yu lho:
Nyangnu" gi ngoo ri zain: said pyam wigi
nga" kangso' ri pheilhoug: boem moo
she: pyam too" khare" boem wa nghoid.
O" Aseing we"- nheug yoo: we'
nga" gyivoo joem nheug yo: khyoo: ri toem pyam wa shid mo
to' lo" lho: ngoo ri pang" yu we'.
Nang gi nyeung veung" tarha" ri vho: ngei su: nghoid.
Meing: byu dangain" mo, ri re" ayam aqei: loem: lheung
khab' moo: zeung: foem: nhang: lho:
atho khyo" nyangnu" ri vhoebkhang" byid: nyid ge'.
O" Aseing we"- nang gi byu xangsu: dangain" bang: ri
dang: phyed byid: nyid su: nghoid.
Ngoo ce" yooboo we' aboo nga" da deungmain" khyoo: ri
nang se' nyid yoomo
nga" shoid khyo" dang: bo phyed byid: we'.
Nang gi deungbyeung" da" Mangsoo nghoid yoomo
ngoonu" da" vho: ngei khyoo: yo' myid soin: khyoo: ri
dang: phyed byid: nyid.
Byugang: yi da" akhyeung" khyoo: ri toem to" lho:
byu gi yiri coung" ngei ngi: shab jhungshug byid: we'.
10 Mangsoo gi nga" goem loem su: nghoid-
Nya: dang: tam" gyoo: mo, ri khyoid yu nyid.
11 Mangsoo gi dain: khyo" tarha" dang: phyed da" su: nghoid ziyo'
akhyeing" ashoeb bang: ri khanham we' dam kaid byid: nyid su: nghoid.
12 Gyeing" nyang: nyangnu" gi nheigloem: athed lo boem nghoid rigi
Mangsoo nya: sham: moo" gi sei" wam: bye:.
Nyang: gi lid: ri thoung: wigi jen" jen" soin too" wam: bye:.
13 Nyang: gi shid: nhang: se' da" gyizi ri ci: lho:
myi: dab nyid da" nya: myoo: joem ri we' thoung: yeung too" bye:.
14 Akhyeung" bang: gi age khyoo: ri khasu" yo" koid wa lha" ga:
myid soin: nyid ziri yu" yu" we'.
Nyangnu" gi kyi" khyeug byid: wa ziri soin' lho:
mhau, fain" khyoo: ri zei: so, nyid boem.
15 Nghoid loug we' nyangnu" gi gooji shid re" ga
du: to" gyoin: moo: nyangnu" gyo" abye: go.
16 Houg: yoomo nyangnu" gi nyang: nya:
akhyeung" da" moo" zoo" yo' shen" yhen zi shoug" lho:
nyang: nya: athoug" akhyoug: da" moo" zoo" yo"-
dam, dab, ju: zang" boem bye:.
17 Nya: nyeung veung" da" tarha" yoomo
myhang: thang su: Aseing da" myeing khyang" ri
ngoo jeju" boin: coung" nghei lid jhoem" kaid nyid.