COUNG" NGHEI 59
1 Nga" Mangsoo we"- nga" gyivoo joem lo, mo ngoo ri: khyoid yu we'.
Ngoo ri: zain: loo mo, da" lo, mo we' ngoo ri goem loem yu we'.
2 Akhyeing" ashoeb, bang: da" lo, mo we' ngoo ri goem loem yu we'.
Byu said da" moo" zei: bang: lo, mo we' ngoo ri khyoid khyi: yu we'.
3 Yu" ge' Nyangnu" gi ngoo ri said pyam wa shid re" lang" nyid boem.
Nheig khyeug shoomyen: ase' da" byu yigi ngoo ri
lhoem: thougtheung wa shid mo zeung: foem: nyid ago".
Hougsu" koid nyid boem zigi ngoo zei: shoid pyam da"
shoid vhang: khyoo: yo' yooboo joem yoomo we' anghoid.
4 Aseing we"- nyangnu" gi nyangnu" da" joyoo moo meing: zain: wa shid re"
jen" jen" lang" nyid khyoo: gi nga" shoid vhang: khyoo: ce ja: yoomo we' anghoid.
5 Gyi: myhang: su: Aseing Mangsoo we"- ngoo ri pang" yu wa ri" we'.
Israela Mangsoo we"- nanya: gung nyang: yu" yu" we' to' wigi
Mangsoo ri aloem mo, ri shen" yhen we'.
6 Nyangnu" gi myen" ri doem tau" lo wigi lakhuid" joem yhang: ti"
nyeung xue: ci: lho: voomoo" khoug: moo: nyangnu" lam" lheung: yen" boem ago".
7 Nyangnu" da" aphoug" akhyoid koid ziyo' kyug nhain' nyid dang: ri tam" gyoo: byid: we'.
Nyangnu" da" nhoid khoug: mo yhoo: joem gi sham: yhang: ti" tho' nyid boem wigi
nyangnu" tid sang: da" dang: joem ri hang" we' ashoug" gyoo: ga:
nyangnu" gi zheung: myid nyid boem.
8 Nghoid loug we' Aseing we" nang gi nyangnu" ri yi juang" pyam nyid da:.
Mangsoo ri aloem mo, ri we' nang nhoomyeing myeung pyam byid: nyid da:.
9 Ngoo gi re" da" yoem: so' moo nheugshid: nheugdeug nyid.
Mangsoo we"- nang gi nga" da" khoug: nghe: lug ug nghoid nyid.
10 Nga" Mangsoo gi ngoo ri jheddab nyid wigi nga" jang" moo: ju" ri" wa nghoid.
Nga" gyivoo joem soem" lo" khyoo: nyang: ngoo ri myang nhang: wa zi nghoid.
11 Mangsoo we"- nyangnu" ri asaid pyam.
Hougsu" anghoid ri nga" byumyu" yi to" myhed pyam boem wa.
Ngoonu" ri goem loem byid: da" Aseing we"
re" yoem: vhoo" yo' nyangnu" ri khaid sain" pyam wigi nyangnu" ri oung: pyam we'.
12 Yooboo joem gi nyangnu" da nhoid yid joem moo: bo jo, wigi
nyangnu" tid sang: da" dang: khoin" dangain" we'
yooboo za: dazheung: nghoid nyid.
Nyangnu" da" phau: khaung khyoo: moo: myi" goo" baja".
Nyangnu" gi nheing" myeing" nheing" thui: yo'
mhau, fain" vo da" dang: za: tid nyid boem yoomo
13 re" da" nheug yo: ziyo' nyangnu" ri phyo' shoin' pyam we'.
Nyangnu" ri shang" shang phyo' shoin' pyam we'.
Houg: lang" Mangsoo gi Israela ri vhoebkhang" nyid khyoo: gi
byu yugkhang" moo" se' lo wigi nya: da" vhoebkhang" khyoo: gi
moug: gyab goin" moo je" byeung" lo" khyoo: ri we'
yugkhang" moo" se' lo" boem wa nghoid.
14 Nga" da" gyivoo joem gi myen" ayo, ri doem tau" lo" lho:
lakhuid" su" myeing myhu" lho: voomoo" khoug: moo: nyangnu" lam" lheung: yen" goo" baja".
15 Nyangnu" gi zoo: noem gyi: sho' ashoug" zo: boem yoomo myeung yen" wigi
zoo: noem sho: lheung: yen" da" lakhuid" joem yo' du nyid.
16 Nghoid loug we' re" yoem: zeing so, mo" khyoo: ri
ngoo gi jikhoin" yo' coung" nghei nyid wa.
Re" da" geung: teung jhed khyeing: kang: khyeing: ri nab soin: ayo, khang" moo" moo
ngoo thui: zeing yo' jihkoin" nyid wa.
Nang gi nga" da" phang: khoug: jang: bue" jo, wigi
ngoo yau: khi" zi shoug" nyid ayo, moo gau: da" khoug: loo joyoo nghoid.
17 Nga" da" goem loem su:- nang ri ngoo coung" nghei nyid wa.
Mangsoo gi nga" da" phang: khoug: jang nghoid nyid ziyo'
ngoo ri jheddab da" Mangsoo we' nghoid nyid.