COUNG" NGHEI 69
1 O" Mangso ngoonu" ri khyoid yu we'.
Gyid gi nga" leung zeing: ju" sho' nhau, do loo bye:.
2 Ngoo gi no, da" thoem" boeb, moo: noeb lo" nyid wigi
hau: joyoo moo nang: theing wa thain: da" myidzhoo" ajo.
No, da" gyid khoug: khyoo: ngoo noeb vang lo" nyid wigi
beung: mhoid joem gi ngoo ri se" shid: nhang: wa soin, lo nyid.
3 Ngoo gi pang" thoug yu boem wa shid re" nyho: yoid, wim" yoomo
myoung: dau lo ziyo' nga" khyung" kang: we' noo bye:.
nang pang" thoug yu wa ziri yu" nyid yoomo nga" myojid" khe" nho: nyid bye:.
4 Ce" yooboo we' abo jang" moo ngoo ri ngheung" nyid mo, gi
nga" da" vhudi xam: khaid tho moo: je myo: nyid boem.
Nga" gyivoo yigi ngoo ri mhau, fain" juang" yi da" dang: tid boem lho:
tu: lhoin" lo nyid boem ago".
Nyangnu" gi yoem bo boem wigi ngoo ri said pyam nau nyid boem-
ngoo akhau" yu da" ziyoo joem ri doem xab, nhang: nyid boem.
5 Mangsoo we"- nga" yooboo joem gi re" jang" mo
yo" yhoem" pyam wa zi anghoid loo:-
ngoo khayhi' gyeing" nheug agyeing: koid loo bye: ziri we' nang se' nyid abye:.
6 Athang agoin yoem moo" bo ziyo' gyi: myhang: da" Aseing we"-
nang ri nghe: khau: nyid mo, gi ngoo yoomo sho' athu goo" baja".
Israela da" Mangsoo we"- nang ri loem khau: noku bang: ri
ngoo yoomo myonhoo: asoem" loo" nhang: nyid ja".
7 nang yoomo ngoo gi aphoug" akhyoid zi thoung" shau" nyid ziyo'
ngoo gi sho' thu zi shoug" nyid bye:.
8 Nga" mang: nhung" yi da" phung: moo tungbau byu yhang: ti"
nga" da" ikoin deunghku: byu yi phung: moo
tungbau byu dayug yhang: ti" ngoo bue" nyid bye:.
9 Re" da" Noku Yhoem: Moo" khoug: moo
loem khau: coung" pid da" nga" nheigloem: gi myi: su" nge" loung nyid.
nang ri aphoug" akhyoid koid da" khyoo: gi nga" tho moo: ju" jo, bye:.
10 Zoo: noem jang" lho: nga" gung ri ngoo khyo, nyhoem: nyid uri
Meing: byu yigi ngoo ri aphoug" akhyoid koid nyid ago".
11 Koug shu: da" byimi ngoo void ci: da uri
Nyangnu" gi ngoo ri juang" yi nyid ago".
12 Voomoo" fu" moo" khyoo: joem moo-
Nyangnu" gi nga" khyoo: gei sang: yen" boem yi yo'
yhid: yed bang: gi nga" khyoo: ri lid jhoem" yang" nyid boem.
13 Nghoid loug we' Aseing we"- ngoo koem gi
nang moo: za: akyu" damho' nyid wa.
Mangsoo we"- nang vho: ngei ayo, moo: ngoo ri tu" byid: we'.
Re" da gyi: thang jheddab nheigloem: yo'
khyoid yu wa ga: nang to" da" dangsoo" khoin" yo'
dakhyoo" ti" ngoo ri tu" byid: we'.
14 Thoem" boeb, moo: noeb lo" jang" mo
ngoo ri xue: yu we' nga" gyivoo joem da" lo, mo khyoid yu we'.
No, da" thoem" thi" mo ngoo ri xue: yu we'.
15 Gyid khyoid zoo" moo ngoo ri anhe, boem" pyam nhang:-
no, da" gyid thoem" moo: ngoo ri ase" shid: nhang:-
loeb duang: khuang" moo: we' ngoo ri anoeb, vang loo" nhang:.
16 Aseing we" re" da" geung: teung jhed khyeing: kang: khyeung: da"
ge lho' khyoo: moo: ngoo ri tu" byid: we'.
Re" da" gyi: sheung: nheug khyeug shoo" myen: nheigloem: yo'
nga" jhang khyoo: lheung: loo we'.
17 Ngoo gi yau: khe" khyoo: zeing ri shoug" nyid yoomo
nanya: gung nyang: re" join' pho, jang" mo
agau" lo" byug akhid" nyang: ngoo ri tu" byid: we'.
18 Ngoo ri: khyoid yu wa shid mo tain" ri" we'.
Nga" gyivoo joem da" lo, mo ngoo ri khyoid khyi: yu we'.
19 Ngoo gi khayhi' gyeing" aphoug" akhyoid koid ziri shoug" nyid wigi
khayhi' gyeing" sho thu lho: khayhi' gyeing" phoug" yoid zi shoug" nyid zigi nang se' nyid gu nghoid.
20 Aphoug" akhyoid koid da" khyoo: gi nga" nheigloem: thang bye:.
Nheug se' khyeug da" byu ri ngoo nheug byu lang" nyid.
Nghoid loug dayug we' anyid.
Nheug teing ung: teing byid: wa shid re"
nheug byu lang" nyid nghoid loug we' ngoo hang" ri we' amyang.
21 Ngoo zooyoid nyid uri nyangnu" gi ngoo ri myoono, byid: zho" ago".
Ngoo gyid shed nyid uri nyangnu" ngoo ri gyid jhen: yeung byid: jhoug ago".
22 Nyangnu" da" zo: shoug pui" gi nyangnu" ri byo, yoin" loo" nhang: baja".
Nyangnu" da" phoug" dab, zoo: shug pui" gi
nyangnu" ri joem: gyo" loo" nhang: pyam, baja".
23 Nyangnu" da" myojid" joem gi ayo" myang loo" sho' myo, jed loo" goo" baja".
Nyangnu" da" dang khung: gi khanham we'
yoem: neung: jo, boem goo" baja".
24 Nyangnu" da" atho' moo re" nheug yo: khyoo: foid gyoin: kaid we'
re" da" nheug khoo" yo: khyoo: gi
nyangnu" jang" moo: myhi: loo" baja".
25 Nyangnu" da" zeung: foem: dab, joem gi jham" dung" khi" bui" baja".
Nyangnu" da" zoem" joem moo dayug we' adei nyid loo goo" baja".
26 nang wigi shen" too" mo, ri nyangnu" gi pyi: sho: shen" yhen nyid boem ziyo'
nang dam, tab, too" shoug" mo, da" phu" zo: khyoo: joem ri
nyangnu" gei sang: nyid boem.
27 Nyangnu" da" yooboo joem dangain" ri lhid" xoem" too" we'
Re" khyoid yu khyoo: moo nyangnu" ri
dakhyam" dayam, khyalang" ashoug" nhang:.
28 Re" da" kangso' mougsoug" pug mo nyangnu" da" myeing ri said pyam byid: we'-
re" byumyu" yi da" lhid xoem" moo: nyangnu" abo boem baja".
29 Nghoid loug we' ngoo gi noo phyoo" shoug" lho: nheigloem: thang bye:.
Mangsoo we"- ngoo ri vu, to' yu lho khyoid yu we o".
30 Mangsoo ri jikhoin" dang: yo' ngoo coung" nghei nyid wa
Jeju" boin: ziyo' nya: da" nghoid thang khyoo: ri ngoo tid fu" byid: nyid wa.
31 Hau: zigi nujung xoin" ngei" byid: da" tho' moo Aseing ri je" gau yi ngeibu: nhang: nyid.
Xu: da" nujung loo: xoin" to' byid: tho' je" vho: ngei wa zi nghoid.
32 Doin: zeig zo: nyid zi shoug" bang gi hau: khyoo: ri myang boem lang"
nyangnu" gi gau yi ngei pyo: lo boem wa
Mangsoo ri loem khau: noku bang: gi nheigloem: yoem yo" yu boem wa nghoid.
33 Aseing gi ca" yo nyid bang: da" akyu" mho' dang: ri tam" gyoo: byid: nyid wigi
thung: loung" jo, da" nya: byu yiri to" myhed pyam nghoid da:.
34 Mougkhung: yo' myidjang- panglai: yo' hougmoo: loung" jo,
dei moo: dei bang: we' Mangsoo ri coung" nyid we'.
35 Nyang: gi Yerusalem ri khyoid yu wa ziyo'
Yuda mung" mo voomoo" joem ri we'
doem so' zhoug too" wa zi nghoid.
Nya: byu yigi hau: joyoo moo yo" khau: nghe: nyid boem wigi
mungdain: ri yo" seung: yu boem wa zi nghoid.
36 Nya: dei zoo: yi da" amyed ashen yigi
hau: da" mid ri kham: yu boem wa ziyo'
nyang: ri jheddab nyid mo, hau: jang" moo:
shoug" nyid boem wa zi nghoid.