COUNG" NGHEI 57
1 Ngoo gi re" jang" moo: yo" gau: nyu: nyid wa ju" ri" bye: yoomo
ngoo ri nheug khyeug yu byid: we'.
Uglid zeing hau, lid: lo" ayo, ju" sho' re" dung khoug: moo ngoo khau: nyid wa.
2 Myhang: thang da" Mangsoo ein: da- ngoo ca" nyid da" khyoo: khaid khang" moo" ri
yo" pang" byid: da" Mangsoo ri ngoo khe: nyid.
3 Nyang: gi ngoo ri mougkhung: mo tu" byid: lho:
ngoo ri khyoid yu wa zi nghoid.
Ngoo ri: zeig zo: nyid bang: ri nyang: oung: pyam wa zi nghoid.
Mangsoo gi nya: da" geung: teung jhed khyeing: kang: khyeing: yo'
dang: zung" nheigloem: ngoo ri toin" shed loo wa zi nghoid.
4 Byu shoo" zo: da" khangkhyi joem yhang: te" da" gyivoo joem wigi lheung khoem to" zi ngoo shoug" nyid.
Nyangnu" da" zei joem gi lham: toid joem yo' shamcoin" yo' myoo: yhang: ti" du, wigi
nyangnu" da" yhoo: joem gi tho' da" lhab' sham: ti" nghoid nyid.
5 Mangsoo we"- mougkhung: moo re" da" myhang: thang khyoo: ri toin" shed wigi
mougmyid gyab, goin" moo: re" da" myonhoo: phung" yoeb ri toin" shed we'.
6 Nga" gyivoo joem gi ngoo ri myheug yu wa shid mo
goin' ri cang kham: to" boem lho: ngoo gi myid myoo: ung: loug nyid.
Nyangnu" gi nga" khyoo: moo- gyoin: du: to" boem nghoid loug we'
nyangnu" nyang: hougmoo: gyo" ago".
7 Mangsoo we"- ngoo gi bain sho nyang: nheugshid: nheugdeug jo, bye:.
Ngoo gi nang ri jikhoin" joem yo' coung" nghei nyid wa.
8 Nga" da" soozoo: we" too' we'- nga" da" teing yo' khalhang we" too' re.
Bid ri we' ngoo nhoug" wa zi nghoid.
9 Aseing we" byumyu" yi da" mo, phung: gung moo-
nang ri ngoo jeju" boin: nyid wa zi nghoid.
Meing: byu da" mo, phung: gung moo ngoo nang ri: coung" nghei nyid wa.
10 Re" da" geung: teung jhed khyeing: kang: khyeing: gi
mougkhung: mougdi khyoo: myhi: ju" jo, wigi
re" da" dang: zung" khyoo: gi moug: laid phyoo" ju" sho' myhi: jo.
11 Mangsoo we"- mougkhung: moo: re" da" myhang: thang khyoo: ri
toin" shed lho: myidjang goin" jang" moo
re" da" phung" yoeb myho, nhoo: ri toin" shed nyid we' o".