COUNG" NGHEI 62
1 Mangsoo gi ngoo ri khyoid yu wa shid re"
ngoo gi nheigloem: sheing" sheing: dalang" nyid wa zi nghoid.
Ngoo gi nyang: ri za: danghe: khau: nyid wa zi nghoid.
2 Nyang: kyeing" za: ngoo ri khyoid yu ziyo' goem loem byid: nyid.
Nyang: gi nga" gyi goo jang: nghoid nyid.
Ngoo gi khanham we' soem" lo" zi shoug" wa anghoid.
3 Nanu" gi gyau: gyoeb leung lo" da" khyam: yhi' lang-
yoem: abo da" byu dayug ri kha: yo, ju" sho' nanu" dangain" zain: go" nyid wa ein: go" la".
4 Nya: da" phau" myang: joyoo mo nanu" za: nyang: ri lang: khyo' pyam nau nyid da:.
Nanu" gi mhau, fain" ziri vho: ngei nyid boem ago".
Main kaid byid: dang: ri nanu" tid nyid boem nghoid loug we'
nanu" da" nheigloem: khoug: moo: nyang: ri nheung" ago".
5 Ngoo gi Mangsoo moo: za: nghe: khau: nyid.
Ngoo gi nyang: riza: nheug byu nyid.
6 Nyang: kyeing" za: ngoo ri khyoid yu ziyo'
lhoug zung" goem loem nyid nyang: gi nga" da" gyi ve, pyam su: nghoid nyid yoomo
ngoo gi khanham we' soem" joem: loo" shoug" wa zi anghoid.
7 Nga" da" khyoid yu khyoo: yo' myonhoo: phung" yoeb gi Mangsoo moo: za: nghoid nyid.
Nyang: gi nga" yoem: bo da" goem loem su: nghoid wigi
nga" da" khoug: loo lug ug we' nghoid nyid.
8 Nga" da" byumyu" yi we"- ayo, khang" moo" Mangsoo ri loem khau: nyid we'.
Nyang: gi yha" da" khoug: loo joyoo nghoid yoomo
nanu" da" yau: khe" khyoo: bain sho' nyang: ri tid kyoo" we'.
9 Xangsu: byu yi dangain" gi- so, thid she: da" lid ti" za: date: nghoid nyid boem.
Gye" nghoid ga: su: yo' nge nyhoem: jo, su: we' dakhyoo" te" ce" phoug" we' adab.
Nyangnu" ri jang mo leug yu" uri nyangnu" ce: jang myo, we' anang: boem.
Nyangnu" gi so, thid she: da" lid tho' ri soem" tang" lhang" nghoid nyid boem.
10 Athoug" akhyoug: khyoo ri nanu" anghe: khau: nyid goo-
lhoid zoo: lhoid shoug khyo" yo" yu da" zi ce: ja: ri we' nheug myid abyu nyid goo".
Nanu" yo" loo de loo nghoid loug we' hau: ziri nheug anhei: nyid goo".
11 Aseing gi phung" yoeb yoem: so' bo nyid da" khyoo: ri
nyha" Mangsoo tid nyid ziri ngoo myoo" sho' lheung: shau" gyo: loo bye:.
12 Nya: da" jhed khyeing: kang: khyeing: gi geung: teung jo, khyoo: ri we' ngoo shoug" gyoo: bye:.
Aseing we"- nang gi re" da" byu yi gu: ri nyang: nya: moo" zoo" yo' dakhyoo" ti"
coung" nghei ngi shab jhungshug ri nang nyang: byid: wa zi nghoid.